ކޮރަޕްޝަން ނައްތައިލުމަށްޓަކައި ދައުލަތުގެ ހިންގުން ހަރުދަނާކޮށް، އަދުލު އިންސާފު މިނިވަންކޮށް، ކޮރަޕްޝަނަށް ފަހިވާ ކަންކަން ނައްތައިލުމަށް ބޮޑު ބަދަލުތަކެއް ގެނައުމަށް ބޭނުންވަނީ ސިޔާސީ އަޒުމެވެ. ނަމަވެސް އެ އަޒުމު ހަގީގަތަކަށް ބަދަލުކުރެވޭނީ އަމިއްލަަ ސިޔާސީ މަންފާ އެއް ފަރާތްކޮށް ރައްޔިތުންގެ ހައްގުތައް ކުރިއަށް ނެރެގެންނެވެ.

މިއަދު މި ރިޕޯޓުގައި މި ވާހަކަ ދައްކަން މި ޖެހޭ ސަބަބަކީ ދުވަސްވަރަކީ މުޅި ގައުމުގައި ކޮރަޕްޝަންގެ ވާހަކައިގެ އަޑު ގަދަވެ އަދި ފިޔަވަޅުތަކެއްވެސް ރައީސުލްޖުމްހޫރިއްޔާ އަޅުއްވަމުން ގެންދަވާކަން ދައްކަވަމުން ގެންދަވާވެސް ދުވަސްވަރަކަށް ވުމުންނެވެ.

ނަމަވެސް މިހާރަށް ބަލާއިރު އިވޭ ކޮންމެ ކޮރަޕްޝަންގެ އަޑަކާ އެކު އަޑުގޮސް ފަނޑުވަނީ ރައީސް މުހައްމަދު މުއިއްޒާ ހަމައިން ކަމަށްވުމީ އިއްތިފާގަކަށް ނަމަވެސް ނުވާނެކަން ޔަގީނެވެ. އަޑުތައް އިވޭ ގޮތުގައި އަދުގެ ސަރުކާރުގެ ތެރެއިން ހިނގަމުންދާ ހުރިހާ ނުކިއްސަރު ވަޑާމެއްގެ ފަހަތުގައި ހުންނެވި މާވަޑިޔަކީ ރައީސް މުއިއްޒެވެ. އެގޮތުން އެއިން ކޮންމެ ނުކިއްސަރު ވަދާމުގެ ވައްކަމުގެ މައުލޫމާތު ރައީސް މުއިއްޒަށް ކުރިން ހިއްސާކޮށްފައިވާކަމާ އަދި އެމަނިކުފާނު ދުވާލު ހަތަރު ދަމު މުއާމަލާތް ކުރައްވަން ގެންގުޅުއްވާ ފޯނަށް ވަކިން މެސެޖުގެ ގޮތުގައި ފޮނުވާ އެލާޓުކުރުމާ އަދި މީސް މީޑިޔާގައިވެސް އެމަނިކުފާނު ޓެގްކުރައްވާ އެ ފަދަ ވައްކަންތައް ސަމާލުކަމަށް ގެންނަމުންދާއިރު އެކަންކަން ރައީސް އެނގިނުލައްވާނަމަ އޭގެ މާނައަކި ރައީސަށް އަދި ފުރިހަމައަށް ޒިންމާ ނުނެގެންވެއޭ ކަމަށް ބުނެވިދާނެއެވެ.

ކޮންމެ އަކަސް އެމްއެމްޓީވީ އުފައްދަން ރައްޔިތުންގެ އިޖްތިމާއީ އެހީތެރިކަމުގެ ތިޖޫރީ ދަވާލާ، ވެރިންގެ ޖީބު ބޮޑުކުރަން ނުގަވާއިދުން ނުވަތަ އުސޫލުން ބޭރުން ގޯތި ދޫކޮށް ރައްޔިތުންގެ ބޯހިޔާވަހިކަމުން ކުރި ބޮޑު ބިޔަ ވައްކަން ފަދަ ކަންކަން އެމަނިކުފާނުގެ ސަމާލުކަމަށް ގެނައިއިރު އެކަމުގެ ހިލަމެއް އެމަނިކުފާނަށް ނުވާކަމަށް ވިދާޅުވެ ރައީސް މުއިއްޒު ވަކި ޓީވީ ޗެނެލްއެއް ގެންގޮސްގެން ކުޅުއްވި ޑްރާމާ އަތަށް ގޮވީވެސް އިތުރުފުޅު ހައްދަވާ ކަމުން ރެކެން އުޅުއްވުމުންނެވެ.

ކޮންމެ އެސްއޯއީއަކުން ކޮންމެ މަހަކުވެސް މުލިއާގެއަށް ވަކި އަދަދަކަށް ފައިސާ ފޮނުވަން މަޖްބޫރުކުރުވާ ސަރުކާރުގެ ތެރެއިން ވައްކަންކުރުވުމަށް ފަހު އެއީ އެނގޭ ކަމަކަށް ވެސް ނުހައްދަވާ ގުރުބާން ކަންބަޅިއަކަށް އެ އެސްއޯއީތަކޔގެ ވެރިންގެ ގޮތުގައި ތިބި މީހުން ހަދަމުންދާ މަންޒަރު ފެނުމުން ހިތަށް އަރަނީ އެންމެ ވާހަކައެކެވެ. ކެޔޮ ގަނޑު ކަނޑާލީމާ ގަހުގެ ބޭނުން ކެނޑުނީމާ ނަގާ އެއްލާލުމަށް ފަހު އަނެއްކާވެސް މި އައްޔަންކުރަނީ އެޅިހާ ބަތަކަށް ރިހަ އަޅާނެ ވަރުގެ މީހުންތާއެވެ.

ކޮންމެ އަކަސް ކޮންމެ ފަހަރަކު ސަރުކާރުގެ ކަންކަން އަތަށް ގޮވުމުން ކަންބަޅި ކެހެރީގައި ފިލާ ހުންނަވާ ހިޔަޅެއް ފަދައިން ރައީސް މުއިއްޒު ގެންދަވަނީ އަމިއްލަ ނަފްސު ސަލާމްތަކޮށް ސޭފް ޒޯން ކުރަމުންނެވެ. މި ގޭމުގެ އެހެން ބައިވެރިން ޑެންޖަރ ޒޯންއަށް ލުމަށް ފަހު ތިމަން މަނިކުފާނު ބޮނދަ ޖައްސަވައިގެން އޮންނަވާ ގެންދަވަނީ ވެރިކަމުގެ ދިފާއުގާ މަރުފަލިޖަހަމުންނެވެ.

ދައުލަތުގެ ވެރިން ހިންގާ ކޮރަޕްޝަނުގެ ބޮޑު އަގު ދައްކަން ޖެހެނީ ނިކަމެތި ރައްޔިތުންނަށެވެ. ކޮރަޕްޝަނަކީ ޤައުމުގެ ހަލާކުން މިހާރުވެސް މިދަނީ ލޯމަތިން މިހިރަ ފެންނަމުންނެވެ. ވެރިކަމުގެ އާރާއި ބާރާއި ޝާނާއި ޝައުކަތު ލިބެންދެން ރައްޔިތުންނަށް ދެއްކީ އަވާމެންދުރެވެ. ބާރުތައް ލިބުމުން މަގާމުތައް ބަހާލަނީ ވެރިމީހާއަށް ސަނާކިޔާ ބައިތުލްމާލުން ވައްކަންކުރަން އަތް ގާތް ކޮށްދޭނެ ވަގުންނާއި ތަގުންނަށްކަން މިއަދު މިދަނީ ހާމވެ ނިއުޅެމުންނެވެ.

ވެރިވެގަންނަނީ ރައްޔިތުންގެ ބައިތުލްމާލަށެވެ. ހެޔޮވެރިކަމެއް ޓެގު އަޅުވާ އެކި ގޮތް ގޮތުން ޓެކްސް ނަގާ ފެލާލަނީ ރައްޔިތުންނެވެ. ވެރިކަމުގެ ދައުރު ނިންމާލަނީ ޝަރަފާއިއެކު އުމުރަށް ލިބޭ އިނާޔަތާއި ބައިތުލްމާލުން ވަގަށްނެގި ފާއިސާއިން މުއްސަދި ސާދާގަރަކަށް ވެގެންނެވެ.

ކެބިނެޓު ވަޒީރުން، މަޖިލީސް މެމްބަރުން، ފަނޑިޔާރުން، ފުލުހުންނާއި ސިފައިންގެ އިތުރުން މުއައްސަސާތަކުގެ ވެރިން ހިތްފުރޭވަރު ކޮށްލައެވެ. ޕީއެންސީގެ މެޖޯރިޓީއޮތް މާލޭ ސިޓީ ކައުންސިލް ވެސް އޮތީ މި ރޭހުގެ ލައްކަ ކުރީގައެވެ. އެޗްޑީސީގެ ވާހަކަ ނުދައްކާށެވެ. އެންސްޕާ، މޯލްޑިވް ގޭސް، އެމްޕީއެލް ފަދަ ދައުލަތަށް ގިނަ ފައިސާ ވަންނަ ތަންތަނުގާ އިންތިހާއަށް ކޮރަޕަޝަނެވެ! ފާއިސާގެ ބާރުގަދަވެ މިވާހަކަ ދައްކަން މިނިވަން މީޑިޔާއެއް ނެތެވެ.

ވާހަކަތައް ތިލަކުރާ މީހުން ހަދަނީ ފިތުނަވެރިންގެ ގޮތުގައެވެ. އެއީ ހަގީގަތް ހަޖަމް ކުރަން އެބައިމީހުންނަށް އުނދަގޫވުމުންނެވެ. ނަމަވެސް ހަގީގަތް ވާނީ ހަގީގަތަށެވެ. އެކަން އޮޅުވާލާ އޮޅުން ސުވާލި ގެނދޭނީ ވެސް ވަކި މިންވަރަކަށްތާއެވެ. ވަގަކަށް ހާސް ދުވަސްކަމާ ވެރިންނަށް އެއް ދުވަސްކަން އަދުގެ ކުރީ ސަފުގައި ތިބި ވިލުނޫކުލައިގެ ބޮޓުންނަށް ނޭނގެނީ ތޯއްޗެކެވެ.

ކޮންމެ އަކަސް ހުރިހާ ބާރެއް މުށު ތެރެއަށްލާ ނަމުން ރިޔާސީ ވެރިކަމެއް، ކަމުން ޚުދުމުހުތާރު ވެރިކަމެއް ކުރަމުން ގެންދަވާ ރައީސް މުއިއްޒު އެ ގެންދަވަނީ މަރުފަލި ޖަހަމުންނެވެ. ގިނަ ފަހަރު މަންޒަރު ބަލަން ހުންނަ އިރު، އެމަނިކުފާނު ސިޔާސީ ގޮތުން އަމިއްލަ ސަންދޮކަށް ފަހު މޮހޮރު ޖަހާހެންވެސް ހީވެއެވެ.