ދިވެހިރާއްޖޭގައި އުޅެމުން ދިޔަ ނޭޕާލު އަންހެނަކު މަރުވެފައިވާ ކަމަށާ މައްސަލަ ތަހުގީގުކުރަމުންދާ ކަން ދުލުހުން ހާމަކޮށްފިއެވެ.

ނޭޕާލު އަންހެނަކު ރޭޕުކޮށް މަރާލާފައިވާ ކަމުގެ އަޑުތައް ރޭގެ ވަގުތެއްގައި ގަދަވުމުން އެކަމާ ގުޅިގެން ނޫސްވެރިން ކުރި ސުވާލަށް ޖަވާބު ދެމުން ފުލުހުން ބުނެފައިވަނީ އެފަދަކަމެއް ރިޕޯޓުކޮށްފައިވާ ނުވާ ކަމަށެވެ.

އެއާއެކު ނޫސްވެރިންވަނީ އެ ނޫން ގޮތަކަށްވެސް ނޭޕާލުގެ ރައްޔިތަކު މަރުވެ މޯޗަރީގައި ހަށިގަނޑު އޮތްކަން އެނގިފައިވޭތޯ ފުލުހުންނާ ސުވާލުކޮށްފައެވެ. އެ ސުވާލުގައި ޖަވާބުގައި ފުލުހުން ރޭ ބުނީ މައުލޫމާތު ސާފުކުރުމަށް ފަހު ޖަވާބު ދޭނެކަމަށެވެ.

އެގޮތުން މިއަދު އެ ސުވާލަށް ޖަވާބު ދެމުން ފުލުހުން ހާމަކޮށްފައިވާ ގޮތުގައި އައިޖީއެމްއެޗް އީއާރަށް އުމުރުން 25 އަހަރުގެ ނޭޕާލު އަންހެނަކު މިދިޔަ ނޮވެމްބަރު މަހުގެ 9 ވަނަ ދުވަހު ގެންދިޔަކަމަށް ރިޕޯޓް ކޮށްފައިވާ ކަމަށެވެ. އޭނާ ހޮސްޕިޓަލަށް ގެންދިޔައީ ބަނޑެއްގައި ރިއްސާތީ ކަމަށާ ނަމަވެސް ހޮސްޕިޓަލަށް ގެންދިޔަ މަގުމަތީގައި އޭނާގެ ޚަބަރު ހުސްވިކަމަށް ވެސް ފުލުހުން މައުލޫމާތު ދީފައިވެއެވެ.

މެޑިކޯ ލީގަލް ރިޕޯޓާ ހަވާލާދީ ފުލުހުން ބުނީ، ކަންޗަން ދޫގެލް ނަމަކަށް ކިޔާ އެމީހާ މަރުވި ސަބަބު މިހާތަނަށް ނޭނގޭ ކަމަށެވެ. އެ ރިޕޯޓްގައި މަރުވި ސަބަބު ވަނީ "އަންނޯން" ކަމަށް ބަޔާން ކޮށްފައެވެ. އަދި އެ ރިޕޯޓްގައި ޖިންސީ އަނިޔާއެއް ލިބިފައިވާކަން އެއްވެސް މިންވަރަކަށް ފާހަގަ ކޮށްފައިނުވާ ކަމަށް ވެސް ފުލުހުން ބުނެއެވެ.

ކަންޗަން އަކީ ލޭގައި ހުންނަ މާއްދާއެއް ކަމަށްވާ ރޭޑް ބްލަޑް ސެލްސް މަދުވެ، އޮކްސިޖަން ލިބުމަށް ދަތިވާ ބައްޔެއް ކަމަށްވާ "އެނީމިއާ"ގެ ރެކޯޑް އޮންނަ މީހެއް ކަމަށް ފުލުހުން ބުނެ އެވެ.

އިތުރަށް ފުލުހުން ބުނީ، އެ ޒުވާނާގެ ހަށިގަނޑު މޯޗަރީއަށް ގެންގޮސްފައިވަނީ ފުލުހުންގެ ހަވާލުގައި ކަމަށެވެ. މޯޗަރީ ގައި ހަށިގަނޑާ ސްޕޮންސާގެ ފަރާތުން ހަވާލުވެފައި ނުވާތީ ކަމަށް ވެސް ފުލުހުން ބުންޏެވެ.