އުސޫލުން ބޭރުން، އެޗްޑީސީގެ ކުރީގެ އެމްޑީ ފަޒުލް ރަޝީދުގެ ބޭބެ، ފަޒީލް ރަޝީދަށް ހުޅުމާލެއިން ބިމެއް ދިން މައްސަލަ ފެންމަތިުވެ، މައްސަލައިގައި ހިންގަމުންދާ ކަމަށް ބުނާ ޖިނާއީ ތަހުގީގުގެ ތެރެއިން އެ ގެ ބަލާ ފާސްކުރަމުން ފުލުހުން ދިޔަ ވަގުތުގައި، ފަޒުލްގެ ބޭބެ ފަޒީލު ރަޝީދު، ވަގަށް " ކަޅު" ދަބަހެއް ގެއިން ބޭރު ކުރާ މަންޒަރު ފެންނަ ވީޑިއޯއެއް އާންމުވެއްޖެއެވެ.

އެޗްޑީސީގެ ތެރެއިން ލިޔުންތަކެއް ފޯޖު ކޮށްގެން ފަޒީލުއަށް ބިމެއް ދިންކަން ފަޅާއެރީ އާންމު ފަރާތަކުން ސޯޝަލް މީޑިޔަގައި އާންމުކުރި ލިޔެކިޔުންތަކަކުންނެވެ. އެއާއެކު ފުލުހުން އެ މައްސަލަ ތަހގީގުކުރަން ފެށީކަން ހާމަކޮށް، އޭގެ އެތައް ދުވަހެއް ފަހުން ކޯޓު އަމުރެއްގެ ދަށޫން ފަޒުލްގެ ގެ، މ. ޒޭވަރު ބަލާ ފާސްކޮށްފައިވެއެވެ.

ބަލާ ފާސްކުރުން ކުރިއަށް ދިޔަ ވަގުތު، ފަޒުލްގެ ބޭބެ ފަޒީލު ވަނީ އޭނާ ދިރިއުޅޭ ބައިކަމަށް ބެލެވޭ ބައިން ވަރަށް ސިއްރުން ސިޑިން ފައިބައިގެން ދަބަހެއް ގެއިން ބޭރުކޮށްފައެވެ.

ސޯޝަލް މީޑިޔާގައި އާންމުވެފައިވަ ވީޑިއޯއިން ފެންނަ ގޮތުގައި، ފަޒުލްގެ ބޭބެ ފަޒީލް، އެ ދެބެއިންވެސް ދިރިއުޅެމުންދާ ގެކަމުގައިވާ މ. ޒޭވަރުގޭގެ ބެލްކަނީގައި ފޯނެއްގައި ހުރެ ދެކޮޅަށް ހިނގައެވެ. އެއަށްފަހު ގޭތެރެއަށް ވަދެ ސިޑިން މައްޗަށް އަރައެވެ. ދެން ފެންނަނީ އޭނާ ސިޑިން ފައިބައިގެންގޮސް ގޭގެ ދޮރުން ނުކުންނަމުން ވަރަށް ސިއްރުން ދެކޮޅު ބަލާލުމަށްފަހު ކަޅު ދަބަހެއް ހިފައިގެން ނުކުމެގެން ދާ މަންޒަރެވެ.

ފެންނަ ފެނުމަށް އޭނާގެ އަތުގައި އޮތީ ލެޕްޓޮޕް ދަބަހެކެވެ. އޭގެ ފަހުން ހުދު ގަމީހެއް ލާފައި ހުރި މީހަކު ގެއަށް ވަންނަ މަންޒަރުވެސް ފެނެއެވެ. ވީޑިއޯ ޕޯސްޓްކުރި ފަރާތުން ބުނީ އެއީ ފަޒީލް އެނބުރި ގެއަށް ވަންނަ މަންޒަރުކަމަށެވެ. ނަމަވެސް އޭނާގެ އަތުގައި އޭރު ނެރުނު ދަބަހެއް ނެތެވެ.

މިފަދަ ކަމެއް ހިނގާފައިވާއިރު މައްސަލަ ތަހުގީގުކުރަން ފެށިކަން ހާމަކުރި ފަހުންވެސް 4 ވަރަކަށް ދުވަސް ފާއިތުވެގެން ދިޔައިރުވެސް ފުލުހުން އެމީހުންގެ މުއާސަތީ އެއްވެސް ވަސީލަތެއް ސީޒުކޮށްފައި ނުވުމަކީ ހެކި ނައްތާލަން އެމީހުންނަށް ދިން ފުރުސަތެއްގެ ގޮތުގައި ރައީސް އަބްދުﷲ ޔާމީން ފާހަގަކުރައްވާ އެކަމާ މެދު ސުވާލުއުފައްދަވާފައިވެއެވެ.

ރައީސް ޔާމީން ވިދާޅުވީ ހެޔޮ ނިޔަތުގައި ތަހުގީގުކުރާ ނަމަ ފަޒުލްވެސް ހުންނަން ވާނީ މިހާރު ބަންދުކޮށްފައި ކަމަށެވެ.

ރައީސް މުހައްމަދު މުއިއްޒުގެ އެންމެ އަރިސް ބޭފުޅުންގެ ތެރޭގައި ހިމެނޭ ކަމަށްވާ ފަޒުލް ވަނީ އޭނާގެ މައްޗަށް ކުރެވުނު ތުހުމަތުތަކާ ގުޅިގެން ސަސްޕެންޑްކޮށްފައި ހުއްޓާ، އިސްތިއުފާދީފައެވެ.

ގިން ބަޔަކު ގަބޫލުކުރާ ގޮތުގައި ސަރުކާރުގެ ތެރެއިން ބޮޑެތި ވައްކަންތައް ކުރަނީ ރައީސް މުއިއްޒުއަށް ވެސް އެކަމުގެ މައުލޫމާތު އެނގި ހުންނަވައިގެންނެވެ.