ރާއްޖޭގައި ޗުއްޓީ ހޭދަކުރަމުންދިޔަ ޖަޕާނުގެ މަޖިލިސް މެންބަރަކު ނިޔާވެއްޖެ އެވެ.

ފުލުހުން ބުނީ ޅ. އަތޮޅުގައި ހިންގާ ރިސޯޓެއްގައި ޗުއްޓީ ހޭދަ ކުރަމުންދިޔަ ޖަޕާނުގެ ފިރިހެން ފަތުރުވެރިޔަކު ސްނޯކްލިންއަށް ގޮސް އުޅެނިކޮށް މޫދުގައި މަރުވެފައި އޮތް ކަމުގެ ރިޕޯޓު އިއްޔެ 08:33 ހާއިރު ލިބުނު ކަމަށެވެ.

ނަމަވެސް އެއީ ކާކުކަން ފުލުހުން ހާމައެއް ނުކުރެ އެވެ.

އުމުރުން 70 އަހަރުގެ މަޖިލިސް މެންބަރު ރާއްޖޭގައި މަރުވެފައިވާ ކަމަށް ޖަޕާންގެ ބައެއް ނޫސްތަކުގައިވެސް ރިޕޯޓްކޮށްފައިވެ އެވެ.

ޓޮޝިޔުކި އަޑާޗި ނިސްބަތްވަނީ ޖަޕާންގައި ވެރިކަން ކުރާ ލިބަރަލް ޑިމޮކްރެޓިކް ޕާޓީ (އެލްޑީޕީ) އަށެވެ.

ޖަޕާންގެ ގާނޫނު ހަދާ މަޖިލީހުގެ މެންބަރަކު ރާއްޖޭގައި މަރުވި މައްސަލައިގައި ދިވެހި ސަރުކާރުގެ އެއްވެސް އިދާރާއަކުން އަދި އެއްވެސް އެއްޗެއް ނުބުނެ އެވެ.