ރައްޔިތުންގެ ކުންފުނިތައް ދަވާލާއިރު އެކަން ބަލާނެ ވެރިންތަކެއް މިއަދު ނެތުމުން ޕީޕަލްސް ނެޝަނަލް ފްރޮންޓް (ޕީއެންއެފް)ގެ ސެކެރެޓަރީ ޖެނެރަލް މުހައްމަދު މަލީހު ޖަމާލުގެ ނުރުހުން ސަރުކާރުގެ ވެރިންނަށް އަމާޒުކުރައްވައިފިއެވެ.

މަލީހުގެ ނުރުހުމާ ފާޑުކިޔުން އަމާޒުކުރައްވާފައިވަނީ އެކްސްގައި ކުރެއްވި ޕޯސްޓެއްގައެވެ.

ރައްޔިތުންގެ ކުންފުނިތައް ދަވާލާ ހުސްކޮށްލާއިރު އެކަން ބަލާނެ ފަރާތެެއް ސަރުކާރުގައި ނެތްކަމަށާ ފިނޭންސް މިނިސްޓްރީ އޮތީ ގަދަ ނިދީގައި ކަަމަށް ވެސް މަލީހު ވަނީ ވިދާޅުވެފައެވެ.

މީގެ އިތުރުން މިހާރު ސަރުކާރު ތެރެއިން ކުރަމުންދާ ގިނަ ވައްކަންތަކަކީ އެސްއޯއީތަކުގެ ތެރެއިން ހިންގަމުން ގެންދާ ޖަރީމާތަކަކެއްކައި ހާމަވަމުންދާއިރުވެސް އެ ކުންފުނިތަކުގެ ބެލެނިވެރި ފަރާތްކަމުގައިވާ ޕީސީބީ ވެސް އޮތީ ހިމޭނުން ކަމަށާ އަދި ކެޕިޓަލް މާކެޓު ޑިވެލޮޕްމަންޓު އޮތޯރިޓީ (ސީއެމްޑީއޭ)އަކީ އޮންނަ ތަނެއްކަންވެސް ނޭނގޭ ކަމަށް ވިދާޅުވެ މަލީހުވަނީ ސަރުކާރުގެ އެކި ދާއިރާތަކުގެ ބެލެނިވެރި ފަރާތްތަކާ މެދުވެސް ނުރުހުންފާޅުކުރައްވާފައެވެ.

ހަމައެހެންމެ އެންޓި ކޮރަޕްޝަން ކޮމިޝަން (އޭސީސީ)ގެ މެމްބަރުން ތިބީ ވަޒީފާ ދިފާޢުކުރުމުގައި އވަދިނެތި ކަމަށާ އޯޑިޓް އޮފީހުގެ ވެސް ހިލަމެތް، ގައުމުގައި ބޮޑެތި ވައްކަންތައް ކޮށް ކުންފުނިތައް ދަވަމުންދާއިރުވެސް ނެތުމުން މަލީހު ވަނީ ފާޑުވިދާޅުވެފައެވެ. އަދި، އަދުގެ ވެރިން ޤައުމު ކައި ހުސްކުރާކަން ރައްޔިތުންނަށް ސާފު ކަމަށްވެސް މަލީހު ވަނީ ފާހަގަކުރައްވާފައެވެ.

މަލީހު މިފަދައިން ފާހަގަކުރައްވާފައި ވާއިރު، ކުންފުނިތަކުން މަހަކު ވަކިވަރެއް ރައީސް ދިރިއުޅުއްވާ ގެކޮޅަށް ކޮންމެ ކުންފުންޏަކުންވެސް މަހުގެ ވަކި ތާރީކެއްގެ ކުރިން ހަވާލުކުރަން އަންގާފައި އޮންނަކަމަށް އަޑުތައް ގަދަވެފައިވެއެވެ. އަދި ދާދި ފަހުންވަނީ ސަރުކާރުގެ ކުންފުނިތަކުން ރައްޔިތުންގެ ފައިސާ، ރައީސް މުއިއްޒު ޕްރޮމޯޓުކުރުމަށް ޚަރަދުކުރާކަން ފަޅާއަރާފައެވެ. ނަމަވެސް ސަރުކާރުން އެފަދަ ކަންކަން އޮއްބާލަން މަސައްކަތްކުރަމުންދާ ކަމުގެ ތުހުމަތު އަމާޒުވެފައިވެއެވެ.