ހަގީގަތަކީ ފާޅުގައި އޮތަސް ނުފެންނަ އެއްޗެކެވެ. ލޮލު ކުރިމަތީ ހަގީގަތް އޮތަސް ގިނަ ފަހަރު ގަބޫލުކުރެވެނީ ޖޯލިފަތިތަކުގަޔާ ހޮޅުއަށިތަކުގައި ދެކެވޭ ވާހަކަތަކެވެ. މިއީ ދުނިޔޭގެ އާދައެވެ. ވާނީވެސް އެހެންތާއެވެ. ބުންޏޭ ބުންޏޭ ނުބުނަނީހެން ހަގީގަތް ހަގީގަތަކަށް ނުވެއެވެ.

ހަގީގަތެއް ހާމަކޮށްލަން މިލިބުނު ފުރުސަތުގައި ހާމަކުރާނީ ކޮން ހަގީގަތެއްބާއޭވެސް ހިތައްއަރައެވެ. ދިވެހިރާއްޖޭގައި އޮތީ މުޅިންވެސް ހާމަކުރަންޖެހޭ ހަގީގަތްތަކެވެ.

ފާޅުގައި އޮތް ބޮޑު އެއް ހަގީގަތަކަށް އަލިއަޅުވާލާނަމެވެ. ރައީސް އަބްދުﷲ ޔާމީން އަބްދުލްގައްޔޫމް ދިވެހިރާއްޖެ އަށް ގެނެސްދެއްވި ތަރައްގީ އަކީ މިއިން ދުވަހަކު މީހަކު ހިތަށްވެސް އަރުވާލި ވަރުގެ ތަރައްޤީއެއް ނޫނެވެ. ދެ ރަށް ގުޅުވާލީ ބޮޑު ބްރިޖަކުންނެވެ. އިމާރާތެއް ހިއްލާލީ 25 ބުރިއަށެވެ. މަގުތައް ހެއްދެވީ ފެންވަރުގައެވެ. ވެރިކަން ކުރެއްވީ ރައްޔިތުންގެ ހައްގުގައެވެ. ގައުމު އިސްކުރައްވައިގެންނެވެ. ދީން ހިމާޔަތްކުރައްވައިގެންނެވެ. މިވަރުގެ ވެރިޔަކާ ދިމާނުވާނެކަމުގެ ޔަގީންކަން އަޅުގަނޑު ދޭނަމެވެ. މި ހަގީގަތް ފޮރުވާލާނީ ކާކުހެއްޔެވެ! މި ހަގީގަތް ފޮރުވޭނެ ބާއެވެ.

ދިވެހިރާއްޖެ ދުށް އެންމެ ވަރުގަދަ އެއް ޝަހުސިއްޔަތު މިއަދު އެ ހުންނެވީ "ހަރާން" ހުކުމެއްގައެވެ. މިއީ އެއްވެސް އިންސާފެއްތޯއެވެ. ދޮގު ބުހުތާނު އިލްޒާމްތައް އެމަނިކުފާނުގެ އިސްތަށިފުޅުގައި އަޅުއްވާ ޖަލު ހުކުމެއް އިއްވީ ކުރީގެ ރައީސް އިބްރާހިމް މުހައްމަދު ޞާލިހްގެ ފިނޑިކަމުންނެވެ. އެއީވެސް ބޮޑު ހަގީގަތެކެވެ. އިންތިޚާބަކުން މޮޅުވުމަށްޓަކައި އިދިކޮޅުގެ އެންމެ ވަރުގަދަ ލީޑަރު ބަންދުގައި ބަހައްޓައިން މޮޅުވަން ނިންމީ އިބޫ ގެ މޮޔަކަމުންނެވެ. ބަންދުގައި ބަހައްޓައިންވެސް އިބޫވީ ނާކާމިޔާބެވެ.

ދެން އޮތް ހަގީގަތަކީ ރައީސް ޔާމިންގެ އަރިހުން ދަރިވަރުވެ، އެމަނިކުފާނުގެ ޒައާމަތުގައި ހައުސިންގ މިނިސްޓަރުކަން ކުރެއްވި، އަދި މާލެ ސިޓީ ކައުންސިލްގެ މޭޔަރު ކަމުގައި އޭރު ހުންނެވި ފަރާތް އަދި އަދުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރިޔާސީ އިންތިޚާބުގައި ކުރީގެ ރައީސް އިބޫ ޞާލިހާ ވާދަކޮށްގެން ކާމިޔާބު ކުރެއްވިކަމެވެ. ހަގީގަތުގައި ކާމިޔާބު ކުރެވުނީ ރައީސް ޔާމީންގެ ފޮޓޯ ޕޯސްޓަރުގައި ހަރުކޮށްގެން ރައްޔިތުންގެ ކައިރިން އެމަނިކުފާނު މިނިވަންކޮށްދެއްވާނެކަމަށް ވައުދުވެވަޑައިގަތުމުންނެވެ.

މިކަންމިހެންއޮވެ، ވެރިކަމަށް ވަޑައިގެން ރައީސް މުއިއްޒު ވައުދާ ޚިލާފްވެ ރާގު ބަދަލުކޮށްލި މަންޒަރު ރާއްޖޭގެ ހުރިހާ ރައްޔިތުންނަށް ފެންނާނެއެވެ. މި ހަގީގަތް ވެސް އޮތީ ހާމައަށެވެ.

މިވާހަކަވެސް ދައްކާނެ މީހަކު ނުހުންނާނެއެވެ. އޭރުގައި ރައީސް ޔާމީން ވަރެއް ނެތެވެ. އެމަނިކުފާނުގެ ނަން އެބޭފުޅުންގެ ދުލު ކުރީގައި އަބަދު އިނދެއެވެ. މިހާރު ރައީސް ޔާމީނަށްވުރެ ވަޒީރުކަން ކުރުން މާމުހިންމެވެ. ދައުލަތުގެ ފައިސާ ކައިގެން ބަނޑު ފުރުން އެހާވެސް މުހިންމެވެ. ރައީސް ޔާމިން މިނިވަން ކުރަން ގޮވާލާކަށް ބޭނުމެެއްނުވެއެވެ.

މިއީވެސް ބަޔަކު މީހުން ނުދެއްކިޔަސް ހަމަ ހަގީގަތެވެ.

މީހުން ބުނާތީ އަޑު އަހަމެވެ. ހަގީގަތް އޮޅުވާލަން އެއްބަޔަކު އަބަދުވެސް ތިބޭނެއެވެ. ނަމަވެސް ހަގީގަތް ފަޅައި އަރާނީ އަރަންވީމައެވެ.