ކުރީގެ ސަރުކާރުން ގެދޮރުވެރިޔާ ސްކީމުގެ ދަށުން ދޫކޮށްފައިވާ ގޯއްޗާއި ފްލެޓްތައް ހިފަހައްޓައި، ނުދީފިނަމަ ރައީސް، ޑރ. މުހައްމަދު މުއިއްޒު ވެރިކަމުން ބާލާނެ ކަމަށް މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ވިދާޅުއްވެއްޖެއެވެ.

މަޖިލީހުގެ ގަލޮލޫ އުތުރު ދާއިރާގެ މެމްބަރު، އީވާ އަބްދުﷲ ހުށަހެޅި "ސަރުކާރުގެ ބޯހިޔާވަހިކަމުގެ ދަށުން މާލޭ ސަރަހައްދުން ފްލެޓް ލިބޭ ފަރާތްތަކަށް ވީހާވެސް އަވަހަށް ފްލެޓް ދޫކުރުމަށް" ގޯވަލައި ހުށަހެޅި މައްސަލައަށް ބަހުސް ކުރައްވަމުންނެވެ.

ނަމަވެސް ރައީސް މުއިއްޒު އުޅުއްވަނީ ގޯއްޗާއި ފްލެޓް ނުދޭން ކަމަށް ބޮންޑެ ތުހުމަތު ކުރެއްވިއެވެ. އަދި ފްލެޓްތައް އޭގެ ހައްގުވެރިންނަށް ނުދީފިމަ ރައީސް މުއިއްޒު ވެރިކަމުން ބާލާނެ ކަމަށް ބޮންޑެ ވަނީ ވިދާޅުވެ ރައީސަށް އިންޒާރުދެއްވާފައެވެ.

ބޮންޑެ ވިދާޅުވީ، ނަފްސާނީ މައްސަލަތަކާއި މަސްތުވާތަކެތީގެ މައްސަލަތަކުގެ އަސްލަކީ ދިރިއުޅެވޭނެ ތަނެއް ނެތުން ކަމަށާއި އެހެންކަމުން އެކަމަށް ހައްލެއް ހޯދަން ޖެހޭ ކަމަށެވެ.

އަދި މިހާރު ފްލެޓް މައްސަލަ އޮތް އެންޓި ކޮރަޕްޝަން ކޮމިޝަން (އޭސީސީ) އަކީ ކޮރަޕްޝަންގެ ކޮމިޝަނެއް ކަމަށާއި އެތަން އުވާލަން ޖެހޭ ކަމަށް ވެސް ޖަލްސާގައި ވާހަކަ ދައްކަވަމުން ބޮންޑެ ވަނީ ވިދާޅުވެފައެވެ.