ދިވެހި ސަރުކާރުގެ ގިނަ މުއައްސަސާތައް އޮތީ ރިފޯމުއަކަށް ބޭނުންވެ ރައްޔިތުންނަށް ފައިދާ ހުރި މަސައްކަތްތަކެއް ކޮށްދޭނެ ތަންތަނަށް ހަދަން ޖެހިފައެވެ.

ފަޒާގެ ވަށައިގެން އަޑު އިވެމުން ދަނީ މުއައްސަސާތަކުގެ ޚިދުމަތްތަކާ ގުޅޭގޮތުން ރައްޔިތުންގެ ޝަކުވާ ބޮނޑިތަކެވެ. ރައްޔިތުންގެ ފައިސާއިން މުސާރަ ނަގައިގެން ތިބެ ރައްޔިތުންނަށް ފައިދާވާނެ ކަމެއް ސަރުކާރުތަކުން ނުކުރާ ވާހަކައެވެ. ސަރުކާރުގެ ކޮންމެ ވެރިއަކުވެސް ބަލަނީ އަމިއްލަ ޖީބު ބޮޑުކޮށް އަމިއްލަ އަންބޮޑި ބާރަށް އައްސަން ކަަމަށެވެ.

އެހެންކަމުން ރައްޔިތުން ގޮވަމުންދަނީ ހެޔޮ ނުވާނެ އޭ މިތިބަ ބުރާންތިތަކާއޭ ޚަރަދުކުޑަކޮށް ވައްކަން މަދުކޮށް ކޮރަޕްޝަން ހިންދާލާ އަހަރުމެންނަށް ޚިދުމަތެއް ކޮށްދެވޭތޯ ބަލާށޭއެވެ.

ކަންކަން މިހެން ހުރިއިރު އަދުގެ ވެރިމީހާއަކީ މިހުރިހާ ކަމެއް ބަދަލުކުރާނެ ކަމުގެ ފެހި ސިގްނަލް ދެމުން އައި ބޭފުޅެކެވެ. ރައްޔިތުން މެނުވީ އިސްނުކުރާނެ ކަމަށާ ރައްޔިތުން އެދޭގޮތަކަށް މެނުވީ ރައްޔިތުންގެ ކަންކަން ނުހިންގާނެ ކަމަށްވެސް އަހުދާ ވައުދުވަމުން ވަޑައިގެންނެވި ބޭފުޅެކެވެ.

ނަމަވެސް އަހަރެއް ފާއިތުވެގެން ދިޔައިރު މުޅި ގައުމުގައި ވަނީ ސަރުކާރާ މެދު ނުރުހުން އިތުރުވެފައެވެ. ވެރިންނާ މެދު ރައްޔިތުންގެ ރުޅިގަނޑު އިންތިހާ ދަރަޖައަށް މައްޗަށް ގޮސްފައެވެ. ވާނީ ވެސް އެހެންތާއެވެ. ހައްދަވައިގެން ތެދެއް ނަހަދައެވެ. ނުވީތާކަށް ކަންކަން އެނގުމުން ވެސް އެކަންކަން ފޮރުވަން ވެސް ދޮގެވެ. ދޮގު މައްޗަށް ދޮގެވެ.

އަދި އެވަރުން ފުއްދާލަނީއެއް ނޫނެވެ. ރައްޔިތުންގެ ފައިސާއިންނާ ރައްޔިތުންގެ ޒާތީ މައުލޫމާތުން ވެސް ކުރަނީ ވައްކަމެވެ. މާސިންގާ ވައްކަމެވެ. އެގޮތުން ދާދި ފަހުން ތިލަވި އެއް ކަމަކީ ވެރިކަން ކުރާ ޕާޓީ ޕީއެންސީއަށް 1 ލައްކަ މެމްބަރުން ހަމަކުރަން ފެށި ބޮޑު ބިޔަ ކެމްޕެއިންގައިވެސް ކުރި ވައްކަމެވެ.

ޕީއެންސީއަށް މެމްބަރުން އިތުރުކުރުމަށް ކޮންމެ ވުޒާރާއަކަށާ ކޮންމެ ކުންފުންޏަކަށް ވަކި އަދަދަކަށް ފޯމު ފުރަން ހަވާލުކުރީ ސީދާ ރައީސް މުއިއްޒުގެ އެންގެވުމަށެވެ. ނަމަވެސް ފޯމުތައް ފުރަން ގޭގޭ ދޮށަށް ސަރުކާރު ތަމްސީލުކުރާ މެމްބަރުން ދިއުމުން ރައްޔިތުން ނުކުމެ ގޭގޭ ދޮރު ލައްޕަނީއެވެ. ނުވަތަ ފަހައިގަންނަނީއެވެ. ކަންކަން މި ދަރަޖައަށް ދިއުމުން ރައްޔިތުންނާ ކުރިމަތިލާން އެއްކަލަ މެމްބަރުންނަށް ނުކެރުނެވެ. ނަމަވެސް ރައީސް މުއިއްޒު ދެއްވާފައި އޮތް މުއްދަތައް ފޯމުތައް ފުރާ ހަމަކުރަން ޖެހެއެވެ. ނޫނީ މަގާމު ނުވަތަ ވަޒީފާ ގެއްލެއެވެ. އެހެންކަމުން ވަޒީފާގެ ދިފާއުގައި ވެރިމީހާ ރުއްސަން ޕީއެންސީގެ އެއްކަލަ މެމްބަރުންނަށް ޖެހުނީ ސިއްރު ކަންތައް ކުރަންށެވެ. ހަޑިކޮށް ބުނާ ނަމަ "ވައްކަން" ކުރާށެވެ. ވައްކަން ކުރުމަކީ ކޮންމެހެން ތަނެއް ފަޅައިގެން ބައިވަރު ލާރިތަކެއް ނެގުން އެކަންޏެއް ނޫނެވެ. އެގޮތުން މީހުންގެ ޒާތީ މައުލޫމާތުން ވައްކަންކޮށް އެ ރައްޔިތުންގެ ސޮޔާ އިނގިލީގެ ނިޝާން ފޯޖުކުރުމަކީ ގަނޫނީ ގޮތުންވެސް ކުށަކަށްވާއިރު މީހެއްގެ ހައްގަކަށްވެސް އެއޮތީ އެހާ ހިސާބުން އަރައިގަނެވިފައެވެ. ދައުވާކޮށް އެމީހާގެ ހައްގު ހޯދަން އެމީހަކަށް ދިއުމުގެ ދޮރުވެސް މިހާ ހިސާބުން ހުޅުވެއެވެ.

ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ދަފްތަރުގައި އެހެން ޕާޓީތަކުގެ މެމްބަރުންނަށް ވަގަށް އެމެމްބަރުން ހިމަނަމުންދާކަމުގެ ގިނަ ޝަކުވާތައް މިހާރު ވަނީ ގިނަވެފައެވެ. އާންމު މެމްބަރުންނަށް ނޭނގި އެމީހުން އެހެން ޕާޓީތަކަށް ވައްދަމުންދާއިރު މިކަން ބަލަން އޮތް މުއައްސަސާތައް އޮތީ ރައީސް މުއިއްޒުގެ މުށު ތެރޭގައި ކަމަށް ގިނަ ބަޔަކު ބުނެއެވެ. އެގޮތުން ޑީއެންއާރުގެ ބާރު އޮތީ ރައީސް މުއިއްޒު ފެކްޝަންގެ މިނިސްޓަރު އަލީ އިހުސާން އަތުގައި ކަމަށްވާއިރު އިލެކްޝަން ކޮމިޝަން ވެސް މިއަދު އޮތީ ސީދާ ރައީސް މުއިއްޒުގެ މުށުތެރޭގައެވެ.

އެހެންކަމުން މިކަންކަމަށް އިންސާފު ލިެބޭނެ ގޮތެއް ނެތި މިއަދު ރައްޔިތުން ތިބެން ޖެހެނީ މާޔޫސްވެފައެވެ. މިކަހަލަ ކޮންމެ ކަމެއް ފަޅާ އަރާ ފާޑުކިޔުން ބޮޑުވުމުން، އެހެންޏާ ވެސް ކަން ކުރާ ބީދައިން ސަރުކާރުން މިފަހަރުވެސް އޮތީ ހަނެވެ.

ވަގު ފޯމު ފުރައިގެން ޕީއެންސީގެ ދަފްތަރަށް މީހުން އިތުރުކުރަން ހުރި ދޮރުތައް ބަންދުކުރުމަށް އިލެކްޝަންސް ކޮމިޝަނަށް އާއްމުންނާއި އިދިކޮޅު ޕާޓީތަކުން ވެސް ދަނީ ގޮވަމުންނެވެ. ހަމައެހެންމެ، ސަރުކާރުގެ މުއައްސަސާތަކުގައި ރައްކާކޮށްފައި ހުރި އާންމު ރައްޔިތުންގެ ޒާތީ މައުލޫމާތު ބޭނުންކޮށްގެން ވެރިކަން ކުރާ ޕީއެންސީއަށް ފޯމު ފުރައި މެމްބަރޝިޕް އިތުރު ކުރަމުންދާ މައްސަލަ މީސްމީޑިއާގައި ވެސް ވަނީ ފެންމަތިވެފައެވެ.

ވެރިމީހާގެ ރުހުން ހޯދަން ވެސް ޕާޓީއަށް ވަގަށް މީހުން ވެއްދުން ގޯހެވެ. ހަމަ ވަރަށް ގޯހެވެ. އެއީ މީހެއްގެ ނުރުހުމުގައި އެމީހަކު ރޭޕުކުރުން ކަހަލަ ކަމެކެވެ.