ދިވެހީންގެރާއްޖެ، މިއީ ނުހަނު ފޮނި އުއްމީދުތަކާ އެކު ދިވެހީން ގެނައި ވެރިކަމެއްގެ ސްލޯގަންއެކެވެ. މަގްސަދަކީ ރައްޔިތުންގެ ބާރުވެރިކަން ގާއިމުކޮށް ރައްޔިތުންގެ ވެރިކަމެއް ބޭރުގެ ނުފޫޒުން އެއްކިބާކޮށް މި ގައުމުގައި ހިންގުމެވެ. ދުނިޔެއަށް ލޯހުޅުވިފައިވާ،ވަކި ބަޔަކަށް ބަރޯސާނުވާ، ތަރައްޤީވެފައިވާ ފުދުންތެރި މިނިވަން ދިވެހިރާއްޖެއަކީ އަބަދުވެސް ގައުމު ދެކެ ލޯބިވާ ހުރިހާ ދިވެހީންގެވެސް ހުވަފެނެކެވެ.

ނަމަވެސް ހެޔޮ ބަދަލަކަށް އެދިގެން ދިވެހި ރައްޔިތުން ހޮވި ޑރ މުހައްމަދު މުއިއްޒުގެ ސަރުކާރަށް 14 މަސް ވެ އޭގެ އިތުރުން އައު އަހރަަކށް މީލާދީ ސަނަތުން މަރުހަބާކީއިރު ފެންނަމުން ދަނީ މީސްމީޑިޔާގެ އެކި މަންސަތަކުގައި ސަރުކާރަށް ފާޑުކިޔާ، ނުރުހުން ފާޅުކޮށް ކޮށްފައިވާ ޕޯސްޓްތަކެވެ.

ވޯޓު އަޅައިގެން މުއިއްޒު ހޮވި ރައްޔިތުން އެކަމާ ހިތާމަކުރާ ވާހަކަ މިއަދު ދައްކަމުން އެދަނީ ލަދުވެތިކަމާއި އެކުގައެވެ. ރައްޔިތުންގެ އިހުސާސްތައް ނުދަންނަ ވެރިކަމަކީ ކޯއްޗެއްކަން ނޭގުނު ވެރިއެއް ރަސްކަމުގެ ތަޚުތަށް އިސްކުރެވުނީމައެވެ.

ދިވެހީންގެރާއްޖެ އެއް ހޯދައިދޭނެކަމުގެ ފޮނި ހުވަފެން ދައްކާ އެ ވައުދުވި ރާއްޖެ ވީ ހިސާބެއްވެސް ޚުދު މުއިއްޒަށް އެގިވަޑައިގަންނަވާހެން ހިޔެއްނުވެއެވެ. ރައްޔިތުންނަށް ލިބެމުންދިޔަ ސަބްސިޑީ ނުވަތަ އިނާޔަތްތައް ރިފޯމްކޮށް، ޓެކްސްއާއި ޑޮލަރުގެ ރޭޓް މަތިކޮށް ލިބޭ އެއްޗަކުން ރައްޔިތުން ދެކޮޅު ނުޖެހޭ ހިސާބަށް މުއިއްޒު ވަނީ ދިވެހި ރައްޔިތުން ގެންގޮސްފައެވެ.

ނިމިގެން ދިޔަ ސަރުކާރުގައި އިސްލާމްދީނަށް ފުރައްސަރަ ކުރުމުގެ ކަންތައްތައް ހާމަވެގެން ދިޔަ އިރު ކުރީ ސަރުކާރަށް އެކަމަށް އެންމެ ފާޑު ކިޔާ، އިސްލާމްދީނުގެ ހަމަތަކުގެ ބޭރުން ގައުމުގައި ކަންކަން ހިނގަމުންދާތީ އެކަމަށް އެންމެ ކަންބޮޑުވުން ފާޅު ކުރި އެއް ބަޔަކަށް މިއަދުގެ ވެރިކަމުގެ އިސްވެރިން ހިމެނެއެވެ. ތިމަންނާ މެންނަށް ވެރިކަން ލިބޭ ދުވަހަކުން "އިސްލާމީ ޝަރީއަތެއް" ގާއިމުކުރައްވާނެ ކަމުގެ ފޮނި ވާހަކަތައް ދައްކާ ދީނުގެ ނަމުގައި ރައްޔިތުންގެ ވޯޓު ހޯދާ މިއަދު މިވަނީ ދިވެހިންގެ ދީނީ މިނިވަންކަން ސަމޯއާ އެގްރިމަންޓަކާ އެކު އަޅުވެތިކޮށް ނިންމައިފިއެވެ.

ފެންނަނީ ކަނޑުގެ ރާޅު ބާނީ ގަދަވެ އޮޑި ކަނޑަށް ނުކަތައިގެން އުޅޭ މަންޒަރެވެ. ލޯނާ ދަރަނީގެ ބިޔަ ރާޅުތަކުގެ ތެރޭގައި ދިވެހީންގެ މާލިމީއަށް ހުންގާނުގައި ފަރިތަކަމާއެކު ހިފަހައްޓާ ނުލެވިގެން އުޅޭ މަންޒަރެވެ. ފަޅުވެރިންގެ ނުހަނު ބުރަ މަސައްކަތުންވެސް ހުންގާނު ސީދާކޮށްނުލެވިގެން އުޅޭ މަންޒަރެވެ. ބާރަށް ފޮނު އަރުވާލާ ނުދުއްވިގެން އުޅޭ މަންޒަރެވެ.

ރިޔާސީ އިންތިހާބުގައި ވީ ވައުދުތަކަކީ ކަދުރު ރުކަށް އެރި މީހާގެ ނަދުރަށްވެއްޖެއެވެ. ފެން ނެތް ބޮޑެތި ކާށިތައް ބިނދެ ރައްޔިތުންނަށް ދެއްކީ ދަޅައެއްކަން މިހާރު ހާމަވާން ފަށައިފިއެވެ.

ތަކެތީގެ އަގު ދުވަހެއް ދުވަހަކަށް އިންތިހާއަށް އުފުލެމުން ދަނީއެވެ. "ރައީސް މީހާގެ އަނގައިން" ޑޮލަރުގެ އަގު ތިރި ކުރިނަމަވެސް ޑޮލަރުގެ އަގު ހުރީ އަތް ނުފޯރާ ފަށުގައެވެ. ސަރުކާރަށް ޚަރަދުތައް މެނޭޖުނުކުރެވުމުން ރައްޔިތުންގެ މުސާރައިން ކުޑަކޮށް އެ ރައްޔިތުން ބިކަ ކުރަނިއެވެ. ކުންފުނިތަކާއި ކަންމަތީ ފިހާރަތައް އިނދަޖެހެނީއެވެ. އޯޓީތައް ލިމިޓްކޮށް ކުންފުނިތަކުން ބަރާބަރަށް ދެމުން އައި ބޯނަސްތައް މުއްދަތެއްނެތި ފަސްކޮށްފިއެވެ.

ކުރީގެ ސަރުކާރުންފެށި މުސާރަ އެއްހަމަ ކުރުމުގެ ސިޔާސަތު ހުއްޓާލައި ސިވިލް ސަރވިސް މުވައްޒަފުންގެ މުސާރަތައް ހަމަހަމަ ކުރާނޭ ދުވަހެއްވެސް އެނގޭނޭ މީހަކު ނެތެވެ. ކަރަންޓާއި ފެންބިލު ހުރީ ދިމާ މައްޗަށެވެ. އާއްމު މީހާއަށް ޝަކުވާ ކުރެވުން ނޫން ގޮތެއް ނެތެވެ.

ދިވެހި ތާރީޚުން މިކަންކަން ހެކިދޭއިރު މިހާރުގެ ރައީސުލްޖުމްހޫރިއްޔާއަކީ ދިވެހިރާއްޖޭގެ ގާނޫނީ ހަމަތަކާ ނުހަނު ރައްޓެހި ބޭފުޅަކަށްވާނެއެވެ. ބައްޕާފުޅަކީ ރާއްޖެއަށް އެ ދާއިރާއިން ނުހަނު ގިނަ ހިދުމަތްތަކެއް ކޮށްދެއްވި ބޭފުޅަކަށް ވެސް ވުމުންނާ އެކުއެވެ. އެހެންކަމުން ރައްޔިތުންގެ ހައްގުތަކަށް ރައްކާތެރިވުމާއެކު ރައްޔިތުންގެ ވެރިކަމެއް ކޮށްދޭން ޖެހޭކަން ބައްޕާފުޅުގެ ފޮތުންވެސް އެނގެން އޮތުމުންނާވެސް އެކުއެވެ. ބާރުތައް މުށުތެރެއަށް ލުމަކީ މިހާރު ރާއްޖޭގައި އޮތް ޑިމޮކްރެޓިކު ވެރިކަމުގައި އައްޗިކަމެއްކަން އެނގެންވާނެތީއެވެ.

ކޮންމެ އަކަސް ރައީސް މުހައްމަދު މުއިއްޒުގެ ވެރިކަމަށް އަހަރެއް ވެގެން ދިޔައިރު، ރައްޔިތުން ބުނަނީ މިއީ ހަމަ ނުމޮށޭ ގުރައެއްގެ ވެރިކަމެއް ކަމަށެވެ. އެހެން ބުނާ ސަބަބަށް ބަލާއިރު އެއީ ރައީސް މުއިއްޒުއަކީ ނުހަނު މަޑުން ހުންނަވާ ބޭފުޅަކަށްވެމެ ނަމަވެސް އެމަނިކުފާނު އަމަލުފުޅުން ފެންނަނީ ނިންމާ ނިންމުންތަކުގެ މަކަރުވެރިކަން ކަމަށް ވުމުންނެވެ.

އެގޮތުން ތިން ބާރު ވަކިވެފައި އޮތް މި ވެރިކަމުގެ ނިޒާމުގެ ތެރެއިން ވެރިކަން ކުރަން ހުވާކުރައްވައިގެން ހުންނަވާ ރައީސް މުއިއްޒު ގެންދަވަނީ ހުވަޔާ ޚިލާފުވެވަޑައިގެން މަޑު މަޑުން ހިޔަޅުވެރި ރޭވުމުގެ ތެރެއިން، މަޖިލީހުގެ ސުޕަރ މެޖޯރިޓީގެ ބޭނުން ނަހަމަ ގޮތުގައި ހިފާ ބޭނުން ގޮތަގޮތަށް ގާނޫނާ ގަވާއިދުތައް ބަދަލުކޮށް އުފަންކޮށް ހުރިހާ ބާރުތަކެއް މުށުތެރެއަށްލާ ބާރުކުރަން މަޅި ޖަހަމުންނެވެ.

މެމްބަރުންނަށް ރިޝްވަތުދީ މެމްބަރުން ގަނެ ހިންގަމުން ދަނީ ހުތުރު ޖަރީމާއެކެވެ. މިނިވަން މުއައްސަސާތަކުގެ މިނިވަންކަން ކަނޑުވާލަން މަޅި ޖަހަނީއެވެ. މިހުރިހާ ކަމެއް މި ކުރަނީ އަހަރެއްވީއިރު ރައްޔިތުންގެ އިތުބާރު ވެރިކަމާ މެދު ގެއްލި ރައީސް މުއިއްޒަށް ވެރިކަމުގައި ދެމިހުރުމުގެ ބިރު އޮތުމުން ކަމަށް ރަށު ތެރޭ އަޑު ގަދަވެފައިވެއެވެ.

ފްލެޓްވެރިން މުޒާހަރާ ކުރާ މަންޒަރާއި، ޓެކްސީ ޑްރައިވަރުންގެ މުޒާހަރާ އާއި، މަސްވެރިން މުޒާހަރާ ކުރާ މަންޒަރާއި، ރޭސްކާރު ދުއްވާ ކުދިންގެ މުޒާހަރާ ކުރާ މަންޒަރާއި ސައިކަލު ޓޯކުރާތީ މުޒާހަރާ ކުރާ މަންޒަރާއި ކަރަންޓު ބިލު ބޮޑުވެގެން ރައްޔިތުން މުޒާހަރާ ކުރާ މަންޒަރާ ސްކޫލުތައް އޭސީކުރަން ބެލެނިވެރިން އަތުން ފައިސާ ނަގާތީ މުޒާހަރާ ކުރާ މަންޒަރާ ވިޔަފާރިވެރިންނަށް ސަރުކާރުން ދޭން ހުރި ފައިސާ ނުދީގެން އެމީހުން މުޒާހަރާ ކުރާ މަންޒަރާ އަގަޔާ އަތާ ދިމާނުވާއިރުވެސް ޖީއެސްޓީ ބޮޑުކުރުމުން ރައްޔިތުން ނުުރހުން ފާޅުކުރާ މަންޒަރާ، ބޭރުގައި ކިަޔވާ ކުދިންނަށް ޑޮލަރު ކޮޅު ނުލިބިގެން މުޒާހަރާ ކުރާ މަންޒަރާ މިހެން ގޮސް ކިޔާފައި ނުކިޔާނެ ކަމެއް ނެތެވެ. ހުސް މުޒާހަރާއެވެ.

ގައުމުގައި ނަޒަހަރު ހިންގާލި ކޮންމެ ދިމާއަކުން ފެންނަނީ މާޔޫސްވެފައި ތިބި ރައްޔިތުންނެވެ. އުއްމީދު ގެއްލި މޮޅިވެރިކަމުގެ ސާލެއް ދެމިފައި އޮތް ގައުމެކެވެ. ބަނަކަމާ އަނދިރިކަމުގެ ތެރެއަށް ގައުމުގެ މުސްތަގުބަލު ދަތުރުކުރާ މަންޒަރެވެ. ދިވެހީންގެ ރާއްޖެ ބީވެ މުޒާހަރާ ރާއްޖެއަކަށް ބަދަލުވެ މުޅި ގައުމުގައި ސަރުކާރުގެ ނާގާބިލު ވާހަކައެވެ. 2024 ވަނަ އަަހަރުވެގެން ދިޔައީ ރައްޔިތުން ނުހަނު ފޮނި އުއްމީދުން ގެނައި ސަރުކާރުން ނާއުއްމީދަށް ވާސިލުކުރި އަހަރަކަށެވެ.