ޖުމްހޫރީ މައިދާނުގައި ހުންނަ ދިވެހި ދިދައިގެ ހިޔަލުގައި ހުންނަވާ ރައީސުލްޖުމްހޫރިއްޔާގެ މަގާމުގެ ހުވާ ކުރެއްވުމަށް ފަހު ދެއްވި ހިތޯބުގައި ޑރ. މުހައްމަދު މުއިއްޒު ވަނީ އެ މަނިކުފާނުގެ ހިތުގައި ގައުމަށް އޮތް ލޯބި ވަރަށް ބޮޑަށް ދައްކުވައި ދެއްވަން މަސައްކަތް ކުރައްވާފަ އެވެ. ދިވެހި ޖުމްހޫރީ ހަޔާތުގެ ހައިބަތު ދައްކުވައިދޭ ރައީސް ހުވައިކުރެއްވުމުގެ "ދަރުބާރު" އަށް ހާޒިރުވެވަޑައިގެން ތިއްބެވި އެންމެންނަށް ޑރ. މުއިއްޒު ދައުވަތު ދެއްވީ ދިވެހި ގައުމީ ބޮޑު ދިދަޔަށް ބައްލަވައިލަ ދެއްވުމަށެވެ.

އެއަށް ފަހު، އެ މަނިކުފާނު އިސް އުފުއްލަވައި ބެއްލެވީ ދިވެހި ޖައްވުގައި އެވަގުތު މިނިވަންކަމާ އެކު ވިހުރެމުން ދިޔަ، ޖުމްހޫރީ މައިދާނުގައި ހުރި ދިވެހި ގައުމީ ދިދަ އަށެވެ. ދެން ވިދާޅުވީ މި ވަގުތު އެ ޝަރަފުވެރި ދިވެހި ދިދަ އަޅުގަނޑުމެންނާ އެބަ މުހާތަބު ކުރާ ކަމަށެވެ. އެއީ، މިނިވަންކަމުގެ ދިދަ ކަމަށާއި އެކަން ދައްކައިދިނުމަށްޓަކައި، އަތްވާއި ވާރޭގައި، ރެޔާއިދުވާލު އެ ދިދަ ވިހުރޭ ކަމަށާއި، އެކަމުން ބުނެދެނީ، މިނިވަންކަން ދެމެހެއްޓުމުގައި ކުރަންޖެހޭ ހިތްވަރާއި، ބަހައްޓަންޖެހޭ ސާބިތުކަމުގެ ވާހަކަ ކަމަށް މުއިއްޒު އެދުވަހު ވިދާޅުވި އެވެ.

ކޮންމެ އަކަސް ދިވެހީންގެ ހަގީގީ ގައުމީ ސިފަތަކުން "ދިވެހި ދިދަ" ގުޅިލާމެއްސެވި، މި ރީތި ތަގުރީރަށް ގިނަ ދިވެހިން އެދުވަހު ތައުރީފުކުރި އެވެ. ބައެއް މީހުން ބުނި ގޮތުގައި، އެ ތަގުރީރަކީ ގައުމީ ލޯބި އުތުރި، އެރުވި ތަގުރީރެކެވެ. އަދި ދިވެހި ބަހުގެ މުއްސަނދިކަން ދެއްކި، ނަމޫނާ އަދި އަސަރުގަދަ ތަގުރީރެކެވެ. ހުދު އަޅުގަނޑުގެ ލޮލުން ވެސް ގައުމީ ކަރުނައިގެ ފެން ހިލުވާލި އެވެ. ރޮއްވާލި އެވެ.

ދިވެހީންގެ ވަތަނީ ބަސްމަގު ވަރަށް ފުރިހަމައަށް ދައްކުވައި ދެއްވި އެ ތަގުރީރަށް އަހަރެއް މާޒީ ވީ އެވެ. މިއަދު އެ ތަގުރީރު "ވައި" ވެއްޖެ އެވެ. ރައީސް މުއިއްޒު އެދުވަހު "ސުރުހީ" އެޅުއްވި، އިހު ދިވެހި ކާބަފައިންގެ ގައުމިއްޔަތު އަންނަން އޮތް ޖީލުތަަކަށް ރައްދުކޮށްދިން ފަދައިން މިއަދު އެޒިންމާ އުފުއްލަވަން މުއިއްޒު އަކަށް ކެރިވަޑައެއް ނުގަތެވެ. އެކަން ކުރައްވަން މިއަދު މުއިއްޒު އެ ހަވާލުކުރެއްވީ ރައީސް ސޯލިހު ފަދައިން މޯދީ އަށެވެ.

މިކަން މިގޮތަށް ވުމަށް ރައީސް މުއިއްޒު އަށް ވެސް ޖެހުނު ހާލަކީ ރައީސް ސޯލިހު ފަދައިން "ހިތު ލޯބި" އެއްކިބާ ކޮށް މީހުން ލިޔެދޭ އެއްޗެހި ކިޔަން އުޅުމެވެ. ބަހަވީ ފަންނުތަކާ، ޅެންވެރިކަމާ، ލިޔުންތެރިކަމަށް މޮޅު މީހަކު ލިޔެދިން އެއްޗެއް ބަލައިގެން ކިޔުމަކުން އަދި ގައުމީ ރޫހެއް ޖޯޝެއް ވެރިއެއްގެ ހިތުގައި އަށަ ނުގަންނާނެ އެވެ. މިލޮބުވެތި ފަސްގަނޑުގެ މިނިވަންކަމަށްޓަކައި، ދިވެހި ދިދައިގެ ފަހުރާއި ޝަރަފަށްޓަކައި، ދިވެހިން ވެފައިވާ މަތިވެރި ގުރުބާނީގެ ރަމްޒު ދައްކުވައިދެއްވި މިފަދަ ތަގުރީރެއް 100 ފަހަރަށް ވިދާޅުވިޔަސް ރައީސް ސޯލިހު އާއި ރައީސް މުއިއްޒުގެ ހިތުގައި ފެނިލުމުން ދިވެހި ދިދަ ވިހުރިލާ، ޖޯޝުގައި ރޫހު ތާޒާ ނުވާނެ އެވެ.

އެއީ ކީއްވެ ހެއްޔެވެ..؟

ޖަވާބަކީ މި ވެރިން ދިވެހީންގެ ރިވެތި އަހުލާގު ދައްކުވައިދީ ހެޔޮބަސް ބުނާން ދެކޮޅު ހެދުމެވެ. ވެރިކަމުގެ ބާރު ލިބުމުން ދޮގު ހަދާން ފެށުމެވެ. މި ލޮބުވެތި ދިވެހި ފަސްގަނޑުގެ ކޮންމެ ވެލިފުކެއްގެ އަގު ދަސް ނުވުމެވެ. ވެރިކަމުގެ ބާރު ލިބުމުން ވައުދަށް ކަމޭ ނުހިތުމެވެ.

މި ކޮލަމުގައި އަޅުގަނޑު ރައީސް ސޯލިހު މި ވަގުތަށް ދޫކޮށްލާނަމަވެ. އެއީ މިހާރު ދިވެހި ވެރިކަމުގެ މާޒީ އެވެ. ނަސޭހަތެއް ލަފައެއް އިރުޝާދެއް ދޭން ވެސް މި ވަގުތު "ބަލާ ވެރިއަކަށް" ވެސް ހުރީ ޑރ. މުއިއްޒު އެވެ.

ދިވެހިރާއްޖެ ތަރައްގީ ކުރުމާއި ރައްޔިތުންނަށް ކުރިއެރުން ގެނެސް ދީ، އިޖުތިމާއީ އަދާލަތު ގާއިމުކޮށް ދެއްވައި، އިންސާފުވެރި ކަމާއެކު ކަންކަން ބެލޭނެ ނިޒާމު އިތުރަށް ހަރުދަނާކޮށް، ރައްޔިތުންގެ މެދުގައި ސަލާމަތާއި ރައްކާތެރިކަން ގާއިމުކޮށް ދެއްވާނެ ކަމުގެ ވައުދާއި އެކު ވެރިކަމުގެ ތަހުތަށް ދިވެހި ޖުމްހޫރިއްޔާގެ އަށް ވަނަ ރައީސް ޑރ. މުހައްމަދު މުއިއްޒު އިންތިހާބު ވީ 17 ނޮވެންބަރު 2023 ގައި އެވެ.

ރައީސް ސޯލިހުއާއި އަބަދުވެސް ގުޅުން ބަދަހި ޑރ. މުއިއްޒު ވެރިކަމުގެ ހުވައި ކުރެއްވި ދުވަހުން ފެށިގެން އެމަނިކުފާ ވެރިކަމަށް ވަޑައިގަތުމަށް ރައްޔިތުންނަށް ވި ހުރިހާ ވައުދަކަށް ހިލާފުވާން ފެށި އެވެ. ރައްޔިތުން ދެކެމުން އައި ހުވަފެން ހަގީގަތަކަށްވުމުގެ ހުރަހަކަށް އެ މަނިކުފާނު ވި އެވެ. ދިވެހި ދައުލަތާއި ދިވެހި ރައްޔިތުންނަށް ތެދުވެރިވެ އަމާނާތްތެރި ވުމާއި ފެއަށް ޖެހުނެވެ. އެ މަނިކުފާނަށް ފާރަވެރިވާން އޮތް ރައްޔިތުންގެ މަޖިލިސް "ގަނެލި" އެވެ.

މިހާ ހިސާބުން ރައީސް ޑރ. މުއިއްޒުގެ ވެރިކަމާއި ދެކޮޅަށް "ބޮޑު އެއް ވުމެއް" ރައްޔިތުން ނިމުނު އަހަރުގެ ޑިސެންބަރު 10 ގައި ބޭއްވި އެވެ. ކާނިވާ ސަރަހައްދުގައި ބޭއްވި އެއްވުމުގައި ވާހަކަ ދައްކަވަމުން، ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފު ޒާކިރު ވަނީ މިހާތަނަށް ރައީސް ޑރ. މުހައްމަދު މުއިއްޒު ހެއްދެވި ދޮގުތަކުގެ ލިސްޓު އާންމު ކުރައްވައިފަ އެވެ. އެއަށްފަހު އޭނާ ވަނީ އެތަނަށް އެއްވެ ތިބި އާންމުންގެ އަރިހުން ރައީސް މުއިއްޒު އަކީ ދޮގުވެރިޔެއްތޯ އައްސަވާފަ އެވެ.

ޖަވާބުގައި އެތަނަށް އެއްވެ ތިބި އެތައް ހާސް ދިވެހި ރައްޔިތުން ހަރު އަޑުން ކަރަށް ބާރުލާ ބުނީ ރައީސް މުއިއްޒު އަކީ "ދޮގުވެރިއެއް" ކަމަށެވެ.

ތެދެކެވެ. މިހާ ހިސާބުން މައުރޫފް ވިދާޅުވި ފަދައިން "ދެން އަޅުގަނޑުމެން ކުރަން ޖެހޭ ކަމަކީ އެއީ ދޮގުވެރިޔެއް ކަމަށް ރައްޔިތުން ނިންމީމާ އޭނާ ވެރިކަމުން ބޭލުމެވެ" ދައުރު ހަމަވުމުން ވޯޓުލައިގެން ވެރިކަން ބަދަލުކުރުމަކީ އޮންނަ އުސޫލު ނަމަވެސް ދޮގާއި މަކަރު ހެދުން އިންތިހާއަށް ދިޔައީމާ ވެރިކަން އިންގިލާބަކުން ބަދަލުކުރުން ވެސް އެއީ އޮންނަ ގޮތެކެވެ. އެގޮތުން ރައްޔިތުން ނުކުމެ އަވައްޓެރި ސްރީލަންކާ އަދި ބަންގްލަދޭޝް ގެ ވެރިކަން ބަދަލުކުރި ގޮތަށެވެ.

ގާނޫނު އަސާސީގެ 4 ވަނަ މާއްދާގައި ބުނަނީ "ދިވެހި ދައުލަތުގެ އެންމެހާ ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. އަދި މި ބާރުތައް ދެމި އޮންނަނީ ރައްޔިތުންގެ ކިބައިގައެވެ"

ތެދެކެވެ. ދައުރު ހަމަވާކަށް ނުޖެހެ އެވެ. ރައްޔިތުންގެ ބާރަކީ ކޮންމެ ފަސް އަހަރަކުން އެއްފަހަރު ލިބޭ ވޯޓު ލުމުގެ ބާރު ކަމުގައި ދެކިގެން މިއަދު ތިބެވޭކަށް ނެތެވެ. ދޮގުހަދާ، ވައުދާއި ހިލާފުވެ، ވެރިކަމުގެ އަމާނާތަށް ހިޔާނާތްތެރިވެ، ރައްޔިތުންނަށް "ހަރާންކޯރު" ވުމުން ގާނޫނު އަސާސީގެ މާއްދާ 4 ކުން ހިތްވަރު ލިބި ރައްޔިތުން ނުކުމެ ވެރިކަން ގާނޫނީ އިމުގެ ތެރެއިން ބަދަލުކުރަން ޖެހެ އެވެ.

ރައްޔިތުންގެ ކިބައިގައި މިއަދު އޮތީ ދޮގެއްގެ މަތީގައި ތިބުމެއް ނޫނެވެ. ދައުލަތުގެ އެންމެހާ ބާރުތައް ރައްޔިތުންގެ އަތުގައި ދެމިއޮތުމުގެ މާނައަކީ އެމީހާ އެ އިންތިހާބު ކުރާ މީހުންގެ މައްޗަށް ބާރު ފޯރުވުމުގެ އިހުތިޔާރު ރައްޔިތުންނަށް ލިބިފަ އޮތުމެވެ.

އެހެނީ މިއަދު ވެރިންގެ ބޮޑާކަން، ކިބުރުވެރިކަން، އައުދާނަކަށް މި ސިފަތައް ރައްޔިތުން ނިކުމެ ކަޑުވަން ޖެހިއްޖެ އެވެ. ހާއްސަކޮށް އާއްމު ރައްޔިތުންގެ ވޯޓަކުން ހޮވާ މީހުންގެ ގާނޫނީ އިމުގެ ތެރެއިން ދުރުކުރަން ވެއްޖެ އެވެ. އަދި ރައްޔިތުން ވެރިންގެ "މުށަށް" ލުމާއި ބަނޑު އެޅުމުގެ ތަބީއަތް ވެސް ރައްޔިތުން ނިކުމެ ގާނޫނީ އިމުގެ ތެރެއިން ރޫޅާލަން ވެއްޖެ އެވެ.

ވެރި މީހާއަށް އަށް ފަސް އަހަރު ވަންދެން ގައުމު ލޫޓްވާލަން ދިނީމަ ލިބޭ ގެއްލުން މިހާރު މި ދަނީ ފެންނަމުން ނެވެ. "ވެރިކަމުގެ ފަސް އަހަރަކީ" ނަގުދުކޮށް ފަޅު ރަށެއް ހެން ލިޔުއްވާފަ، ރައީސުލްޖުމްހޫރިއްޔާގެ މަގާމުގައި ހުންނަ މީހާއަށް އޮތް އެއްޗެއް ނޫން ކަމަށެވެ.

ރައްޔިތުންގެ މޫނުމަތިން ހިނިތުންވުން ގެއްލުމުން، ރައްޔިތުންގެ ބާރަކީ ކޮންމެ ފަސް އަހަރަކުން އެއްފަހަރު ލިބޭ ވޯޓު ލުމުގެ ބާރު ކަމުގައި ދެކިގެން މިއަދު ތިބެވޭކަށް ނެތެވެ.