ރައީސް ޑރ. މުއިއްޒުގެ ދައުރު ނިމުމުގެ ކުރީން ކޮފީ މަނާކުރުމުގެ ބިރުވެސް މިހާރު އެބައޮތް ކަމަށް ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެ އެވެ.
މަލީހު މިހެން ވިދާޅުވީ ދުންފަތާ ބެހޭ ގާނޫނަށް މި ފަހުން ގެނައި ބަދަލާ އެކީ ދުންފަތް އޮޅަން ބޭނުންކުރާ އެކި ސަމާނު ވެސް މަނާވާނެ ކަމަށް އިރުޝާދު ދީ ހެލްތު މިނިސްޓްރީން ކަސްޓަމްސްއަށް ސިޓީއެއް ފޮނުވަގުތެއްގައި އެވެ.
"އެކްސް" ގައި ކުރެއްވި ޕޯސްޓެއްގައި މަލީހު ވިދާޅުވީ މުއިއްޒު އަކީ އެތެރެ ހުސް ބޭފުޅެއްކަން މިހާރު ސާފު ވެއްޖެ ކަމަށާއި އެ ދަނީ މިހާރު ޒުވާނުންގެ ރަތްރޮގު ހުރަސްކުރަމުން ކަމަށެވެ.
ދައުރު ނިމުމުގެ ކުރީން މީނަ ކޮފީ މަނާކުރުމުގެ ބިރުވެސް މިހާރު އެބައޮތް.
މަލީހު
ރާއްޖެއަށް ވޭޕް އެތެރެކުރުމާއި ރާއްޖޭގައި ވޭޕް ބޭނުންކުރުން މަނާކޮށް، މި ފަހުން ދުންފަތް ކޮންޓްރޯލްކުރުމާ ބެހޭ ގާނޫނަށް ގެނައި ބަދަލަށް ރިއާޔަތްކޮށް ފޮނުވި މި ސިޓީގައި ބުނެފައިވަނީ އަލަށް ގެނައި އިސްލާހުގައި ދުންފަތުގެ ބާވަތްތައް ރާއްޖޭގައި އުފެއްދުމަކީ މަނާކަމެއް ބުނެފައިވާ ކަމަށެވެ.
އެހެންކަމުން ސިނގިރެޓް، ބިޑި އަދި ސުއްޓާ ފަދަ ދުންފަތުގެ ބާވަތްތައް އަމިއްލަ އަށް އުފައްދަން ބޭނުންކުރާ އެއްވެސް އެއްޗެއް ރާއްޖެ އެތެރެ ނުކުރެވޭނެ ކަމަށާއި އެފަދަ ތަކެތި އަތުލާ ނައްތާލަން ޖެހޭނެ ކަމަށްވެސް ހެލްތު މިނިސްޓްރީގެ ސިޓީގައި ބުނެފައިވެ އެވެ.
އަމިއްލައަށް ހަދާ ސިނގިރޭޓުގައި ބޭނުންކުރާ ތަކެތީގެ ތެރޭގައި ސިނގިރޭޓަށް ހާއްސަ ދުންފަތާއި އޮޅާ ކަރުދާހާއި ފިލްޓަރު ހިމެނެ އެވެ.
ސަރުކާރުން މިދިޔަ ނޮވެމްބަރު މަހުގެ ތެރޭގައި ވަނީ ސިނގިރޭޓާއި ބިޑީގެ ޑިއުޓީ ވެސް 50 ޕަސެންޓް ބޮޑުކޮށްފަ އެވެ. މިއާއެކު ސިނގިރޭޓުގެ އަގު ވަނީ ވަރަށް ބޮޑަށް އުފުލިފަ އެވެ. އެއާއެކު ސިނގިރޭޓު ވިކޭ މިންވަރު މަދުވެ، ސިނގިރޭޓު ފޮށި ގަތުމުގެ ބަދަލުގައި އަމިއްލައަށް އޮޅައިގެން ސިނގިރޭޓު ބޯން ގިނަ ބަޔަކު ވަނީ ހިޔާރުކުރަން ފަށައިފަ އެވެ.
