މިދިޔަ މަހުގެ 27 ވަނަ ދުވަހުގެ ރޭ ފުލުހުންގެ ކާރަކާއި ސައިކަލެއް ޖެހި ހިނގި ނުރައްކާތެރި އެކްސިޑެންޓްގެ މަންޒަރު ދުށް މީހަކު ހޯދަން ފުލުހުން އިއުލާނެއް ކޮށްފި އެވެ.

ފުލުހުންގެ ކާރަކާއި ސައިކަލެއް ޖެހި ހިނގި އެކްސިޑެންޓުގައި އަނިޔާވެފައި ވަނީ 18 އަހަރުގެ ދިވެހި ފިރިހެނަކަށެވެ. އޭނާގެ ހާލު ސީރިއަސްވެ، ވެންޓިލޭޓަރުގައި ފަރުވާދޭ ކަމަށް އައިޖީއެމްއެޗުން ވަނީ ބުނެފަ އެވެ.

ފުލުހުން މިއަދު ވަނީ އެ އެކްސިޑެންޓު ހިނގި މަންޒަރު ފެނުނު މީހުން އެކަމުގެ މަައުލޫމާތު ހިއްސާކޮށްދިނުމަށް އެދިފަ އެވެ.

އެހެންކަމުން، މި އެކްސިޑެންޓް ހިނގި ވަގުތު މަންޒަރު ދުއްފަރާތެއް ވާނަމަ ޓްރެފިކް އިންވެސްޓިގޭޝަންގެ ނަންބަރު 9444880 އަށް ގުޅުއްވައި މައުލޫމާތު ހިއްސާ ކުރުމަށް ފުލުހުން ވަނީ އެދިފަ އެވެ.