ރައީސް ޑރ. މުއިއްޒުގެ ސަރުކާރު އިހްލާސްތެރި އެއް ނޫން ކަމަށާއި ސިޓީކައުންސިލަށް ދޭންވާ އެއްބާރުލުން ނުލިބޭތީ މިތިބީ ރައްޔިތުން ނިޔާވީމަ ވަޅުލާނެ ސަހަރާއެއް ނެތިފައި ކަމަށް މާލޭގެ މޭޔަރު އާދަމް އާޒިމް ވިދާޅުވެއްޖެ އެވެ.

ޗެނަލްތޭރައިގެ "ނިއުސް ޓޯކް" ޕްރޮގްރާމްގައި ވާހަކަދައްކަވަމުން މޭޔަރު އާޒިމް ވިދާޅުވީ، ރައީސް ޑރ. މުއިއްޒުއާއި ބައްދަލުވި ދުވަހު ސިޓީ ކައުންސިލުން އެދުނު ހުރިހާ ކަމަކަށް ވެސް އާއެކޭ ބުނެފަ ވަޑައިގަތީ ކަމަށާއި އެއަށްފަހުން އަދި ހަބަރެއް ނުވާ ކަމަށެވެ.

އާޒިމް ވިދާޅުވީ ހަމަ އެދުވަހު މާލޭގެ ރައްޔިތުން ނިޔާވުމުން ވަޅުލާނެ ސަހަރާއެއްވެސް މިހާރު ނެތް ވާހަކަ ވެސް ދެންނެވިން ކަމަށާއި އަދި ކުރިއަށް އޮތް 6 މަސް ތެރޭ މާލެ އާސަހަރާފުރޭނެ ކަމަށް ވެސް ދެންނެވިން ކަމަށެވެ.

އަދި ގުޅިފަޅުންވެސް ސަހަރާ އެއް އެލޮކޭޓް ކޮށްފަ ބެހެއްޓުން މުހިއްމު ކަމަށާއި ހުޅުމާލޭ ފޭސް 2، ފޭސް 3 ކުން ވެސް ސަހަރާ އެލޮކޭޓް ކޮށްފަ ބެހެއްޓުން މުހިއްމު ކަމަށް ރައީސް އަށް ލަފާ ދެއްވިން ކަމަށެވެ. ނަމަވެސް ވެސް ދެއްވި ޖަވާބެއް މި ހާތަނަށް ނެތް ކަމަށެވެ.

އާޒިމް ވިދާޅުވީ ސިޓީ ކައުންސިލްގެ ކަންބޮޑުވުން އަލުން މިހހަފްތާގައި ރައީސް އަށް ސިޓީއަކުން ދަންނަވާނެ ކަމަށާއި ކޮންމެ ގޮތަކުން ވިޔަސް މާލޭގެ ރައްޔިތުން ނިޔާވީމަ ވަޅުލާނެ ސަހަރާއެއް ބޭނުންވާނެ ކަމަށެވެ.

މާލެ ސަރަހައްދުގައި މީހުން ހިނެވުމާއި ވަޅުލުމުގައި ދަތި ހުރިން އާޒިމް ފާހަގަކުރެއްވި އިރު މިދިޔަ ހަފުތާގައި ކުރި ގަދަ ވިއްސާރަ އަށް ފަހު ބިމު އަޑިން ފެންގަނޑު އަދިވެސް ނުހިނދޭތީ ހުޅުމާލެ ސަހަރާގައި މީހުން ވަޅުލުން ވެސް މިހާރު ވަނީ ވަގުތީ ގޮތުންމެދުކަނޑާލައިފަ އެވެ.