ޑައިބެޓީސް މެލިޓަސް ނުވަތަ ހަކުރު ބަލީގެ ބަލީ މީހުން ދާއިމަށް ބޭނުންކުރާ އިންޖެކްޝަން ނުވަތަ އިންސިއުލިން އާސަންދައިން ނުލިބޭ ގޮތް ހެދުމުގެ މަސައްކަތް ފަށާފައިވާކަމުގެ މައުލޫމާތު ލިބިއްޖެއެވެ.

މިކަމުގެ މައުލޫމާތު "ތޭރަ އޮންލައިން"އާ ހިއްސާކުރި ފަރާތުން ބުނެފައިވަނީ ފެބްރުއަރީ މަހުން ފެށިގެން އެ އިންޖެކްޝަން އާސަންދައިގެން ދަށުން ނުލިބޭނެ ކަމަށެވެ. އެގޮތުން އެކެއް ފެބްރުއަރީއިން ފެށިގެން ތިން އިންޖެކްޝަނެއް ހަކުރު ބަލި މީހުންނަށް އާސަންދައިގެ ދަށުން ނުލިބޭނެ ކަމަށް ވަނީ މައުލޫމާތު ލިބިފައެވެ.

އެގޮތުން ޓައިޕް 1 އަދި ޓައިޕް 2 ޑައިބެޓިކު ބަލި މީހުންނަށް ބޭނުން ކުރާ 3 އިންޖެކްޝަންއެއް އާސަންދައިގެ ތެރެއިން ކަނޑާލަން ވަނީ ނިންމާފައެވެ. އެގޮތުން އިންސިއުލިން ގްލަރޖީންގެ ދެ ބާވަތަކާ އަދި އިންސިއުލިން އެސްޕާޓުވެސް އެކެއް ފެބްރުއަރީ ފެށިގެން އާސަންދައިން ނުލިބޭނެ ކަމަށް މައުލޫމާތު ލިބިފައިވެއެވެ.

ނަމަވެސް މި އިންޖެކްޝަންތަކުގެ ބަދަލުގައި އެހެން އިންޖެކްޝަނެއް ލިބޭނެ ކަމަށް ބުނާއިރު އެއީ ކިހިނެއް މަސައކްަތްކުރާނެ އިންޖެކްޝަނެއް ކަމެއް ހުދު ޑޮކްޓަރުންނަށްވެސް ބަލިމީހާއަށް ބުނެދޭން ނޭނގޭ ކަމަށް މި ނޫހަށް މައުލޫމާތު ދިން ފަރާޓުން ހާމަކޮށްފައިވެއެވެ.

މައުލޫމާތު ލިބިފައިވާ ގޮތުގައި މި ނިންމުމަކީ ސަރުކާރާ އަދި އެސްޓީއޯއިން ނިންމި ނިންމުމެއް ކަމަށެވެ.

އިންސިއުލިން ގްލަރޖީންއަކީ ހަށިގަނޑުގެ އެއް ޓިޝޫއިން އަނެއް ޓިޝޫތަކަށް ހަކުރު ފޮނުވުން ބަންދުކުރުމަށާ އަދި ފުރަމެއިން އިތުރު ހަކުރު އުފެއްދުން ހުއްޓުވަން ޖަހާ އިންސިއުލިންއެކެވެ. އަދި އިންސިއުލިން އެސްޕާޓުއަކީ ހަށގަނޑުގައި އުފައްދާ ގްލައިސެމިކު ކޮންޓްރޯލުކުރުމަށް ޖަހާ އިންޖެކްޝަންއެކެވެ.