ވައްކަން ކުރުމާ ސިހުރު ހެދުމުގެ ރެކޯޑުވެސް އޮތީ މި ސަރުކާރުގައި ކަމަށް ބުނެ އެންމެ އަޑުގަދަ ކުރި މީހުން މިހާރު މި ސަރުކާރާ ގުޅިފައިވާއިރު، އެ ކުރި ވައްކަންތައް އެކަކު ބޮލަށް ކަނޑާލަން ސަރުކާރުން މަސައްކަތްކުރަން ފެށުމަކީ ވަރަށް އައްޗިކަމެއްކަން ޔަގީނެވެ. އަދި އެވެސް ގިނަ ފިރިހެނުންތަކެއްގެ ތެރޭގައި ހުރި އަންހެނެއްގެ ބޮލަށެވެ. ނަމަވެސް މިއީ ފިިރިހެންވަންތަ ފިރިހެނުން ކަމަށް ދައުވާކުރާ ފިރިހެނުން ތިބި ސަރުކާރެވެ.

ކޮންމެ އަކަސް ދައްކަން މިއުޅެނީ ވެރިކަން ކުރާ ޕާޓީ، ޕީއެންސީއިން ޑީއެންއާރުން ވައްކަންކޮށް ރައްޔިތުންގެ ޒާތީ މައުލޫމާތު ނަގައިގެން ޕާޓީއަށް މީހުން އިތުރުކުރުމަށް ޖަހާ ސަކަރާތުގެ ވާހަކައެވެ.

ޕީއެންސީގެ ޕީޖީ ލީޑަރު އެ ޕާޓީއަށް 1 ލައްކަ މީހުން ސޮއިކުރާނެ ކަމަށް ބުނެ ސަޅި ބައިސާ ކަނޑަން ފެށުމުން އެބަސް ތެދުކުރަން ނަމަހީވެސް ރައްޔިތުންގެ ޒާތީ މައުލޫމާތުން ވައްކަންކޮށް މުޅި ގައުމު ފަސާދަކޮށް ޕީއެންސީއިން ވަނީ ނިންމާފައެވެ. އިދިކޮޅު އެމްޕީއަކަށްވެސް އެހެން ރައްޔިތަކަށްވެސް ދޫދިނުމެއް ނެތެވެ.

މަކަރާ ހީލަތާ ފޯޖަރީގެ ޖަރީމާތަކާ އެކު އައިޑީކާޑު ޔުނިޓު ހިސޯރުކޮށް ވަގު ފޯމުތައް ފުރުމުގެ އައްޑާއަކަށް އެތަން ހަދާ ސަރުކާރުގެ ވެރިން ދައްކަމުން ދަނީ ހަޑި ނަމޫނާއެކެވެ. އެމްޑީޕީގެ އިސް ސަފުގައި ތިބި މީހުން ޕީއެންސީއަށް "ވަގަށް" ވެއްދުމަށް ފަހު އެކަން ފަޅާ އެރުމުން، ޕީޕީއެމްގެ 6000 މީހުން އެމްޑީޕީއިން އެ ޕާޓީއަށް ވަގަށް ވެއްދިކަމަށް ބާރަށު ދާއިރާގެ މައިކުން ނުހަނު އަޑުހަރުކޮށް ބުނުމުން ދޭހަވަނީ މިވެރިންވެސް އައީ ވައްކަން ކުރާން ހިތުލައިގެން ކަމެވެ. އަދި މިހާރު ކުރިއަށް މިދަނީ އެ ސިލްސިލާކަމެވެ.

ކޮންމެ އަކަސް ޕީއެންސީއަށް "ވަގަށް" މީހުން ވައްދާކަން ފެންމަތިވެ އެ ރުޅިގަޑު ރައްޔިތުން ބާލަމުންދަނިކޮށް ކުއްލި ގޮތަކަށް ޕީއެންސީގެ އެސްޖީއަަކަށް ބޭފުޅަކު އައްޔަންކޮށް ކުރިން އެ މަގާމު ފުރުއްވި ޒީނާޒު އަދުނާނަށް އެސްޖީކަމުގެ އިތުރު ފުރުސަތު ނުދޭން ޕާޓީ ހިންގާ މަޖިލީސްއިން ނިންމި ކަމަށްވެއެވެ.

ޒީނާޒުގެ ދައުރު މިދިޔަ ޑިސެމްބަރު 31، ގައި ހަމަވެފައިވީ ނަމަވެސް ޖަނަވަރީ މަހުގެ ދެބައި ކުޅަ އެއްބައި ހުސްވެގެން ދާން ކައިރިވީއިރުވެސް މަގާމަށް އިތުރު ދައުރަކަށް ޒީނާޒު އައްޔަންނުކޮށް މަގާމު ހުހަށް ބޭއްވުމަށް ފަހު މިހާރު ކުއްްލިއަކަށް އެ މަގާމަށް އެހެން ބޭފުޅަކު އައްޔަންކޮށް ދައްކަން މިއުޅެނީ ކޮންކަމެއް ބާއެވެ؟

ބުނެދޭން މިއުޅެނީ ޕީއެންސީއަށް މީހުން "ވަގަށް" ވައްދަނީ ޒީނާޒުއޭ ބާއެވެ؟ މިކަހަލަ ކަންކަން ފެނުމުން އަންނަނީ އަމަށަކު ހިންޏެއް ނޫނެވެ. އެހެންޏާ ފަހެ މި މީހުން ހީކުރަނީ ދިވެހިން ހުންނަނީ މީދާ ކޭ އުނބެއްކަމަށް ވިއްޔާއެވެ.

ހާވާނެހާ ހަޑިއެއް ހޭވުމަށް ފަހު ރައްޔިތުންގެ ޒާތީ މައުލޫމާތު ވައްކަން، ކަމާ ގުޅުން ހުރި ހުރިހާ އިދާރާތައް ބައިވެ ކުރި ބޮޑު ވައްކަމުގެ ޖަރީމާ ނިކަމެތި އަންހެންނެއް ބޮލަށް ކަނޑާލާ މިއުޅެނީ ކަމުން ރެކެން ވިއްޔާއެވެ.

ޒީނާޒުއަކީ ޚިދުމަތްތެރި އަންހެނަކަށްވާއިރު ވަކި އަންހެނަކަށް ވަކި ގޮތަކަށް މި ސަރުކާރުން މި ހަދަނީ މިއީ އަންހެނުން ކުރިއަރުވާ ގޮތްބާއެވެ؟ އަންހެނުންނަށް ކުރާ ފުރައްސާރަ ހުއްޓުވަން އަޑު ނުއުފުލައިގެން ސަރުކާރުގެ ތެރެއިން ބައެއް ބޭފުޅުން ކަނބޮޑުވުން ފާޅުކުރާއިރު ސަރުކާރުގެ ތެރޭގައި ތިބި ބައެއް އަންހެނުންނަށް ހިތުހުރި ގޮތެއް ވެރިން ހަދަމުން ދިއުން ހަމަ އޯކާބާއެވެ؟

ކޮންމެ އަކަސް ރައްޔިތުންގެ ޒާތީ މައުލޫމާތުގެ ޚަޒާނާއިން ވައްކަންކޮށް މަޖިލިސް މެމްބަރުންގެ ގޮނޑި ގެއްލުވާލަން މަސައއްކަތްކުރިކަން ފަޅާއެރުމުން ހަމަ އެ ދަނޑިވަޅާ ދިމާކޮށް ޕާޓީގެ އެސްޖީ ބަދަލުކޮށް ޕީއެންސީއިން މި ޖަހާ ޗައްކަރު ދިވެހިން ތިބީ ނުހަނު ގާތުން ބަލަންށެވެ. އެހެންކަމުން ދައުލަތުގެ ހުރިހާ އިދާރާތައް އެކުވެ ވަގު ފޯމު ފުރުމަށްފަހު ޒީނާޒު ބޮލަށް އެކަނި ކަނޑާލަން އުޅުނަސް އެކަން ކާމިޔާބު ނުވާނެއެވެ. ރިޔާސީ ޕްރައިމަރީގައި ރައީސް މުހައްމަދު މުއިއްޒުއާ ވާދަކުރި ވާދަވެރިޔާގެ އަނބިކަނބަލުންނަށް ޒީނާޒުވުމަކީ ވެސް އިއްތިފާގެއް ނޫނެވެ.