ސިޔާސީ އެއްވެސް ޕާޓީއެއްގައި އަމަލީ ގޮތުން މަސައްކަތް ނުކުރައްވަން ކުރީގެ ރައީސް މުހައްމަދު ނަޝީދު ނިންމަވައިފިއެވެ.
އެމަނިކުފާނު މިކަން ހާމަކުރެއްވި އެކްސްގައި ކުރެއްވި ޕޯސްޓެއްގައެވެ.
ނަޝީދު ވިދާޅުވި ގޮތުގައި އެ މަނިކުފާނުގެ ހަޔާތުގެ ބޮޑު ބައެއް ހޭދަކުރެއްވީ ރާއްޖޭގައި ގިނަ ޕާޓީ އެކުލެވޭ ނިޒާމެއް ގާއިމުކުރުމުގެ މަސައްކަތުގައި ކަމަށާއި، ގައުމެއްގެ ތަރައްގީއަށާއި ރައްޔިތެއްގެ ތަނަވަސް ކަމަށް އެންމެ ބޭނުން އެއް ވަސީލަތަކީ ވާދަވެރި ސިޔާސީ ހަރަކާތް ކަމަށެވެ.
ދެހާސް އަށެއްގެ އިންތިޚާބަށް ފަހުގައި ސަރުކާރުގެ އާމްދަނީ އިތުރުވެ ދިޔަ މިންވަރުން، އަދި އެ އާމްދަނީން ކުރެވުނު އުމްރާނީ މަސައްކަތާއި ރައްޔިތުންނަށް ހޯދައި ދެވުނު އިޖުތިމާއީ ރައްކާތެރިކަން ބުނެދެނީ ގިނަ ޕާޓީ އެކުލެވޭ ނިޒާމުގެ ފައިދާ
އެ މަނިކުފާނު ވިދާޅުވިއެވެ.
އެމްޑީޕީ އުފެއްދުމުގައި ގިނަ މަސައްކަތްތަކެއް ކުރެއްވި ނަޝީދު ވިދާޅުވީ އެ މަނިކުފާނު އެއްވެސް ސިޔާސީ ޕާޓީއަކާ އިދިކޮޅު ވެވަޑައިނުގަންނަވާނެ ކަމަށާއި އެމްޑީޕީ ވެސް ވަރުގަދަވެ އޮތުން އެއީ އަބަދުވެސް އެދިވަޑައިގަންނަވާ ގޮތް ކަމަށެވެ. އަދި ފަހުން ނަޝީދު ގުޅިވަޑައިގަތް ދަ ޑިމޮކްރެޓްސްއަކީ ޚާއްސަ ގޮތެއްގައި ޒުވާނުންނަށް ސިޔާސީ މަސައްކަތުގައި ބައިވެރިވުމަށް ލިބުނު ފުރުސަތެއް ކަމަށް އެ މަނިކުފާނު ވިދާޅުވިއެވެ.
މީގެއިން އެއްވެސް ޕާޓީއެއްގައި އަމަލީ މަސައްކަތް ކުރާކަށް މިވަގުތު އަޅުގަނޑު ނެތިން، އެހެން ނަމަވެސް ރާއްޖޭގެ ސިޔާސީ ހަރަކާތުން މުޅިން ދުރަށްދާކަށް ވެސް ނެތިން
ރައީސް ނަޝީދުގެ އެ ޕޯސްޓުގައިވެއެވެ.
ރައީސް ނަޝީދު މިފަދަ ބަސްފުޅެއް ވިދާޅުވެފައި މިވަނީ މީގެ ކުރިން އެމްޑީޕީގައި އިސް މަގާމުތަކުގައި ތިއްބެވުމަށްފަހު ދަ ޑިމޮކްރެޓްސް އުފެއްދުމަށް ވަކިވެވަޑައިގަތް މެންބަރުންތަކެއް އަލުން އެމްޑީޕީއަށް ވަޑައިގެންފައިވާ ދަނޑިވަޅެއްގައެވެ.
