ރަމަޟާން މަހު އިންތިހާބު ނުބާއްވާ ގޮތަށް އިންތިހާބުތަކާ ބެހޭ ގާނޫނަށް އިސްލާހު ގެނެސް ފާސްކުރި ނަމަވެސް މަޖިލިސް އިންތިހާބުގައި ވާދަކުރުމުގެ ފުރުސަތު އިތުރުކޮށްނުދޭނެ ކަމަށް އިލެކްޝަން ކޮމިޝަން (އީސީ)އިން ހާމަކޮށްފިއެވެ.

މަޖިލިސް އިންތިހާބު ރޯދަމަހާ ދިމާވާތީ އިންތިހާބުގެ ތާރީހު ބަދަލުކުުރުމަށް މަގުފަހިކުރުމަށް އިންތިހާބުތަކާ ބެހޭ ގާނޫނަށް އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހެޅުއްވި އިސްލާހު، އެކުލަވާލި ވަގހުތީ ކޮމިޓީއިން ފާސްކޮށ ވަނީ ތަޅުމަށް ފޮނުވާފައެވެ.

އެހެންކަމުން އިސްލާހު، ތަޅުމުން ފާސްވެއްޖެ ނަމަ ރީ-ރެޖިސްޓްރޭޝަންއަށް އިތުރު ފުރުސަތު ދޭން ނިންމާފައިވާކަން އީސީއިން ހާމަކުރުމުން ކުރިމަތިލުމުގެ އިތުރު ފުރުސަތު ދޭނެ ތޯ ޗެނަލް13 އިން ކުރި ސުވާލަށް ޖަވާބު ދެއްވަމުން އީސީގެ ނައިބު ރައީސް އިސްމާއިލް ހަބީބު ވިދާޅުވީ، ކުރިމަތިލުމުގެ އިތުރު ފުރުސަތު ނުލިބޭނެކަމަށާ މިހާރު ހަމަ އޮތް މުއްދަތަށް ވަގުތު ހަމަވާނެ ކަމަށެވެ.

މާޗް 17 ވަނަ ދުވަހަށް ތާވަލްކޮށްފައިވާ ރައްޔިތުންގެ މަޖިލިހުގެ އިންތިހާބުގައި ވާދަކުރުމުގެ ފުރުސަތު އީސީން މިހާރު ހުޅުވާލާފައިވާއިރު، މަޖިލީހުގެ 93 ދާއިރާއަކަށް ވާދަކުރުމުގެ ފުރުސަތު މިފަހަރު ވަނީ ހުޅުވާލަފައެވެ.

އެ ދާއިރާތަކަށް ވާދަކުރުމުގެ ފުރުސަތު ހުޅުވާލާފައި ވަނީ މި މަހުގެ 14 ވަނަ ދުވަހުގެ މެންދުރު 2:00 އާ ހަމައަށެވެ.

އިސްލާހު ފާސްވެއްޖެ ނަމަ އިންތިހާބު ބާއްވާނީ ރޯދަ މަސް ނިމި ދިހަ ދުވަސް ފަހުންނެވެ.