ރަޝިޔާ އާއި ޔުކްރެއިންނާއި ދެމެދު ކުރެވޭ ހަނގުރާމައިގެ ތެރެއިން ދިވެހިރާއްޖެ ތާއީދު ކުރަނީ އެންމެ ގިނަ ފަތުރުވެރިން އަންނަ ރަޝިޔާ އާ ދެކޮޅަށްކަމަށް އެސްޓޯނިއާގެ ގާނޫނު ހަދާ މަޖިލީހުން ހާމަކޮށްފިއެވެ.

ރައީސް މުހައްމަދު މުއިއްޒު އެސްޓޯނިޔާއަށް ކުރައްވަމުން ގެންދަވާ ދަތުރުފުޅުގެ ތެރެއިން އެ ގައުމުގެ ގާނޫނު ހަދާ މަޖިލީހުގެ އިސްވެރިންނާ އެކު ބޭއްވެވި ބައްދަލުވުމާ ގުޅޭ ގޮތުން ޝޯޝަލް މީޑިއާގައި ޕޯސްޓެއްވަނީ ކޮށްފައެވެ. އެ ޕޯސްޓުގައި ބައިނަލްއަގުވާމީ ގާނޫނުތައް ދިފާއުކޮށް ރާއްޖޭން ޔޫކްރެއިނަށް ތާއީދުކުރާތީ ޝުކުރު އަދާކުރާ ކަމަށް އެސްޓޯނިއާގެ ގާނޫނު ހަދާ މަޖިލީހުން ހާމަކޮށްފައިވެއެވެ.

ޕޯސްޓުގައި އެސްޓޯނިއާގެ ގާނޫނު ހަދާ މަޖިލީހުގެ ރައީސް ލޯރީ ހޫސަރު ވިދާޅުވީ އެސްޓޯނިއާ އާއި ރާއްޖެ ދުރުގައި އޮތަސް، އެއްގޮތް މަސްލަހަތުތަކެއް ދެ ގައުމުން ވެސް ހިއްސާކުރާ ކަމަށެވެ.

ސަލާމަތީ ކަންކަމާއި، ޔޫކްރެއިނަށް ތާއީދު ކުރުމާއި، ބައިނަލްއަގްވާމީ ގާނޫނުތައް ދެމެހެއްޓުމާ ބެހޭ ގޮތުން އެ ދެ ބޭފުޅުން މަޝްވަރާކުރި ކަމަށް އޭނާ ވިދާޅުވެފައިވެ އެވެ. އަދި، އދ. ގައި ރާއްޖެއިން ޔޫކްރޭނަށް ކުރާ ތާއިދަށް ޝުކުރު އަދާކޮށްފައިވެ އެވެ.

މިއީ ރަޝިއާ-ޔޫކްރެއިން ހަނގުރާމައިގައި ރާއްޖެއިން ވަކި ކޮޅެއް ނަގާފައިވާކަން ހާމަވި ފުރަތަމަ ފަހަރެވެ. ނަމަވެސް މިކަން ދިވެހި ސަރުކާރުގެ ފަރާތުން ފޮރިން މިނިސްޓަރު ޑރ އަބްދުﷲ ޚަލީލު ވަނީ ދޮގު ކުރައްވާފައެވެ.

ރައީސް މުއިއްޒު ރަޝީއާ ޔުކްރެއިން ހަނގުރާމައިގެ ތެރެއިން ޔުކްރެއިންއަށް ތާއީދުކުރާ ކަމަށް އެސްޓޮނިއާގެ ސަރުކާރުން ހާމަކޮށްފައިވާއިރު ރަޝީއާއަކީ ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ އެއް މާކެޓުކަން ފާހަގަކޮށްލެވެއެވެ.

ރާއްޖެއަށް ޖުމްލަ 90،659 ފަތުރުވެރިން ޒިޔާރަތްކޮށްފައިވާއިރު، މި ދުވަސްވަރު އެންމެ ގިނައިން ފަތުރުވެރި އަންނަނީ ރަޝިޔާއިންނެވެ. މި އަހަރު ރާއްޖެއަށް ޒިޔާރަތްކުރި ފަތުރުވެރިންގެ ތެރެއިން 14.3 އިންސައްތައަކީ ރަޝިޔާ ފަތުރުވެރިންނެވެ. އެގޮތުން އެއީ ޖެމްލަ 12،920 ފަތުރުވެރިންނެވެ. އެގޮތުން ފަތުރުވެރިކަމަށް މިކަމުގެ ސަބަބުން ނޭދެވޭ އަސަރު ކުރާނެކަމަށް ލަފާ ކުރެވެއެވެ.