ރައްޔިތުންގެ މަޖިލީހުގެ ގަވާއިދުގައި ރައީސުލްޖުމްހޫރިއްޔާ އަޒުލު ކުރުމުގެ މަރުހަލާ ބަޔާން ކުރާ މާއްދާތައް ބަދަލު ކުރި ގަވާއިދަށް އަމަލުކުރުން މަޑުޖައްސާލަން އަމުރުކޮށްފިއެވެ.

ގާނޫނުއަސާސީ އާއި މަޖިލީހުގެ ގަވާއިދުގައިވާ ގޮތުން، ރައީސް އަދި ނައިބު ރައީސް މަގާމުން ވަކިކުރަން ފާސްކުރެވޭނީ މަޖިލީހުގެ ޖުމްލަ މެމްބަރުންގެ ތިން ބައިކުޅަ ދެ ބައި މެންބަރުންގެ ވޯޓުންނެވެ. އެއީ 87 މެންބަރުންގެ ތެރެއިން 58 މެންބަރުންނެވެ.

ނަމަވެސް، އާ ސަރުކާރުގެ މަގާމުތަކާ ހަވާލުވެވަޑައިގަތުމަށް ސަރުކާރަށް ނިސްބަތްވާ ހަތް މެމްބަރަކު މަޖިލީސް ގޮނޑި ދޫކޮށްލުމާއެކު، އެމްޑީޕީގެ މެޖޯރިޓީ އޮންނަ މަޖިލީހުން ވަނީ ރައީސް އަޒުލު ކުރެވޭ ގޮތް ފަސޭހަކޮށް ބޮޑެތި ބަދަލުތަކެއް ގެންނަން ފާސްކޮށްފައެވެ.

މިކަމާ ގުޅިގެން ސަރުކާރުގެ ފަރާތުން ބަންޑާރަ ނައިބު އޮފީހުން ސުޕްރީމް ކޯޓަށް ވަނީ ދުސްތޫރީ މައްސަލައެއް ވަނީ ވައްދާފައެވެ.

އެކަމާ ގުޅިގެން އެ އިސްލާހަށް އަމަލު ކުރުން މަޑުޖައްސާލަން ސުޕްރީމް ކޯޓުން ނެރުނު ވަގުތީ އަމުރުގައި ބުނެފައި ވަނީ، ގާނޫނުއަސާސީއަށް އަމަލުކުރަން ފެށުނީއްސުރެ މަޖިލީހުގެ މެމްބަރުންގެ އަދަދު ކަނޑައެޅީ އެއްގޮތަކަށްވެފައި، އެތައް އަހަރެއް ވެގެން ދިޔައިރު މަޖިލީހުގެ ކޯރަމް ގުނަމުން އައީ އެއްގޮތަކަށް ކަމަށެވެ. ބަންޑާރަ ނައިބު ހުށަހަޅާފައިވާ މި މައްސަލައިގައި، އެ އިސްލާހަށް އަމަލު ކުރުން ގާނޫނު އަސާސީއާ ހިލާފުވާ ކަމަށް ބުނާތީ، އިސްލާހަށް އަމަލު ކުރުން މަޑުޖައްސާލަން ފެންނަ ކަމަށެވެ.

މިއީ އާންމު މަސްލަހަތަށްޓަކައި ވަގުތީ އަމުރެއް ނެރެން ޖެހޭ ހާލަތެއް ކަމަށް ވެސް އަމުރުގައި ބަޔާންކޮށްފައިވެ އެވެ.

ވަގުތީ އަމުރު ނެރެން ފަނޑިޔާރުންގެ އަގުލަބިއްޔަތު ލިބުނު ނަމަވެސް ސުޕްރީމް ކޯޓުން މި މައްސަލަ ބަލަމުންދާ ފަސް ފަނޑިޔާރުންގެ ބެންޗުގެ ރިޔާސަތުގައި އިންނެވި އައިޝާ ސުޖޫނުގެ ރައުޔު ތަފާތެވެ. ބެންޗުގައި އިންނެވި ޑރ. މުހައްމަދު އިބްރާހިމް ތާއީދުކުރެއްވި ސުޖޫންގެ ރައުޔުގައި އޭނާ ދެބަސްވީ މުއާލާތް ކެނޑިގެން ދާނެ ކަމަށް ބުނާ ބަޔަށެވެ.

އެކަމަކު، ތިން ފަނޑިޔާރުންގެ އަޣުލަބިއްޔަތުން ނެރުއްވި އަމުރުގައިވަނީ ހުށަހެޅިފައިވާ މައްސަލައަކީ ދުސްތޫރީ ބަހުސެއް އޮތް އުފެދޭ މައްސަލައަކަށްވެފައި، ސިޔާސީ ސުވާލުގެ މައްޗަށް ބިނާވާ ނިންމުންތަކަކީ އެކަންކަމުގެ މައްޗަށް ކޯޓުތަކުގެ އިހްސިސާސް ނުހިނގާ ކަންކަން ކަމުގައިވާ އިރު، މަޖިލިހުގެ ގަަވައިދަށް ގެނައި އިސްލާހުތަކުގައިވާ ގޮތުގެ މަތިން ނިންމާ ނިންމުންތަކަކަށް ފަހުން ފައިސަލާކުރުމުގެ ފުރުސަތު ކޯޓުތަކަށް ނެތަސް، އަދި މަޖިލިހުގެ ގަވައިދަކުން ވިޔަސް ގާނޫނުއަސާސީއާ ހިލާފަށް އަމަލު ނުކުރެވޭނެތީ މައްސަލައިގައި ފައިސަލާ ކުރަނިވި ހުކުމެއް ކުރުމުގެ ކުރިން ވަގުތީ އަމުރެއް ނުނެރިފި ނަމަ، މައްސަލައިގެ މައުޟޫއުގައި ހިމެނޭ ކަންކަމުގެ މުއާމަލާތް ކެނޑުމުގެ އިހްތިމާލް އެބައޮތް ކަމަށެވެ.

އެހެންވެ، މެމްބަރުންގެ އަދަދު ގުނާނެ ގޮތާ ބެހޭގޮތުން މަޖިލީހުގެ ގަވާއިދަށް ގެނައި އިސްލާހު ގާނޫނު އަސާސީއާ ހިލާފް ކަމަށް ދައުލަތުން ތުހުމަތު ކުރާ ހާލަތެއްގައި، އެ އިސްލާހަށް އަމަލުކުރުން މަޑުޖައްސާލަން ޖެހޭ ކަމަށް އެ އަމުރުގައިވެއެވެ. ޖުމްލަ މެމްބަރުންގެ އަދަދު ކުރިން ގުނަމުން އައީ ގާނޫނު އަސާސީގައި ބުނެފައިވާ ގޮތުގެ މަތިން ކަމަށް ވާއިރު، ކޯޓުން ގޮތެއް ނިންމަންދެން މަޖިލީހުން ކުރިން އަމަލުކުރި ގޮތް ދެމި އޮންނަން ޖެހޭ ކަމަށް އެ އަމުރުގައިވެއެވެ.

އެހެންވެ، މި ހާލަތުގައި ވަގުތީ އަމުރު ނެރުން ލާޒިމް ކަމަށް އެ ރައުޔުގައި ބުނެފައިވެއެވެ.