ވެރިކަން ކުރާ ޕާޓީ ޕީޕަލްސް ނެޝަނަލް ކޮންގްރެސް (ޕިއެންސީ) އިސްވެ އޮވެ ސަރުކާރުން ގެންދަނި ރައްޔިތުންގެ ޒާތީ މައުލޫމާތު ނަހަމަ ގޮތުގައި ބޭނުންކޮށް ލޯންޑަރ ކުރަމުން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި، ރައްޔިތުންނަށް ނޭނގި އެ ރައްޔިތުން ޕީއެންސީއަށް ވައްދަމުން ގެންދާ މައްސަލައަށް އިޝާރާތްކުރައްވާ ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، ރައްޔިތުން ސަރުކާރަށް އިތުބާރުކޮށް އެ ރައްޔިތުންގެ ޒާތީ މައުލޫމާތު ރައްކާތެރިކުރަން ދައުލަތާ ހަވާލުކޮށްފައިވަނިކޮށް އެކަމުން ވެސް ވައްކަންކޮށް އެ ރައްޔިތުންގެ އިތުބާރު ގެއްލުވާލައިފި ކަމަށެވެ.

ރައީސް ޔާމީން ވިދާޅުވީ، އެ ކަމަކީ އެހާ ކުޑަކަމެއްގެ ގޮތުގައި ސިފަކޮށް ފަސޭހަ ކަމާ އެކު ދޫކޮށްލެވިގެންވާ ފަދަ ޖަރީމާއެއް ނޫން ކަމަށާ ރައްޔިތުންގެ ޒާތީ މައުލޫމާތުން ވައްކަން ކުރުމަށް ވުރެ ބޮޑު ކުށެއް ނޯންނާނެ ކަމަށެވެ.

ރައީސް ޔާމީން ވިދާޅުވި ރައްޔިތުންގެ ޒާތީ މައުލޫމާތުން ވައްކަންކޮށްފައިވަނީ ހުރިހާ ވެރިންނާ އިދާރާތައްވެސް ގުޅިެޅިގެން ކަމަށާ އެކަމުގެ އިސް މޭސްތިރިއަކީ ރައީސުލްޖުމްހުރިއްޔާ ކަމަށެވެ. ރައީސް ޔާމީން ވިދާޅުވި ރައީސް މުއިއްޒަށް ނޭނގި މިކަންކަން ނުހިނގާނެ ކަމަށެވެ.