އެއް ޖިއްސުން ގުޅުން ހިންގާ ލިވާތު ކުރުމަކީ އިސްލާމް ދީނު ގަބޫލުކޮށްގެން ތިބި މި ސައްތައިން ސައްތަ ގައުމުގެ ރައްޔިތުން އެދޭ ކަމެއް ނޫން ކަމަށާ އެހެންކަމުން ލިވާތު ހުއްދަ ކުރާ މުއާހަދާއެއްގައި ބައިވެރިވެ ސޮއިކުރި ސަބަބުން ދިވެހި ސަރުކާރުން ރައްޔިތުންނަށް ހާމަކޮށްދޭން ޖެހޭ ކަމަށް ގާނޫނީ ވަކީލު އަލްއުސްތާޛު އަލީ ޝާހު ވިދާޅުވެއްޖެއެވެ.

ޕީއެންއެފުން ބޭއްވި ޖަލްސާގައި ވާހަކަ ދައްކަމުން ޝާހު ވިދާޅުވީ، މި ސަރުކާރުން ގައުމު ދުވަސް ދުއްވާލައިފި ކަމަށާ އެހެންކަމުން ދެން ބަލަން ތިބެވޭ ވަރަށް ވުރެ ކަންކަން ގޯސްވެއްޖެކަމަށެވެ. ގައުމުގެ މިނިވަންކަމާ އިސްތިގުލާލު ހިމާޔަތްކުރުމަކީ ކޮންމެ ދިވެއްސެއްގެ މައްޗަށް އޮތް ވާޖިބެއްކަން ފާހަގަކުރައްވާ ޝާހު ވިދާޅުވީ، މަވެތިކަމާ ބޮޑާކަމާ ކިބުރުވެރިކަމުގެ ހުތުރު ސިފަތަކުން ގައުމު މިއަދު ޖަރީވެފައިވާ ކަމަށާ ވެރިކަމުގެ ލަޒައްތާ ޖާހަތަށްޓަކައި މުޅި ނިޒާމު ވެރިންގެ ގަޔަށް ހެޔޮވަރު ފޭރާމަކަށް ވެސް ސަރުކާރުން ހަދާފައިވާ ކަމަށެވެ.

ބެލެވޭ ގޮތުގައި ޝާހު އެ އަިޝާރާތްކުރެއްވީ މި ސަރުކާރުން ދަޅު މަހުގެ އެކްސްޕޯޓު ކަނޑާލަދޭތޯ، ސޮއިކޮށްފައިވާ ސަމޯއާ އެގްރިމަންޓަށެވެ. ދީނީ ގޮތުން ފުށު އަރާ ކަންކަން އެ އެގްރިމަންޓުގައި ހިމެނެއެވެ. އެގޮތުން މި އެއްބަސްވުމުގައި ހަ ދާއިރާއަކަށް ބިނާވެފައިވާ ގާނޫނީ އޮނިގަނޑު ހާމަކޮށްފައިވެއެވެ. އެއީ ހިއުމަން ރައިޓްސް އެންޑް ޑިމޮކްރަސީ، ޕީސް އެންޑް ސެކިއުރިޓީ، ޑިވެލޮޕްމަންޓް، އިކޮނޮމިކް ގްރޯތު، ކްލައިމެޓް ޗޭންޖް އަދި މައިގްރޭޝަން އެންޑް މޮބިލިޓީއެވެ.

މީގެ ތެރެއިން ހިއުމަން ރައިޓްސް އެންޑް ޑިމޮކްރަސީގެ ދަށުން އެއް ޖިންސުން ގުޅުން ހިންގަން ފުރުސަތު ދިނުމާއި، އެބޯޝަން ހެދުމުގެ ހުއްދަ ދިނުމުގެ އިތުރުން ދީނީ މިނިވަންކަން ދިނުންވެސް ސަމޯއާ އެގްރީމެންޓުގައި ވަނީ ހިމަނައިފައެވެ.