ބޭރު ފައިސާގެ އާމްދަނީ ލިބޭ ފަރާތްތަކުން ވަކި އަދަދަކަށް ޑޮލަރު މާރުކުރަން މަޖުބޫރުކުރާ ގޮތަށް ގާނޫނަށް ގެނައި ބަަދަލާ ގުޅިގެން ބައެއް ރިސޯޓުތަކުން މުވައްޒަފުންނަށް މުސާރަ އާއި ސާވިސް ޗާޖު ރުފިޔާއިން ދޭކަމަށް ބުނެ ޓޫރިޒަމް އެމްޕްލޮއީސް އެސޯސިއޭޝަން އޮފް މޯލްޑިވްސް (ޓީމް) އިން އެކަން ކުށްވެރިކޮށްފިއެވެ.

މިކަން ހާމަކޮށްފައިވަނީ ޓީމުން ނެރުނު ނޫސް ބަޔާނެއްގައެވެ.

އެގޮތުން މުސާރަ އާއި ސާވިސް ޗާޖު ރުފިޔާއިން ދިނުމުން އާމްދަނީން 3،000 ރުފިޔާ ނުވަތަ 5،000 ރުފިޔާ ދަށްވާކަމާއި ތަކެތީގެ އަގާއި ދިރިއުޅުމުގެ އަގު ދުވަހެއް ދުވަހަކަށްދަނީ އުފުލެމުންކަން ފާހަގަކޮށް އެއީ ތަހައްމަލު ކުރެވޭނެ ކަމެއް ނޫންކަމަށް ޓީމުން އެ ބަޔާނުގައި ބުނިއެވެ.

ޓޫރިޒަމް ދާއިރާގައި މަސައްކަތްކުރާ ދިވެހިން އިތުރުކުރަން ގޮވާލާ، މުވައްޒަފުން ރުފިޔާއިން މުސާރަ އާއި ސާވިސް ޗާޖު ނުނަގަންވެސް ޓީމުން އެދެއެވެ. މީގެ އިތުރުން ވަޒީފާގެ އެއްބަސްވުން ބަދަލުނުކުރުމަށާއި ރުފިޔާއިން މުސާރަ އާއި ސާވިސް ޗާޖް ދިނުން ހުއްޓުވަން ސަރުކާރަށްވެސް އެ ބަޔާނުގައިވަނީ ގޮވާލާފައެވެ.

ބޭރު ފައިސާގެ ގާނޫނަށް ގެނައި އިސްލާހުގައިވާ ގޮތުން ރާއްޖޭގެ ރިސޯޓުތަކުން އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރަން ޖެހެ އެވެ. ނޫން ނަމަ އާމްދަނީގެ %20 މާރުކުރުމުގެ އިހްތިޔާރު ރިސޯޓްތަކަށް ވަނީ ދީފައެވެ.