ރާއްޖޭގެ އެކި ހިސާބުތަކަށް ވައި ނުސާފުވަމުންދާތީ މިކަމަށް ސަމާލުވުމަށް ލްތު ޕްރޮޓެކްޝަން އޭޖެންސީ (އެޗްޕީއޭ)އިން އިލްތިމާސްކޮށްފިއެވެ.
އެޗްޕީއޭއިން އެކްސްގައި ކުރި ޕޯސްޓެއްގައި ވަނީ، ވައި ނުސާފުވަމުންދާއިރު ސަމާލުކަން ދޭންވީ ކަންކަން ފާހަގަކޮށްފައެވެ. އެގޮތުން ފުއްޕާމޭގެ ބަލިތަކާއި ހިތުގެ ބަލި، އެލާޖީ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަ ނުކުރުމަށާއި، ބޭރަށް ނުކުންނަން ޖެހޭ ހާލަތްތަކުގެ ރައްކާތެރި މާސްކު އެޅުމަށް އެޗްޕީއޭ އިން އިލްތިމާސްކޮށްފައިވެއެވެ
މީގެ އިތުރުން ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ބޭރުގައި ގިނަވަގުތު ހޭދަނުކުރުމަށާއި ތުއްތު ކުދިން ވައި ނުސާފު ވަގުތުތަކުގައި ބޭރަށް ނުނެރުމަށް އިލްތިމާސްކޮށްފައިވެއެވެ.
އެޗްޕީއޭ އިން ބުނީ އެފަދަ ވަގުތުތަކުގައި ގޭގެ ދޮރުތައް ލައްޕައި، ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންކަން މަޑުޖައްސާލުން މުހިންމު ކަމަށެވެ.
ރާއްޖެއަށް މިދުވަސްވަރަކީ ވަރަށް ބޮޑަށް ވައި ނުސާފު ވެފައިވާ ދުވަސްވަރެކެވެ. ބައެއް ފަހަރު ހިމާލަޔަން ސަރަހައްދުން ހިރަފުހާއި ދުން، ވަޔާއެކު ބޭ އޮފް ބެންގަލް ހުރަސްކޮށް ރާއްޖެއާ ހަމައަށް ފޯރުމުން ވެސް މިހެން ދިމާވެ އެވެ.
ވައި ތަޣައްޔަރުވެ ނުސާފުވުމުގެ ސަބަބުން ހަމަ ލޮލަށް ދުރު ފެންނަ ގޮތާއި ދުރުމިން ވެސް މި ދުވަސްވަރު ވަނީ ވަރަށް ބޮޑަށް ދަށްވެފަ އެވެ. އެކަން މިދިއަ ހަފުތާއިން ފެށިގެން ވެސް ފާހަގަވާން ފަށާފައިވެއެވެ.
