ރައީސް މުހައްމަދު މުއިއްޒުގެ ތަރި ދަނީ އޮއްސެމުންކަމަށް ޕީޕަލްސް ނޭޝަނަލް ފްރަންޓްގެ ސެކްރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެ އެވެ.

މަލީހު މިފަދައިން ވިދާޅުވެފައިވަނީ ކުރެއްވި އެކްސް ޕޯސްޓެއްގައެވެ.

އެ ޕޯސްޓުގައި ރައީސް މުއިއްޒުގެ ސަރުކާރުން ކުރިއަށްގެންދާ ސިޔާސީ ދައުވާގައި ރައީސް އަބްދުﷲ ޔާމީން އަބްދުލްގައްޔޫމަށް ސާބިތުކަން ދެއްވުމަށް މަލީހުވަނީ އެދިލައްވާފައެވެ. އަދި އެމެރިކާގެ ރައީސް ޑޮނަލްޑް ޓްރަންޕް ހުވާކުރައްވާ ދުވަހު އެ މައްސަލައިގެ އަޑު އެހުމެއް ތާވަލް ކުރުމާއި ގުޅިގެން އެމަނިކުފާނުވަނީ އެއީ އިއްތިފާގެއްތޯ ސުވާލު އުފައްދަވާފައެވެ.

އެގޮތުން ރައީސް މުއިއްޒުގެ ތަރި އެދަނީ އޮއްސެމުންކަމަށް ވިދާޅުވެ އެމަނިކުފާނުގެ މަސައްކަތްޕުޅު ހުއްޓާލައްވާނީ ރައީސް ޔާމީން ވެރިކަމަށް ގެނައުމަށްފަހުކަމަށްވެސް މަލީހު ފާހަގަ ކުރެއްވިއެވެ.

މަލީހު މިފަދައިން ވިދާޅުވެފައިވާ އިރު މިއަދުވަނީ ރައީސް ޔާމީންގެ ވ. އާރަށް މައްސަލަ އާއި ގުޅޭ އަޑު އެހުމެއް ކުރިއަށްގޮސްފައިކަން ފާހަގަކޮށްލެވެއެވެ.