ހައްގުތައް ދިނުމުގައި ހުރިހާ ފަރާތްތައް ހަމަހަމަ ވާން ޖެހޭނެ ކަމަށާ ދައުލަތަށްވެސް ހައްގުތައް ކަށަވަރުވާން ޖެހޭނެ ކަމަށް ދައުލަތުގެ ވަކީލުން ވަކާލާތުކުރެއްވި ކުރުމަށް ރައީސް އަބްދުﷲ ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ރައްދު ދެއްވައިފިއެވެ.

އާރަށުގެ މައްސަލައިގައި ދައުލަތުން ހުށަހެޅި އައު ހެކި އެއް ފަރާތްކޮށް އަލުން އެ މައްސަލަ ބެލުމަށް ހައިކޯޓުން ދަށު ކޯޓަށް ތަހްވީލު ކުރުމުން އައު ހެއްކާ ބެހޭ ބައި ދައުލަތުގެ ފަރާތުން ސުޕްރީމު ކޯޓުގައި އިސްތިއުނާފުކޮށްފައިވާ މައްސަލައިގެ އަޑު އެހުމުގެ ފަހު ބަސް ބުނުމަށް މިއަދު އަޑު އެހުމެއް ބޭއްވިއެވެ.

އެ އަޑު އެހުމުގައި ދައުލަތުގެ ފަރާތުން ވާހަކަ ދައްކަވަމުން ޕަބްލިކު ޕްރޮސެކިއުޓަރ އަހުމަދު ޝަފީއު ވިދާޅުވެފައިވަނީ، ދައުލަތުގެ ފަރާތުން ދަށު ކޯޓު މަރުހަލާގައި އާ ހެކި ހުށަހަޅަން ޖެހުނީ ދިފާއުން ޑޮލަރު މާރުކުރަނީ ކަމަށް ބުނެ ދޮގު ހެކިބަސް ދިނުމުން ކަމަށެވެ. އެހެންވެ، ދައުލަތުން ސުޕްރީމް ކޯޓުގައި އެދުނީ އެ ހެކިތަކާ ގުޅޭ ގޮތުން ދެ ފަރާތުން ބަހުސްކޮށް، ހެކިތައް ބަލައިގަތުމާ މެދު ދަށު ކޯޓުން އަލުން ގޮތެއް ކަނޑައަޅަން އަންގައިދިނުމަށެވެ. އަދި އެހެން އެކަން ނުކޮށްފިނަމަ ހައްގުތަކެއް ގެއްލިގެން ދާނެ ކަމަށްވެސް ޝަފީއު ވިދާޅުވިއެވެ

ޝަފީއުގެ އެ ވާހަކައަށް ރައްދުދެއްވަމުން ޑރ ޖަމީލު ވިދާޅުވީ، ނިމިގެން ޝަރީއަތުގެ މަރުހަލާތަކަށް ބަލާއިރު ހައްގު ގެއްލުނީ ކާކުގެ ތޯ ވަޒަންކުރަން ޖެހޭ ކަމަށެވެ.

ޑރ ޖަމީލު ވިދާޅުވީ ވާހަކަ ދެކެވެނީ ވަރަށް ޚައްސާސު ކަމާ ގުޅިގެން ކަމަށްވާއިރު، އައު ދޮރެއް ހުޅުވަން ދައުލަތުން މަސައްކަތްކުރާއިރު ހައްގު ގެއްލުނީ ދައުލަތުގެ ނޫން ކަމަށްވެސް ޑރ ޖަމީލު ވަނީ ވިދާޅުވެފައެވެ.

ޑރ ޖަމީލު އިތުރަށް ވިދާޅުވީ ޖިނާއީ އިޖުރާއަތުގެ ގާނޫނުގެ ދަށުން ސުޕްރީމު ކޯޓުން މިއަދު އިތުރު ދޮރެއް ހުޅުވާދެއްވައިފިނަމަ ސުޕްރީމު ކޯޓު ބޮޑު ޖޯކަކަށް ވެގެން ދިއުން އެކަށީގެންވާ ކަމަށެވެ.