މާލޭގެ މަގުތަކުގައި ގަވާއިދާ ހިލާފަށް ޕާކު ކޮށްފައި ހުރި އުޅަނދު ޓޯ ކުރުމަކީ މި ސަރުކާރުން ވަރަށް ކުރާހިތުން ކުރާ ކަމެކެވެ. މި ކަމުގައި އެޗްޑިސީއާއި ފުލުހުން ހުންނަނީ އަމަށަކު ފޯރި އެއް ނޫނެވެ. ވެރިކަމަށް އައުމަށް ވީ ވައުދު ފޮތުގައި އޮތީ ޕާކިން ބިލްޑިންތައް ހަދައި ނިމެންދެން ޕާކިން ވަޔަލޭޝަނަށް އަމަލު ނުކުރާނެ ކަމަށެވެ.

ނަމަވެސް ވެރިކަމާއި ހަވާލުވުމަށްފަހު "ޕާކިން ވަޔަލޭޝަނުން" ސަރުކާރަށް ލިބޭ ފައިސާގަނޑު ފެނިފާ ވައުދު އޮޅާ ޖެހީ އެވެ. ވެރިކަމުގެ ހުވާ ކޮށް ތިޖޫރީއާއި ބަޑި ގުދަނުގެ ތަޅުދަނޑި އަރަށް އެރުމާއި އެކު ލިބެން އޮތް ގޮތަކަށް ސަރުކާރަށް ފައިސާވައްދަން ހިފާލި އެވެ. އަދި ޖޫރިމަނާ އަކީ ދައުލަތައް އާމްދަނީގެ ގޮތުގައި ފައިސާ ލިބޭނެ ދާއިރާއެއް ކަމަށް ނިންމާ ސަރުކާރުން ބަޖެޓުގައި ލިބޭނެ އަންދާޒާގެ އަދަދުތައް 80 މިލިއަނުން 90 މިލިއަކުން ޖަހަން ފެށި އެވެ.

އިސާހިތަކު މާލޭގެ މަގުތަކުގައި ގަވާއިދާ ހިލާފަށް ޕާކު ކޮށްފައި ހުރި ވެހިކަލްތައް "ޓޯ" ކުރުމުން ސަރުކާރަށް ލިބޭނެ ފައިސާގެ ހިސާބެއް ޖައްސަވާ ވެހިކަލްތައް ޓޯ ކުރަން އަމުރު ކުރި އެވެ. ދެން ފަހެ، ދިވެހި ފުލުހުންގެ ހިދުމަތުން ނިކުމެ މާލޭގެ މަގުތަކުގައި ގަވާއިދާ ހިލާފަށް ޕާކު ކޮށްފައި ހުރި ވެހިކަލްތައް "ހިފާ ހައްޔަރު" ކުރަން ފެށިއެވެ.

މި މަސައްކަތުގައި އާންމު ރައްޔިތުންގެ އަގު ބޮޑު މުދަލަށް ލިބޭނެ ގެއްލުމަށް އެއްވެސް ފަރުވާލެއް ނެތި އެވެ. ބައެއް ފަހަރު ހަތަރު ފުރޮޅުލީ އުޅަނދު ހަތަރު ކަނުގައި ހިފާ ޕިކަޕަށް ޖަހަން އުޅޭ ހެން ހީވާ މަންޒަރުވެސް ފެނެ އެވެ. ސައިކަލެއް ނަގާ ފުލުހުންގެ ބޮޑު ލޮރީއަށް ބަރިބަރިއަށް ޖަހާލަނީ ދެ ފުލުހުން ދެކޮޅުގައި ހިފާ ވަރަށް ކުރާ ހިތުން ނެވެ.

ނަމަވެސް ޓޯ ކުރާ ވެހިކަލް ގެން ގޮސް ބަހައްޓަން ހަދައިފާ ހުރި ތަނުގައި ފުޅާރެއްނެތެވެ. ދޭ ހާ އަތްވެއް ވެހޭހާ ވާރެއަށް ވެހިކަލް ދޫކޮށްލަނީ ހިނިތުންވެ ހުރެ އެވެ. ވެހިކަލްތައް ކިތަންމެ ވަރަކަށް ޓޯ ކުރިޔަސް މުޅި މައްސަލަަ ހައްލު ކުރަން ދުރުރާސްތާގެ ޕްލޭނެއް ހަދައި އެ އަށް އަަމަލު ކުރުމެއް ނެތެވެ.

އުޅަނދުތައް ޓޯ ކުރުމުގެ މަސައްކަތުގައި ފުލުހުންގެ އެހީ އަށް ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ)ވެސް އެދޭއިރު ވެހިކަލް ޓޯ ކުރާ ވެހިކަލެއް ހޯދުމުގެ ވިސްނުން ވެސް މުއްސަދި އެޗްޑީސީގައި ވެސް ނެތެވެ. އެކަމަކު "ޕާކިން ވަޔަލޭޝަނުން" އާމްދަނީ ހޯދުމަށް ސަރުކާރުން ކުރާ މަސައްކަތުގައި އެޗްޑީސީ ވެސް އޮތީ ފޫގަޅާފަ އެވެ. ޓޯ ކުރަން ބޭނުންކުރާ ވެހިކަލް ހޯދުމާއި ޓޯކުރާނެ ތަނަވަސް ޖާގަ ހޯދުމަކީ އެޗްޑީސީއަށް ވެސް މާގަޔާވެ ކުރާކަމަކަށް ވަނީ ވެފަ އެވެ.

ވެހިކަލް ޓޯ ކުރާ މައްސަލައިގައި ކަންބޮޑުވުން ފާޅުކުރި މީހަކު ބުނީ ވޯޓް ހޯދަންވީމަ، ޕާކިން ބިލްޑިން އަޅާފަ ޕާކުރާތަން ދައްކާފަ ނޫނީ ސްޓިކާ އަދި ޓޯ ނުކުރާނަމޭ ބުނާ އަޑު އިވޭ ކަމަށާއި ނަމަވެސް ވެރިކަމުގެ ހުވަޔަށްފަހު ކަންހިނގާ މިދަނީ ވިނަރެއް ފުލެޓް ލިސްޓަށް ވާ ގޮތަށް ކަމަށެވެ.

އިތުރު މީހަކު ބުނީ ޓޯކުރާނެ އުޅަނދު ދުނިޔޭގެ ތަހުޒީބު ގައުމުތަކަށް ބޮޑު ހަރަދުކޮށް ރައީސް މުއިއްޒު ކުރައްވާ ދަތުރުތަކުން ފެންނަ ގޮތް ހަދަން ވެއްޖެ ކަމަށާއި މާލޭ ސިޓީގެ މޭޔަރަކަށް ހުރެގެން ގައުމުތަކަށް ކުރި ދަތުރުތަކުގެ ފައިދާ ވެސް މާލޭގެ މަގުތަކުން ފެންނަން ނެތް ކަމަށެވެ.

އޭނާ އިތުރަށް ބުނީ އާންމުން މި ހުރިހާ ތަކުލީފެއް އުފުލަން ޖެހުނަސް ސައިކަލާއި ކާރު އެތެރެކޮށް، އެ އިން ވިޔަފާރި ކުރާ މީހުންނަށާއި ސަރުކާރަށް އޮންނަނީ ލިމިޓެއް ނެތި ވެހިކަލް އެތެރެ ކޮށް އާމްދަނީ ހޯދުން ކަމަށެވެ. އަނެއްކޮޅުން ޓޯކޮށް ވެހިކަލްތައް އުކައި ނައްތާލަ ލުމަކީ ސަރުކާރުތަކުގެ އުފަލެއް ކަމަށެވެ.

ރައްޔިތުންގެ އަގުބޮޑު ސްޕޯޓްސް ކާރުތަކާއި ހަތަރު ފުޅޮރުލީ އެންމެ ޒަމާނީ ކާރާއި ސައިކަލް ޓޯ ކުރުމަށް ފުލުހުން އަދިވެސް ގެން ގުޅޭނީ ފޯކް ލިފްޓެވެ. މާލޭ ފެންހިންދަން ސިފައިން މަސްއޮނޑި ފެންޕަންޕް ބޭނުން ކުރާ ޒާތަށެވެ.

ކުނި ޖަމާ ކުރާ ޓޯޔާޑެއް ހިނގާ އުސޫލުން މާލޭގައި މި އޮންނަނީ ފުރި ބަންޑުންވާ ވަރަށް ވެހިކަލް ޖަމާކުރުމާއި ނައްތާލުމެވެ. ވެހިކަލަށް ދައްކަން ޖެހޭ ޕޭމަންޓުތަކާއި އަހަރީ ފީ އާއި ރޯޑުވާދިނަސް އާއި އިންޝުއަރެންސްގެ އިތުރުން ޖޫރިމަނާތަކާއި ސްޓިކާތަކަށް ފައިސާ ދައްކާ ދައްކާ މީހާ ހަފުސް ވިޔަސް ވެހިކަލް ޓޯ އުޅަދެއް ގަންނާނެ ހަކަތަ ސަރުކާރުގައި ނެތެވެ.

ޕާކިން ޖޫރިމަނާގެ އިތުރުން އެހެނިހެން ޓްރެފިކް ވަޔަލޭޝަންތަކުގައި ކުރާ ޖޫރިމަނާ ތަކުން ދައުލަތައް މިލިއަނުން ފައިސާ ވަދެއެވެ. ނަމަވެސް ދެރައީ މިލިއަނުން ޖޫރިމާކުރާއިރު ޓޯ ވެހިކަލް އެއް ގަނެލެވޭނެ ފައިސާ ވެސް ސަރުކާރުގައި ނެތީ މައެވެ.

މިހެން އެތައް އަހަރެއްވެ، މުއިއްޒު ސަރުކާރަށް 13 މަސް ނިމިދިޔަ އިރު މުޅި މައްސަލައިގެ ހައްލުގައި އަދިވެސް އޮތީ އަތް ނުލައި "ޕާކު" ކޮށްފަ އެވެ. ޕާކް ކުރާނެ ޒަމާނީ "ސިސްޓަމްތައް" ގެނެސް ރާވައިގެން އެ އަށް ބަލަހައްޓައިގެން ތިބޭތާ އެތައް ދުވަހެއް ވެއްޖެ އެވެ.