އަމިއްލަ ކުންފުންޏަކުން ގއ. ނިލަންދު އާއި އެ އަތޮޅު ދާންދު އަށް ރޯދަ ހަދިޔާ ހިފައިގެން ދަތުރުކުރި ދޯންޏެއް މިއަދު ފަރަށް އަރައިފި އެވެ.
ނިލަންދޫ ކައުންސިލުން މީޑިއާތަކަށް ފޮނުވި މެސެޖެއްގައި ބުނީ ފަރަށް އެރި ބޯޓުގައި ސަވާދު ހަދިޔާކުރަން ފޮނުވި 1،070 އަށްވުރެ ގިނަ ކާޑު ބަސްތާ ހުރި ކަމަށެވެ. އެ އިދާރާއިން ހިއްސާކުރި ވީޑިއޯއިން ފެންނަ ގޮތުގައި މީގެ ތެރެއިން ގިނަ ބަސްތާތައް ވަނީ މޫދަށް ފައިބައިގެން ގޮސްފަ އެވެ.
ގއ. އެކެފަރު ފަރަށް އަރާފައިވަނީ ލިއޯ ކުންފުނީގެ ދޯންޏެއް ކަމަށްވާ "ލިއޯ ވިންގް" އެވެ. ދޯންޏަށް ލިބިފައިވާ ގެއްލުންތަކުގެ ތަފުސީލެއް މިހާތަނަށް ސާފުވެފައެއް ނުވެ އެވެ.
މި ހަނޑުލާއި ފުށާއި ހަކުރަކީ ލިއޯ ޓްރޭޑިންގެގެ ޗެއާމަން އަބްދުﷲ ސަވާދު ރޯދަ ހަދިޔާގެ ގޮތުގައި ނިލަންދު އާއި ދާންދު އަށް ފޮނުވި ކާޑެވެ.
ކައުންސިލުން ބުނީ ދޯނި އެކެފަރު ފަރަށް އެރުމުން އެ ހުރިހާ ކާޑެއް ވަނީ މޫދަށް ގޮސްފަ އެވެ.
އެ ކުންފުނިން ވާހަކަ ދެއްކި އޮފިޝަލަކު ވިދާޅުވި ގޮތުގައި ދޯނި ފުންކުރުމުގެ މަސައްކަތް މިހާރު އަންނަނީ ކުރަމުންނެވެ.
މިކަމާ ގުޅިގެން އެމްއެންޑީއެފް އަދި ދިވެހި ފުލުހުންގެ ހިދުމަތުން އަދި އެއްވެސް މައުލޫމާތެއް ހާމަކުރައްވާފައެއް ނުވެ އެވެ.
