ރައީސް މުހައްމަދު މުއިއްޒަކީ އެހެން ރައީސުންނަށް ކުރަން ކެރިވަޑައިނުގެން ހުރި ކަންކަންކުރައްވާ ވެރިއެއްގެ ގޮތުގައި ޕީއެންސީގެ ފަރާތުން މެޑަލް ޖަހަމުންދާއިރު އެމަނިކުފާނަކީ ސިޠާސީ ޕާޓީތަކުގެ ތެރެއިން މަނީ ލޯންޑަރ ކުރައްވަން ވެސް ކެރިވަޑައިގެންނެވި ހަމައެކަނި ރައީސް ކަމަށް، ރައީސް އަބްދުﷲ ޔާމީން ވިދާޅުވެއްޖެެވެ.

އެމަނިކުފާނު މިފަދައިން ވިދާޅުވެފައިވަނީ، ބުރާސްފަތި ދުވަހުގެރޭ ޕީއެންއެފް ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ ޕީޕީއެމް އުވާލާ ޕީއެންސީއަށް މެމްބަރުން އިތުރުވާނެކަމުގެ މަގްސަދުގައި ރައީސް މުއިއްޒު ޖެއްސެވި ހިސާބު ދިމާނުވުމުން ދެން އެމަނިކުފާނާ ސަރުކާރުގެ ވެރިން ދިމާކުރީ ރައްޔިތުންގެ ޒާތީ މައުލޫމާތުން ވައްކަންކޮށްގެން ޕާޓީއަށް އީސިގެ ތެރެއިން ނަހަމަ ގޮތުގައި ފައިސާ ވައްދާ ފައިސާގެ ބޭނުންކުރުމަށް ކަމަށެވެ.

އެހެންކަމުން އެ އަމަލަކީ ޓެރަރިޒަމް އަސް ފައިނޭންސްކުރުން ހުއްޓުވުމާ މަނީ ލޯންޑަރިންގެ ގާނޫނުގެ ތެރެއިން ކުށަކަށް ވާނެކަން ފާހަގަކުރައްވާ ރައީސް ޔާމީން ވިދާޅުވީ، އެހެންކަމުން ޕީއެންސީގެ ބޮޓު ކުދިންކޮޅު އެކަންވެސް ފާހަގަކޮށް އަތް ޖަހަން ރައްޔިތުން ގާތު ބުނެދޭން ވާނެ ކަމަށެވެ.

ރައީސް ޔާމީން އިތުރަށް ވިދާޅުވީ، ގާނޫނު ދަމަހައްޓާ ކަމަށްވަނީނަމަ ސެނެޓުން ނިންމާ ނިންމުމަށް ޕާޓީ އެއް އުވާނުލެވޭނެކަން އީސީއަށް އެނގެންވާނެ ކަމަށާ އަދި ޕީއެންސީގެ ފޯމުތައް ސައްހަ ނޫން އިރުވެސް އެ ފޯމުތަކަށް ފައިސާ ދޫކޮށްފައިވާނަމަ އީސީ މެމްބަރުންވެސް އެ ވައްކަމުގައި ބައިވެރިވިކަމުގެ ތުހުމަތު އޮންނާނެ ކަމަށެވެ.