ރައީސް ޑރ މުހައްމަދު މުއިއްޒުގެ ސަރުކާރަށް އެ އަހަރާ 2 މަސް ދުވަސް ފާއިތުވި އިރުވެސް ފެނިގެންދަނީ ކަންކަން ހަމަ މަގަށް އަޅުވާ ހިންގައިގަންނަން ނޭނގިގެން އުޅޭ މަންޒަރު ކަމަށް ޕީއެންއެފްގެ އިސް ސަފުގައި ހަރަކާތްތެރިވާ މުހައްމަދު އަހުމަދު ވަހީދު (ވައްޑެ) ވިދާޅުވެއްޖެއެވެ.

"ޗެނަލް13"ގެ "ނިއުސް ޓޯކު" ޕްރޮގްރާމުގައި ވާހަކަ ދައްކަވަމުން ވައްޑެ ވަނީ މިނިސްޓްރީތައް އެއްކޮށްލައިގެން ސަރުކާރު ހިންގަން ރައީސް މުއިއްޒު ފެއްޓެވި ސިޔާސަތަށް އަލި އަޅުވާލައްވާފައެވެ.

ވައްޑެ ވިދާޅުވި ގޮތުގައި އެހެން އެކަން ކުރަން ރައީސް މުއިއްޒަށް މަޖްބޫރުވީ ކަމަށާ އެއީ ސަރުކާރު ތެރޭގައި އިންތިހާއަށް ކޮރަޕްޝަން ހިންގާ ރައްޔިތުންގެ އިތުބާރު ވެސް ގެއްލިފައިވުމުން، ރައީސް މުއިއްޒު އަރިހު ތިއްބެވި މަދު ބައެއްގެ ތެރެއިން ބައެއް ވަޒީރުންނަށް އިތުބާރުކުރުން ނޫން ގޮތެއް ރައީސް މުއިއްޒަށް ނެތުމުން ކަމަށެވެ.

ވައްޑެ ވިދާޅުވީ، ސަރުކާރު ހިންގުމުގެ ތަޖުރިބާ ރައީސް މުއިއްޒު ކިބައިގައި ނެތްއިރު ކަމުގެ ތަޖުރިބާ ލިބިފައި ތިބި ބަޔަކު ދޭ ލަފާވެސް އަހާ ގަބޫލުކުރަން ރައީސް މުއިއްޒު ބޭނުންފުޅުނުވާ ނުވުމުގެ ނަތީޖާ ފެންނަމުންދާ ކަމަށާ އެގޮތުން ގައުމު އިނދަޖެހި ސަރުކާރު ހިންގުން ނުކިސިޔާރުވެފައިވާ ކަން ވައްޑެ ފާހަގަކުރެއްވިއެވެ.

ވައްޑެ އިތުރަށް ވިދާޅުވީ، ރައީސް ޑރ މުހައްމަދު މުއިއްޒު ވަނީ ވައުދަށް ކަމޭ ނުހިތާ ބޮޑުތަނުން ދިވެހީންނަށް ބޭވަފާތެރި ވެފައިވާ ކަމަށެވެ.