ޑިޕްލޮމެޓިކު ގުޅުމަކީ ހުރިހާ ގައުމުތަކާއެކުވެސް ހަމަހަމަކަމާ އެކު އޮންނަން ޖެހޭ ގުޅުމެއްކަމަށްވެފައި ވަކި ގައުމަކަށް އެކަމުގައި އިސްކަންދިނުމަކީ ސުވާލު އުފެދޭނެ އެތައް ކަމެއް އެކުލެވިގެންވާ ކަމަކަށް ވެފައި އެކަމާ ދެކޮޅަށް ދިވެހިން ނުކުތުމަކީ ގާނޫނީ ގޮތުން ކުށަކަށް ހަދައި ރައްޔިތު މީހާ ގޮޅިއަކަށް ފެއްތުމަށް ކުރީ ސަރުކާރުން ވަނީ ގާނޫނުގެ ތެރެއިން ފުރުސަތު ހޯދާފައެވެ.

މުޅި ގައުމު ގޮތް ނޭނގޭ އެއްބަސްވުންތަކެއްގެ ތެރެއިން ވަކި ގައުމަކަށް ބަހާ ހިބައިން, ކުރީ ސަރުކާރުން ދީ ނިންމުމުން އެކަމާ ދެކޮޅަށް އޭރު ދިވެހިން ނުހަނު އަޑު އުފުލިއެވެ. އެގްރިމަންޓުތައް ހާމަކުރުމަށާ ދިވެހިންގެ ބިން ދިވެހިންގެ މިލްކިއްޔާތު ހިތު ހުރި ގޮތަކަށް ދޫނުކުރުމަށް ގޮވަމުން ދިޔައެވެ.

އަދުގެ ސަރުކާރުގެ ވެރިންވެސް ހިމެނެއެވެ. އިންޑިއާ ސިފައިން މިގަމުގައި ގާއިމުވެ ތިބި ކަމަށާ ގައުމީ ސަލާމަތަށް އެއަށް ވުރެ ބޮޑު ނުރައްކަލެއް ނޯންނާނެ ކަމަށް އޭރު، މިހާރުގެ ވެރިން ބުނަމުން ދިޔައެވެ.

ރިޔާސީ އިންތިހާބުގެ ތެރޭގައި އެންމެ ގަދައަށް ދެއްކި އެއް ވާހަކައަކީ އިންޑިއާ ސިފައިން މި ގައުމުން ބާލާނެ ވާހަކައެކެވެ. "ނޯ ކޮމްޕރޮމައިޒް ނޯ އަދަރ ޗޮއިސް އޭ" ވިދާޅުވެ ނިކަން ރަގަޅަށް ދިވެހިންގެ ލޮލުގައި ކުލަގަދަ އަދުނެއް އެޅުވިއެވެ.

ރައީސް އަބްދުﷲ ޔާމީން އަކީ ވިދާޅުވާ ބަސްފުޅުގައި ހިއްޕަވާ ވެރިއެއްކަމުން އެމަނިކުފާނުގެ ތާއީދާ އެކު ނުކުމެ ހުންނެވިކަން އިއުލާންކުރެއްވުމުން ދިވެހި ރައްޔިތުން ވޯޓުވެސް ދިނެވެ. ގޮނޑީގައި ވެސް ބޭންދިއެވެ.

އެހާ ހިސާބުން ދެން ރައްޔިތުން އެންމެ ލޯ ހުޅުވައިގެން ތިބީ އެއްކަލަ އިންޑިއާ ސިފައިންގެ މައްސަލައަށެވެ.

ގެނައި ދިވެހީންގެ ރާއްޖޭއިން އިންޑިއާގެ އަޅުވެތިކަމުގެ ވަސްވެސް ފިލުވާލާނެކަމުގެ ފުރިހަމަ އުއްމީދާއެކުއެވެ. ޝުކުރިއްޔާ ދިވެހީންގެ ނަމުގައި 2 އޮކްޓޯބަރު 2023ގައި ބޭއްވި ހަފްލާގައިވެސް ރައީސް ޑރ. މުހައްމަދު މުއިއްޒު އެ ވަހަކަފުޅު ތަކުރާރުކުރެއްވިއެވެ. މައިކެއް ނުވަތަ ޕޯޑިއަމެއް ކައިރީ ހުއްޓިވަޑައިގެންނެވޭ ކޮންމެ ފަހަރަކު އޭރު ދެއްކެވީ ހުސް އެ ވާހަކައެވެ.

މީގެ އިތުރުން އިންޑިއާ އުނގު ތެރެއަށް ނުވެއްޓޭނެކަން ރައްޔިތުންނަށް ކަށަވަރުކޮށްދިނުމަށް، ރައީސް އެންމެ ފުރަތަމަ ދަތުރު ކުރެއްވީ ވެސް ޗައިނާއަށެވެ. އިންޑިއާ ރާއްޖެ ގުޅުމުގައި ކުނި ޖެހެން ފެށީ އެހާ ހިސާބުންނެވެ. އިންޑިއާގެ ނުރުހުން ރާއްޖެއަށް އަމާޒުވެ ރާއްޖޭގެ ބަހުގެ ހަމަލާތައް އިންޑިއާ އަމާޒުކޮށް އުޅުނެވެ.

އުފެދުނު ހިތް ހަމަ ނުޖެހުމުގެ ތެރެއިން އިންޑިއާ ރާއްޖެއާ ދެމެދު މަޝްވަރާތަކެއް ކުރަން ފެށިއެވެ. އިންޑިއާ ރާއްޖެ މައްސަލަތަކުގައި މަޝްވަރާކުރުމަށް އުފައްދާފައިވާ ކޯ-ގްރޫޕުގެ މަޝްވަރާތައް ފަށާ ދެވަނަ ބައްދަލުވުން ނިމިގެން ދިޔައިރުވެސް އިންޑިއާއިން ގެންދިޔައީ ސިފައިން ބާލަން އެ ގައުމުން އެއްބަސްނުވާ ކަމަށް ބުނަމުންނެވެ.

ނަމަވެސް މިދިޔަ ހަފްތާގެ ތެރޭގައި އިންޑިއާގެ އެކްސްޓާނަލް މިނިސްޓްރީން ކޮންމެ ހަފްތާއަކު ކުރިއަށް ގެންދާ ނޫސްވެރިންގެ ބައްދަލުވުމުގައި ރަންދިރު ޖައިސްވަލް ބުނެފައިވަނީ މިހާރު ރާއްޖޭގައި ތިބި އެގައުމުގެ ސިފައިން ދެ ތާރީހެއްގެ މަތިން އަނބުރާ ގެންދަން މަޝްވަރާތަކުގައި އެއްބަސްވެފައިވާ ކަމަށާ ނަމަވެސް ބަދަލުގައި ދެން އިންޑިއާއިން ރާއްޖެއަށް ފޮނުވާނީ ފަންނީ ގާބިލު "ވެލް ޓްރެއިންޑް ސިވިލިއަނުން"ކަމަށެވެ.

އަސްތާ މިހާ ހިސާބުން ޖެހުނީ މި ބުނާ "ވެލް ޓްރެއިންޑް ސިވިލިއަނުން"ގެ ތަރުޖަމާއެއް ހޯދަންށެވެ. ހޯދި ހޯދުންތަކުންނާ އަދި ކުރި ދިރާސަތުން މި އެނގުނީ އެ ބުނާ "ވެލް ޓްރެއިންޑް ސިވިލިއަނުން"ނަކީ ޔުނިފޯމު ނުލާ ތިބޭ ސިފައިންކަމެވެ. ރާއްޖޭގައި ސިވިލް ޕޮލިހުން ތިބޭ އުސޫލުން އިންޑިއާގެ ވެސް ސިވިލް އަސްކަރީ ތަމްރީނުވެފައި ތިބޭ މީހުން ތިބެއެވެ.

އެހެންކަމުން އިންޑިއާ ސިފައިން ބޭލުމުގެ ނަމުގައި ރައީސް މުއިއްޒު ދިވެހިންނަށް މިވަނީ ޚިޔާނާތްތާއެވެ. ތަސްވީރު ބަލާނީ ތަސްވީރު ބުނާހެންނެވެ.

އިންޑިއާ ސިފައިން ބޭރުކުރުމުގެ ނަމުގައި މި ބޭރުކުރަނީ އެމީހުންގެ ޔުނިފޯމު އެކަނިތާއެވެ. މިވަރުގެ އޮޅުވާލުމެއް ދިވެހީންނަށް މި އޮޅުވާލާ ސަބަބު ހޯދަން ޖެހެއެވެ.

ރައީސް މުއިއްޒު އެވެ. ތިޔަ ބާލަނީ އިންޑިއާ ސިފައިނެއް ނޫނެވެ، އެ މީހުންގެ ޔުނީފޯމެވެ. މިކަމަށް މަނިކުފާނު ރައްޔިތުންނަށް ޖަވާބުދާރީވާން ޖެހިވަޑައިގަންނަވައެވެ. ނަމުން އިންޑިއާ އައުޓެވެ. ނަމަވެސް ކަމުން ތިޔަ ކުރައްވަނި އިންޑިއާ ޑަބަލްކޮށް އިން ނޫންތޯއެވެ؟