ހާލު ބޮޑު މާބަނޑު އަންހެނަކު ދުވަސް ނުފުރައި ވިހެއި ދަރިފުޅާ އެކު، އިތުރު ފަރުވާއަށް މާލެ ގެންނަން އުޅެނިކޮށް، ކުއްޑޫ އެއާޕޯޓު ރަންވޭ މައްޗަށް ނިޔާވެއްޖެއެވެ.

ނިޔާވެފައި ވަނީ ގއ. ވިލިނގިލީ ޒަމާނީވިލާ 37 އަހަރުގެ ފާތިމަތު ޝިއުނާ އެވެ. މިހާދިސާ ހިނގާފައިވަނީ ރޭގެ ވަގުތެއްގައެވެ.

ޝިނުއާ ބަލައި ކޫއްޑޫ އެއާޕޯޓަށް ޖެއްސި އެއާރ އެންބިއުލާންސްގެ ވެންޓިލޭޓަރު ހުރީ ހަލާކުވެފައެވެ. އެ ފްލައިޓުގައި ބަލި މީހަކަށް ދޭނެ އޮކްސިޖަން ނެތްކަމަށް އާއިލާއިން ހަތާވީސް އޮންލައިނަށްވަނީ މައުލޫމާތު ދީފައެވެ.

އެގޮތުން ޝިއުނާ މާލެ ގެންދިއުމަށް ކޫއްޑޫ ރަންވޭއަށް އެރުވީ ރޭ 11:40ގައި ކަމަށާއި ފްލައިޓަށް ނާރުވައި ރަންވޭގައި ބާއްވައިގެން ފަރުވާދެމުން ދަނިކޮށް، މެންދަމު 1:30ގައި ނިޔާވިކަމަށް މައުލޫމާތު ދީފައިވެއެވެ. އަދި ދަރިފުޅަށް އިތުރު ފަރުވާ ދިނުމަށް މާލެ އައި މަގުމަތީ ދަރިފުޅުވެސް ނިޔާވިކަމަށް އާއިލާއިންވަނީ މައުލޫމާތު ދީފަވާކަމަށް މީޑިޔާތަކުގައި ރިޕޯޓުކޮށްފައެވެ.

ބަނޑަށް އަށް މަހުގެ ޝިއުނާ ވަހީދު، 35، ވިލިނގިލީ ހޮސްޕިޓަލަށް ގެންދިޔައީ އަންގާރަ ދުވަހު ރޭގެ ވަގުތެއްގައި ނޭވާލާން އުނދަގޫވެގެންނެވެ. އޭނާގެ ހާލު ރަނގަޅުނުވެގެން ސިޒޭރިއަން ހަދައި އަށް މަހުގައި ދަރިފުޅު ނެގީ ބުދަ ދުވަހު ހަވީރެވެ.

ދަރިފުޅު ނެގި ފަހުން ވެސް ހާލު ރަނގަޅުނުވެގެން، މާލެ ގެންދަން މަސައްކަތް ކުރަމުން ދަނިކޮށް ޝިއުނާ ނިޔާވީ ރޭ ދަންވަރު ކޫއްޑޫ އެއާޕޯޓުގެ ރަންވޭ މަތީގަ އެވެ. ދަރިފުޅު ނިޔާވީ މާލެ ގެންދަން އެރުވި މަތިންދާބޯޓުގައި ކަމަށް އާއިލާއިން ބުނެއެވެ.

މިއީ ޝިއުނާއަށް ލިބުނު ތިން ވަނަ ކުއްޖާ އެވެ. މިހާރު ވެސް އޭނާގެ 13 އަހަރާއި އަށް އަހަރުގެ ދެ އަންހެން ކުދިން ތިބެ އެވެ. މިފަހަރު ލިބުނީ ފިރިހެން ކުއްޖެކެވެ. މިއަދު މެންދުރު ނަމާދަށްފަހު ދެމައިން ވަޅުވީ އެއް ވަޅެއްގައެވެ.

ދެމައިން ނިޔާވި ހިތާމަވެރި ހާދިސާގައި ބައެއް އިހުމާލު އޮތް ކަމަށް ޝިއުނާގެ އާއިލާއިން ބުނެ އެވެ. އެގޮތުން، ވިލިނގިލީ ހޮސްޕިޓަލާއި އެއާ އެމްބިއުލޭންސުގެ އިހުމާލު އެކަމުގައި އޮތް ކަމަށް އާއިލާއިން ބުނެ އެވެ.

ޝިއުނާގެ އޮކްސިޖެން ލެވެލް އިންތިހާއަށް ދަށްވިއިރު ވެސް ހޮސްޕިޓަލުން އެކަން ސީރިއަސްކޮށް ނުނަގާ ކަމަށް އާއިލާއިން ބުނެ އެވެ. އަދި ދެމައިން ބަލައި ފޮނުވި އެއާ އެމްބިއުލޭންސްގައި އޮކްސިޖަން އާއި އެހެނިހެން ސާމާނު ހަމައަށް ނެތް ކަމަށް ވެސް އާއިލާއިން ބުނެއެވެ.

މި ހާދިސާ އާއި ގުޅިގެން އެ ރަށުގައި ހުންނަ އަތޮޅު ހޮސްޕިޓަލަށް އިހުމާލުގެ ތުހުމަތު އަަންނަނީ ކުރަމުންނެވެ. އަދި ފަރުވާ އެންމެ އެކަށީގެންވަ ފުރިހަމަ ގޮތުގައި އެ ހޮސްޕިޓަލުން ލިބެން ނުހުންނަކަމުގެ ކަންބޮޑުވުންވަނީ އާންމުން ފާޅު ކުރަން ފަށާފައެވެ.

ގއ. ވިލިނގިލީގައި މާބަނޑު އަންހެނަކު ރޭ ވިހެއިތާ ގިނައިރުތަކެއް ނުވެ ނިޔާވިފަހުން، އޭނާގެ ދަރިފުޅު ވެސް ނިޔާވި މައްސަލަ ހެލްތު މިނިސްޓްރީން ބަލަން ފަށައިފާފައިވާ ކަމަށް ހާމަކޮށްފައިވެއެވެ.

ނަމަވެސް ކަމާ ގުޅުން ހުރި އިދާރާތަކުގެ އިހުމާލުން ދެ ފުރާނަ ގެއްލުމުން އެކަމުގެ ޒިންމާނަގާނީ ކޮންބައެއް ކަމާ މެދު އާއިލާއިން ސުވާލު އުފައްދައެވެ.