ސަރުކާރު ހިންގާ މައި ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ)އަށް މެމްބަރުން އިތުރު ކުރުމަށްޓަކައި ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން ޑީއެންއާރުގެ ނަހަމަ ބޭނުން ހިފައި މައުލޫމާތު ވަގަށް ނަގައިގެން ފޯމު ފުރި މައްސަލަ ތަހުގީގު ނުކުރުމަށް ފުލުހުންގެ ޚިދުމަތުން ނިންމައިފިއެވެ.

ޑީއެންއާރުގެ ޑޭޓާ ބޭސްއިން މައުލޫމާތު ލީކުވި މައްސަލަ ފުލުހުން ތަހުގީގު ކުރިއަށް ނުގެންދިއުމަށް ނިންމާފައިވާ ކަމަށާއި، އެކަމާއި ގުޅޭގޮތުން މިދިޔަ ހަފްތާތެރޭގައި ފުލުހުންގެ މަތީ ބޭފުޅުންގެ މެދުގައި މަޝްވަރާ ބައްދަލުވުންތަކެއް ކުރިއަށް ގެންދިޔައެވެ. އަދި މިހާރު އެމައްސަލަ ނުބަލަން ނިންމާފައިވާ ކަމަށް ރާއްޖެއެމްވީން ވަނީ ރިޕޯޓުކޮށްފައެވެ.

މީގެ ކުރިން ވެސް މިފަދަ ދެ މައްސަލައެއް ފުލުހުން ތަހުގީގު ކޮށްފައިވާއިރު އެ މައްސަލަ ޕީޖީ އޮފީހަށް ފޮނުވުމުން މައްސަލަ އަނބުރާ ފޮނުވާލާފައިވެއެވެ. އަދި އެ މައްސަލާގައި އެގޮތަށް އަމަލުކޮށްފައިވާ ކަމަށް ބުނެ ޑީއެންއާރުން މައުލޫމާތު ވަގަށް ނަގައިގެން ޕީއެންސީން ވަގު ފޯމް ހުށަހަޅި މައްސަލަ ނުބަލަން ނިންމީކަމަށް ރިޕޯޓުކޮށްފައިވެއެވެ.

ނަމަވެސް ފުލުހުންގެ މީޑިއާ އޮފިޝަލް ވަނީ މިކަން ދޮގުކޮށްފައިކަން ފާހަގަކޮށްލެވެއެވެ.

މިމައްސަލައާ ގުޅިގެން ގިނަ ސިޔާސީ ޕާޓީއެއްވަނީ އިލެކްޝަންސް ކޮމިޝަނަށް ގޮސް ކަންބޮޑުވުންފާޅު ކޮށްފައެވެ. އަދި އެކަމާއި ގުޅިގެން ތަހުގީގެއް ހިންގައި ފިޔަވަޅު އެޅުމަށްވެސް ގޮވާލާފައިވާކަން ފާހަގަ ކޮށްލެވެއެވެ.

މިވަގުތު މެންބަރުން އެންމެ ގިނަ ސިޔާސީ ޕާޓީއަކީ ޕީއެންސީ އެވެ. އީސީން އާއްމުކުރި ތަފާސް ހިސާބުތަކުގައިވާ ގޮތުން ޕީއެންސީގައި މިވަގުތު 68،968 މެންބަރުން އެބަ ތިއްބެވެ.