"އެސްޓިއޯއިން ހުރިހާ ބޭހެއްވެސް ލިބޭނެ، މައްސަލައަކީ ޑޮކްޓަރުން އާސަންދަ އިން ލިބޭ ބޭސް ނުލިޔެދޭތީ" މިއީ މި ފަހަކަށް އައިސް ބޭސްތައް ލިބުމުގައި ދަތިތައް އުޅޭ ކަމުގެ ޝަކުވާތަކާ ގުޅިގެން އޮންލައިން ނޫހަކުން ސްޓޭޓޫ ޓްރޭޑިން އޯގަނައިޒޭޝަން (އެސްޓީއޯ)ގެ މެނޭޖިން ޑިރެކްޓަރ ޝިމާދު އިބްރާހިމަށް ސުވާލު އަމާޒުކުރުމުން ދެއްވި ޖަވާބެެވެ.

އާސަންދައިގެ ދަށުން ލިބެން ޖެހޭ ބޭސް އެސްޓީއޯގެ ބޭސް ފިހާރަތަކުން ނުލިބޭކަމުގެ ޝަކުވާ އާންމުން ސޯޝަލް މީޑިޔާގެ އެކި މަންސަތަކުގައި ކުރަމުން ގެންދާއިރު ޝިމާދު މިކަމާ ގުޅިގެން ވިދާޅުވީ، އެހެން ދިމާވަނީ އެސްޓީއޯގެ ފާމަސީތަކުގައި ބޭސް ލިބެން ހުއްޓަސް، ގިނަ ފަހަރަށް ބޭހުގެ ބްރޭންޑާއި ބޭސް ސިޓީގައި ލިޔެފައި ހުންނަ ބްރޭންޑު ތަފާތު ވާތީކަމަށެވެ. ނަމަވެސް އެކަމަށް ވެސް ހައްލު ހޯދުމަށް ރައްޔިތުން ބޭސް ފިހާރައިގައި ހުންނަ ބޭހުގެ ކޯޑު ސިޓީގައި ލިޔެދޭން ބުނުމުން އެސްޓީއޯ ފިހާރަތަކުގައި ތިބޭ ބޭސް ދޫކުރާ ކުދިން ދަނީ އެކަމާ ދެކޮޅު ހަދަމުންނެވެ. އެއީ ކުރެވޭނެކަމެއް ނޫންކަމަށް ބުނެއެވެ. ނަމަވެސް މީގެ ކުރިންވެސް ޑޮކްޓަރު ލިޔެދޭ ބޭސް ނެތްކަމުގައި ވަނީނަމަ ލިބެން ހުރި ބޭހެއްގެ ކޯޑު ސިޓީގައި ބޭސްފިހާރައިން ޖަހާދެއެވެ. އެއީ ބަލިމީހާއަށްވެސް އަދި ޑޮކްޓަރަށް ވެސް ފަސޭހަ ގޮތް ކަމަށް ވުމުންނެވެ.

މިހާރު މި ދިމާވަނީ މުޅިން އެހެން ގޮތަކަށެވެ. އެގޮތުން މިއީ އާސަންދަ ކުރާ ހޭދަ އެންމެ ކުޑަ ސަރުކާރުގެ ގޮތުގައި ދެއްކުމަށް އެސްޓީއޯގެ ބޭސް ފިހާރަތަކުގެ ނަހަމަ ބޭނުން ހިފަނީއެވެ. އެހެނީ ޑޮކްޓަރު ލިޔެދެއްވާ ބޭސް ނުލިބުމުން ކޮންމެ ފަހަރަކު އަނބުރާ ގޮސް ޑޮކްޓަރު ލައްވާ ބޭސް ސިޓީ ބަދަލުކުރުވާ ތިން ހަތަރު ބުރު ޑޮކްޓަރު ކޮޓަރިއާ ބޭސް ފިހާރައާ ދެމެދު އަޅަން ޖެހުމުން ދިވެހިްނގެ މިޒާޖާ ޠަބީއަތު ހުންނަ ގޮތުން ރުންކުރުވެ އެ ބޭހެއް ލިބެން ހުންނަ ތަނަކުން އަމިއްލަ ޖީބުން ގަނެލުމުން އާސަންދައިން ކުރަން ޖެހޭ ހޭދަ މަދުވީއެވެ.

ދެން ޝިމާދު ދެއްކެވި އެންމެ ހެއްވާ އެއް ވާހަކައަކީ ދިމާވާ މައްސަލައަކީ ރާއްޖޭގެ އެޕްރޫވްޑް ޑްރަގް ލިސްޓުގައި ނެތް ބޭސްތައް ބޭސް ސިޓީގައި ލިޔުމެވެ.

ރާއްޖޭގައި ބޭނުން ކުރުމަށް ހުއްދަދީފައިވާ ބޭހުގެ ލިސްޓުގައި ގާތްގަނޑަކަށް 4،000 ބާވަތެއްގެ ބޭސް ހިމެނޭއިރު ރާއްޖޭގައި ތިބޭ ޑޮކްޓަރުންނަށް އެވަރު ނޭނގި ހުންނާނެ ބާއޭ ހިތަށް އަރައެވެ. ނޫނީ ދެން ބަލި މީހުން ވީ ޑޮކަޓްރަށް ދައްކަން ދާއިރު އާސަންދައިން ލިބެން ހުންނަ ބޭހުގެ ލިސްޓެއް ހިފައިގެން ދާން ބާއެވެ؟

ރައްޔިތުންނަށް ބޭނުންވާ ޚިދުމަތްތައް އޭގެ އެންމެ ރަގަޅު ގޮތުގައި ފޯރުކޮށްނުދީ ރައްޔިތުންގެ ހަކުރު ކޮޅުން ވެސް ވައްކަންކޮށްގެން ހުންނަވާ އެސްޓީއޯ އެމްޑީ ދެއްކެވި ވާހަކަތަކާއެކު ރައްޔިތުންގެ ރުޅިގަނޑު ފަޅައިގެން ގޮސް މީސް މީޑީޔާ ވަނީ ހޫނުވެފައެވެ.

ރައްޔިތުން ބުނެފައިވަނީ މީގެ އެތައް އަހަރެއް ކުރިން އާސަންދައިން ލިބެމުން ދިޔަ ބޭސްވެސް މިހާރު އާސަންދައިން ނުލިބޭ ކަމަށެވެ. ޚާއްސަކޮށް ދިގު މުއްދަތަކަށް ބޭސްކާ މިހުންގެ ބޭސްތައް ލިބުމުގައި ދަތިވެ އެ ފަދަ ބަލިމީހުންނަށް ބޭސް ނުލިބޭތީވަނީ ބިރު ބޮޑުވެފައެވެ. އާސަންދައިގެ ޚަރަދު ކުޑަކުރާނެ ކަމަށް ބުނެ މިދަނީ ބޭސް ސިޓީއަށް ސަލާން ޖަހަން ރައްޔިތުންނަށް މަޖްބޫރުކުރުވަމުންނެވެ.

ތިމާ މެންގެ ނާގާބިލުކަން ފޮރުވަން އެންމެ ފަހުން ޑޮކްޓަރުންނާ މިކަން ޖާމިނުކުރިޔަސް އަދި ކަމަކު ނުދާނެއެވެ.ޝިމާދުއެވެ. މަސް ނުބޭނުނީމާ ކަނޑު ގޯސް ނުކުރާށެވެ.

ޑޮކްޓަރު ލިޔެދޭ ބޭސް ނުލިބެނީ ކޯޑު ދިމާނުވާތީ ކަމަށް ޝިމާދު ބުނެފައިވާއިރު ދެން ބަލި މީހުން ދައްކަންވީ އެސްޓީއޯގެ ފާމަސިސްޓުންނަށް ބާއެވެ؟ ނޫނީ ޑޮކްޓަރުންގެ ސިޓީއަށް ބޭސް ނުލިބެންޏާ ބޭސް ލިބެނީ އެސްޓީއޯއިން ލިޔެދޭ ސިޓީއަކަށް ބާއެވެ؟