މަޖިލީހުގެ މިއަދުގެ ޖަލްސާގެ ރިޔާސަތުގައި އިންނަވައި އަބްދުއްރަހީމް ވަނީ ރަސްމީ ދަތުރެއްގައި މިއަދު އިންޑިއާއަށް ފުރާވަޑައިގަންނަވާތީ އެކަން މެންބަރުންގެ މައުލޫމާތަށް ދަންނަވާ ކަމަށް ވިދާޅުވެފަ އެވެ.

އެހެން ވިދާޅުވެ، މަޖިލީހުގެ ނައިބުރައީސް އަހުމަދު ނާޒިމްއާ ރިޔާސަތު ހަވާލުކުރައްވައި އަބްދުއްރަހީމް މަޖިލީހުން ބޭރަށް ވަޑައިގެންނެވި އެވެ.

އަބްދުއްރަހީމް އިންޑިއާއަށް ފުރާވަޑައިގަންނަވަނީ އިންޑިއާގެ ގާނޫނު ހަދާ މަޖިލީހުގެ ތިރީގެ ކަމަށްވާ ލޮކްސަބާ ރައީސް ޝްރީ އޯމް ބިރްލާގެ ދައުވަތަކަށެވެ.

އިންޑިއާގެ ސަރުކާރުން ކުރިން ބުނެފައިވާ ގޮތުގައި މަޖިލީހުގެ ވަފުދަކާއެކު އަަބްދުއްރަހީމް އިންޑިއާއަށް ކުރައްވާ ދަތުރުފުޅަކީ ހަތަރު ދުވަހުގެ ދަތުރުފުޅެކެވެ.

މިއީ މަޖިލީހުގެ ރައީސްކަމާ ހަވާލުވެވަޑައިގެންނެވި ފަހުން އަބްދުއްރަހީމް އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅެވެ.

ވެރިކަންކުރާ ޕީއެންސީގެ ހިންގުމުގެ މަސައްކަތުން ޗެއާޕާސަން އަދުރޭ އެކަހެރިކޮށް، އޭނާގެ މަޝްވަރާ ހޯދުން ރައީސް ޑރ. މުހައްމަދު މުއިއްޒު ހުއްޓާލައްވާކަމުގެ އަޑުތަކެއްވެސް މީގެ ކުރިން ގަދަވެގެން ދިޔައެވެ. އެވާހަކަ ތިލަވީ އަދުރޭގެ ދަރި ފައިސަލް ޓުރިޒަމް މިނިސްޓަރުކަމުން ވަކިކުރުމާ ގުޅިގެންނެވެ.

ފައިސަލް ވަކިކުރި މައްސަލައިގައި އަދުރޭ ވަނީ ދެ ރައީސުންގެ ގުޅުން ރަގަޅު ނޫންކަން ދޭހަވާފަދަ މޭރުމަކުން ވާހަކަ ދައްކަވާފައެވެ. އެގޮތުން އެގުޅުން ރަގަޅު ނަމަ ފައިސަލް ކުރި ކުރުމުގައި ވެސް މަޝްވަރާއެއް ރައީސް މުއިއްޒު ކުރައްވާނެކަމަށް އަދުރޭ ހާމަކޮށްފައިވެއެވެ.

ޕީއެންސީގެ އޮފީހުގައި ހުރި އަދުރޭގެ ކެބިންގެ ތަޅު ބަދަލުކޮށް ޕާޓީއިން މުޅިން އެއް ފަރާތްކޮށްފައިވާއިރު އަދުރޭއާ ގާތް ގުޅުން އޮންނަ ގިނަ ބަޔަކު ސަރުކާރު މަގާމުތަކުން ވެސް ދަނީ ވަކިކުރަމުންކަން ފާހަގަކޮށްލެވެ އެވެ.

އަބްދުއްރަހީމް އިންޑިއާ އަށް ދަތުރެއް ކުރައްވަން ނިންމެވިއިރު، ފޮރިން މިނިސްޓަރު ޑރ. އަބްދުﷲ ހަލީލް އަދި ޑިފެންސް މިނިސްޓަރު މުހައްމަދު ޣައްސާން މައުމޫން ވެސް ވަނީ މިފަހުން އިންޑިއާ އަށް ރަސްމީ ދަތުރެއް ކުރައްވައިފަ އެވެ.

"އިންޑިއާ އައުޓް" ކެމްޕޭންގެ ސަބަބުން ދެ ގައުމުގެ ގުޅުން ހީނަރުވެފައި އޮއްވައި، މި ސަރުކާރުގެ ތިން ޑެޕިއުޓީ މިނިސްޓަރަކު މީސްމީޑިއާގައި އިންޑިއާގެ ބޮޑުވަޒީރު މޯދީއަށް ކުޑައިމީސްކުރުމުން ދެ ގައުމުގެ ގުޅުން ވަރަށް ބޮޑަށް ހީނަރުވި އެވެ. އެކަމަކު، ފަހުން ދެ ގައުމުގެ ގުޅުން ވަނީ ވަރަށް ބޮޑަށް ރަނގަޅު ކޮށްފަ އެވެ.

އެމްޑީޕީގެ ސަރުކާރުގައި އިންޑިއާއާ ގާތް ގުޅުމެއް ބިނާކުރިއެވެ. ކެމްޕޭން ދުވަސްވަރު ބޭރުގެ ނޫސްތަކުން ކުރީގެ ރައީސް ޞާލިހް ސިފަކުރެއްވީ "ޕްރޯ އިންޑިއާ" ކެންޑިޑޭޓެއް ގޮތުގަ އެވެ. އަދި، ރައީސް މުއިއްޒު ސިފަކުރެއްވީ "ޕްރޯ ޗައިނާ" ކެންޑިޑޭޓެއްގެ ގޮތުގަ އެވެ.