ވައުދުތަކާއި އަހުދުތަކަކީ މިއަދު އޭގައި އެއްވެސް އަގެއް ނެތް އެއްޗަކަށް ވެނިމިއްޖެއެވެ. އެކަން އެންމެ ރަނގަޅަށް ސާބިތުވެގެން މިދިޔައީ ނިމިދިޔަ ރިޔާސީ އިންތިޚާބުގައި އަދުގެ ރައީސުލްޖުމްހޫރިއްޔާ ވެވަޑައިގެންނެވި އެންމެ ބޮޑު އެއް ވައުދު އަދާހަމަޔަށްވެސް ނުފުއްދުމުންނެވެ. ހައިރާންވެ އަންތަރީސްވެގެން މަންޒަރު ބަލަން ތިބީ ރައްޔިތުންނެވެ.

އެ ވައުދުގެ އަޑު އަދިވެސް އަޅުގަނޑުގެ ކަންފަތުގައި ގުގުމާލައެވެ. ނިމިދިޔަ ރިޔާސީ އިންތިޚާބުގެ ކެމްޕެއިން ދުވަސްވަރު އަދުގެ ރައީސް، ޑރ.މުހައްމަދު މުއިއްޒު ކެމްޕެއިން ކުރައްވަން ރަށްރަށަށް ވަޑައިގެން، ނުހައްގުން ޖަލު ހުކުމެއް އިއްވާފައިވާ ރައީސް އަބްދުﷲ ޔާމީން އަބްދުލްގައްޔޫމް މިނިވަންކޮށްދެއްވާނެކަމަށް ވެވަޑައިގެންނެވި ވަައުދު ވެރިކަން ލިބުމުން މިވަނީ ބޮޑު ފޮށްޓަށްލައި ތަޅު އަޅުވާފައެވެ.

ޝަރުޢީ ނިޒާމަށް އަތްބާނުވާ ރައީސް ޔާމީންގެ މައްސަލަ އަށް އެއްވެސް ނުފޫޒެއް ނުފޯރުވާނެކަމަށް ރައީސް ވިދާޅުވި އިރު ހަގީގަތުގައިވެސް އެވާހަކަތައް ގަބޫލުކުރެވުނެވެ. ދިވެހިރައްޔިތުންނަށް އުންމީދުތަކެއް ދެއްވިއެވެ. ކުރީ ރައީސް އިބްރާހިމް މުހައްމަދު ޞާލިހް ނިއްވާލި އުއްބަތިތަކުގައި ހުޅުކޮޅު ރޯކޮށްދެއްވީ ރައީސް މުއިއްޒެވެ. އެ ހުޅުކޮޅުތައް ނިވެން މާދުވަސް ނަގާނެކަމަކަށް އެއްވެސް ރައްޔިތަކު ހިޔެއްނުކުރެއެވެ. ނަމަވެސް ހުޅުކޮޅުތައް ނިވާލާ، ރައްޔިތުންގެ އުންމީދުތަކުގައި ކޮޅުފައިން ޖަހާލީ ފިކުރެއް ހިޔާލެއްނެތިއެވެ.

ވެރިކަމުގެ ހުވާ ކުރައްވާނީ ރައީސް ޔާމީންގެ އަތްޕުޅުގައި ހިއްޕަވައިގެންކަމަށް ވިދާޅުވެފައިވާއިރު، ހުރިހާ ރައްޔިތުން އިންތިޒާރު ކުރެއްވީ އެދުވަހު އެ މަންޒަރު ފެނޭތޯއެވެ. މަންޒަރު ނުފެނުނުތާ ގައުމާ މުހާތަބުކުރައްވާ ދެއްވި އެންމެ ފުރަތަމަ ތަގްރީރްގައިވެސް ރައީސް ޔާމީންގެ ނަންވެސް ގަނެނުލައެވެ. މީގެ ކުރިން އެމަނިކުފާނު ހުންނެވީ "ސިޔާސީ ގޮތުން އިއްވާފައިވާ ހުކުމެއްގައި"ކަމަށް ވިދާޅުވަމުން އައި ފަރާތަކަށް އެދުވަހު އެވާހަކަ ވެސް ނުގެނެވުނެވެ. އެހިސާބުން ރައީސް ޔާމީން ހުންނެވީ ހަލާލް ހުކުމެއްގައިތޯ ރައްޔިތުންތައް ރައީސް މުއިއްޒަށް ސުވާލު އަމާޒުކުރަންފެށިއެވެ.

މި ގެނެސްދިނީ ރައީސް މުއިއްޒުގެ ވައުދު ގޯނީގެ އެންމެ ބޮޑު އަދި ނުފުއްދާ އޮތް ވައުދުގެ ވާހަކަތަކެވެ. ދެން ފާހަގަކޮށްލާނަމަ،ކެމްޕެއިން ކުރައްވަމުން ރަށްރަށަށް ވަޑައިގެން ހުރިހާ ރަށެއްގައިވެސް އެއާޕޯޓް އަޅުއްވާދެއްވާނެކަމަށް ވައުދުވެއެވެ. ހުރިހާ ރަށެއްގެ މަގުތައް ހައްދަވައިދެއްވާނެކަމަށް ވައުދުވެއެވެ. ބިން ނެތް ރަށްރަށުގައި ބިން ހިއްކާ އެތަން ތަނުގައި މީހުން ދިރިނޫޅުނަސް ހައުސިންގ ޔުނިޓްތައް ގާއިމްކޮށްދެއްވާނެކަމަށް ވައުދުވެފައިވެއެވެ. އޭރު އެމަނިކުފާނުގެ ވައުދު ގޯނި ބަންޑުންޖަހަމުން ދިޔަ މަންޒަރު ފެނިފައި ހިތާހިތުން ބަޔަކު ބުނި އެއްޗެއްގެ އަޑު އިވުނެވެ."ފައިސާ ކޮންތަނަކުން ބާލައިގެންބާއޭ މުއިއްޒު މިހުރިހާ މަޝްރޫއުއް ފަށާނީ". މިއީ ކެމްޕެއިން ދުވަސްވަރުގެ ހާލަތެވެ.

މިކަމަށް ނިމުމެއް ނައިކަން އިނގުނީ މަޖިލިސް އިންތިޚާބްގެ ކެމްޕެއިނާ ދިމާކޮށް ތ އަތޮޅަށް ގޮސް ދައްކަވަން ފެށި ހަގީގަތެއް އޭގައި އެކުނުލެވޭ ވާހަކަތައް އަޑުއިވެން ފެށި ހިސާބުންނެވެ. ހިތައް ވަރަށް ބައިވަރު ވާހަކަތަކެއް އެރިއެވެ. އެގޮތުން އަދިވެސް ރައީސް މުއިއްޒުގެ ވައުދު ގޯނި ހުސްވާކަށް ނޫޅޭބާއޭވެސް ހިތައް އެރިއެވެ.

ދެން އެންމެ ހައިރާންވީ، ބަޖެޓްގައި ނުހިމެނި ކަމުގައިވީ ނަމަވެސް ރަށްރަށުގެ އެއާޕޯޓްތައް އަޅުއްވާނެކަމަށް ރައީސް މުއިއްޒު ވައުދުވެވަޑައިގަތުމުންނެވެ. ރައްޔިތުންގެ މަޖިލީހުން އެ އަހަރަކަށް ބަޖެޓް ފާސްކުރާއިރު، ބަޖެޓުގައި ރަސްމާލެ މަޝްރޫޢު ނުހިމެނުމުންވެސް ރައީސް މުއިއްޒު އެ މަޝްރޫއުކުރިޔަށް ގެންދަވަނީ އަޅާ ކަހާވެސް ނުލައެވެ. އެހެންވީމާ ރައްޔިތުންގެ މަޖިލީހަކީ ރައީސް މުއިއްޒަށް އެއްވެސް ތަނެއް ނޫންކަން މިއަދު ހާމަވެ، ނިމިއްޖެއެވެ.

ހުސްނުވި ވައުދު ގޯނިއޭ ކިޔައި ރައްޔިތުންގެ މަލާމަތާ ފުރައްސާރަ އާއި ކުރިމަތިލީ ރައީސް ޞާލިހް އެކަންޏެއްނޫނެވެ. ޞާލިްހް ވެސް ދެން މިވަރެއް ނުކުރެއެވެ. މިއަދު ހަމަ ރައީސް މުއިއްޒު މަޝްހޫރުވެފައި މިވަނީ އިންތިޚާބުގެ ކުރިންވެސް އަދި ފަހުންވެސް އެ ގެންގުޅުއްވި ވައުދު ގޯނި ހުސްނުވުމުންނެވެ. ރައީސް މުއިއްޒުގެ އަތްޕުޅުގައި އޮތީ ހުސްނުވި ވައުދު ގޯންޏެކެވެ.