ނިމިދިޔަ އަހަރު ބޮޑު ބަޖެޓެއް ސަރުކާރުން ހޭދަ ކޮށް ނިންމާލީ ރައްޔިތުންނަށް ދޭންވާ މުހިއްމު ޚިދުމަތްތަކަށް އެއްވެސް މިންވަރެއް ހޭދަނުކުރައްވާ ކަމަށް ވިދާޅުވެ ރައީސް އަބްދުﷲ ޔާމީން ކަންބޮޑުވުން ފާޅުކުރައްވައިފިއެވެ.

އާދިއްތަ ދުވަހުގެރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވަނީ ރައީސް ޑރ މުހައްމަދު މުއިއްޒުގެ ރިޔާސީ ބަޔާނަށް އަލި އަޅުވާލައްވާފައެވެ. އެގޮތުން އެމަނިކުފާނު ވިދާޅުވީ ރިޔާސީ ބަޔާނުގައި ހުންނަންވާނީ ރައްޔިތުންނަށް އުއްމީދީ ވާހަކަތަކެއް ނަމަވެސް ރައީސް މުއިއްޒުގެ ރިޔާސީ ބަޔާނުން އެފަދަ ކަމެއް ފެންނަން ނެތް ކަމަށެވެ. އަދި ރިޔާސީ ބަޔާނުގެ ދިފާއުގައި ދައުލަތުގެ ވަޒީރުންނާ މަޖިލިސް މެމްބަރުންވެސް އަރުވައިގެން ދިފާޢުއަށް ކުޅުއްވަމުން ގެންދެވި ނަމަވެސް ރައީސް މުއިއްޒު ނިމިދިޔަ އަހަރު ރައްޔިތުންނަށް އެއްވެސް ޚިދުމަތެއް ނުކޮށްދެއްވާކަމީ ފެންނަން އޮތް ހަގީގަތެއް ކަމަށް ވެސް ރައީސް ޔާމީން ވިދާޅުވިއެވެ.

އެގޮތުން ބޮޑު ބިޔަ ބަޖެޓެއް އަހަރަށް ފާސްކުރުމަށް ފަހު އެއިން ފައިސާ ފޮއްޗެއް ރަށެއްގެ ތަރައްގީއަށް ނުވަތަ ރައްޔިތުންގެ ބޭސްފަރުވާގެ ކަންކަން ހަމަޖައްސާ އާސަންދައިން ދައްކަން ހުރި ފައިސާއަކަށް ނުވަތަ އަދިވެސް ރައްޔިތުންނާ ގުޅުން ހުރި އެއްވެސް މުހިއްމު ކަމަކަށް ހޭދަ ކުރައްވާފައިވާ ނުވާކަން ރައީސް ޔާމީން ފާހަގަކުރެއްވިއެވެ.

ރައީސް ޔާމީން އިތުރަށް ވިދާޅުވީ، ރައީސް އިބްރަހިމު މުހައްމަދު ސޯލިހުގެ ދައުރާ އަޅާބަލާއިރު މިދިޔަ އަހަރުގެ ބަޖެޓަކީ 2 ގުނަ ބޮޑު ބަޖެއްޓެ ކަމަށާ އެހެންކަމުން ކަންކަން ނުވުމުން އެ ވާހަކަ ދައްކާނެ ކަމަށެވެ.