

ސަރުކާރަށް ވަޒީފާތައް ނުއުފެއްދޭ ތަނުގައި އަމިއްލަ މީހުން އާމްދަނީ ހޯދަން ކުރާ މަސައްކަތުގެ ތެރެއަށް ވަނުމަކީ ބަލައިގަނެވޭނެ ކަމެއް ނޫން ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ޕީއެންއެފްގެ ޖަލްސާއެއްގައި ވާހަކަދައްކަވަމުން ރައީސް ޔާމީން ރޭ ވިދާޅުވީ، ޓެކްސީ ދުއްވާ މީހުންނަކީ ވަރަށް ބުރަކޮށް، ވަރަށް ގިނަ ވަގުތު މަސައްކަތުގައި އުޅޭ ބައެއް ކަމަށެވެ. އެކަން ކުރަނީ ހަމައެކަނި ފުލްޓައިމްކޮށް ޓެކްސީކުރާ މީހުން ނޫން ކަމަށާއި ދިރިއުޅުން ދަތިކަމުން ވަޒީފާތަކުގައި އުޅޭ ބައެއް މީހުން ވެސް މިހާރު ޓެކްސީކުރާކަން އެ މަނިކުފާނު ފާހަގަކުރެއްވި އެވެ.
ވަރަށް ދެރަވަރު ކަންތައް މިކުރަނީ. މިއީކީއެއް ނޫން ޕީޕީއެމްގެ ނުވަތަ ޕީއެންސީގެ މެނިފެސްޓޯގައި ހުރި ކަންތައްތަކެއް ނޫން މިއީކީ. މިހާރު މިދަނީ ގޯހުން ގޯހަށް. މިކަހަލަ ވިޔަފާރިތަކުގެ ތެރެއަަކަށް ސަރުކާރު ނުޖެހޭ ވަންނާކަށް. އެއްގޮތަކަށް ވެސް ސަރުކާރު ވަދެގެން ނުވާނެ. ވަރަށް ދެރަ ކަންތައްތައް މިކުރަނީ،
އެ މަނިކުފާނު ވިދާޅުވީ، ސަރުކާރުން ޓެކްސީ ކުރަންޖެހޭ ސަބަބެއް ޓްރާންސްޕޯޓު މިނިސްޓަރު މުހައްމަދު އަމީނަށް ވެސް ވިދާޅުވެނުދެއްވޭ ކަމަށެވެ.
ރައީސް ޔާމީން ގަބޫލުކުރައްވާ ގޮތުގައި ސިންގަޕޫރު ނަގާފައި ޓެކްސީގެ ޚިދުމަތް އެންމެ ރަނގަޅު ސިޓީއަކަށް ވާނީ މާލޭ ސިޓީއެވެ. އެއީ، އަމިއްލައަށް ވަރަށް ރަނގަޅަށް ރެގިއުލޭޓްވެގެން ހިނގާ ކަމެއް ކަމަށާއި އެ ކަން ސަރުކާރުން ފަށަންޖެހޭ އެއްވެސް ސަބަބެއް ނޯންނާނެ ކަމަށް އެ މަނިކުފާނު ތަކުރާރުކޮށް ވިދާޅުވި އެވެ.
ސަރުކާރުން ޓެކްސީ ހިދުމަތް ފޯރުކޮށްދޭން ހަވާލުކުރި އެމްޓީސީސީން ބުނީ، ޚިދުމަތުގެ މަގުސަދަކީ މާލޭ ސަރަހައްދުގައި އިތުރުވަމުން އަންނަ ދަތުރުފަތުރުގެ ޑިމާންޑާ އެއްވަރަށް ރައްޔިތުން އުންމީދުކުރާ ފެންވަރުގެ ޓެކްސީ ޚިދުމަތެއް ފޯރުކޮށްދިނުން ކަމަށެވެ.
ސަރުކާރުގެ ވިސްނުމަކީ ހާއްސަ އެޕްލިކޭޝަނެއް މެދުވެރިކޮށް 24 ގަޑިއިރު މި ހިދުމަތް ފޯރުކޮށްދިނުމެވެ. ޓްރާންސްޕޯޓް މިނިސްޓްރީން ބުނި ގޮތުގައި، އެމްޓީސީސީން މި ހިދުމަތް ދޭނީ ގެއްލުން ނުވާނެ، ދެމެހެއްޓެނިވި ނިޒާމެއްގެ ތެރެއިންނެވެ. މި ހިދުމަތް ދިނުމަށް ސަރުކާރުން އެމްޓީސީސީ އަށް އެއްވެސް ސަބްސިޑީއެއް ނުދޭނެ އެވެ.
އީވީ ޓެކްސީގެ ހިދުމަތް ދޭން ސަރުކާރުން އެމްޓީސީސީއާ ހަވާލުކުރި އިރު، މި ސަރުކާރުން ޓެކްސީ ހިދުމަތުގެ ވަންނަން އުޅޭ ކަމަށް ބުނެ މާލެ ސަރަހައްދުގެ ޑްރައިވަރުން އަންނަނީ ކަންބޮޑުވުން ވެސް ފާޅުކުރަމުންނެވެ.
ސަރުކާރުން އެމްޓީސީސީއާ ހަވާލުކޮށްގެން ޓެކްސީ ލައިންގެ ހިދުމަތް ފެށުމަށް މިހާރު ނިންމާފައި ވަނީ ތިން ފިޔަވައްސަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގެ ދަށުން ޓެކްސީ ހިދުމަތް ހުޅުމާލެ އަދި ވެލާނާ އިންޓަނޭޝަނަލް އެއާޕޯޓުގައި މި އަހަރު ފަށާނެ އެވެ.
މަޝްރޫއުގެ ދެވަނަ ފިޔަވަހި ވިލިމާލެ، ގުޅީފަޅު އާއި ތިލަފުށީގައި 2026 އަދި 2027 ގައި ފަށާއިރު، ތިންވަނަ ފިޔަވަހި ކުރިއަށް ގެންދާނީ ރަސްމާލެ އާއި ގިރާވަރުގަ އެވެ.