"ބުނި ބަސް" ސެގްމެންޓްގައި މިއަދު މިބަލާލަނީ 10 ފެބުރުއަރީ 2025 ވަނަ ދުވަހު ރައްޔިތުންގެ މަޖިލީހުގެ މެޖޯރިޓީ ލީޑަރު އިބްރާހީމް ފަލާހު ދެއްކެވި ވާހަކަފުޅަކަށެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވަނީ ޓެކްސީ ޑްރައިވަރުން މިދިޔަ ޑިސެންބަރު 11ގައި ކުރި އިހުތިޖާޖަށް ހުރަސް އަޅައި، ޓެކްސީތައް ޓޯކޮށް އެ ހިދުމަތްދޭ މީހުންގެ އަސާސީ ހައްގުތަކަށް ހުރަސް އެޅޭހެން ސަރުކާރުން އަމަލުކުރާ ކަމަށް ވިދާޅުވެ ކުއްލި މައްސަލައެއް ހުށަހަޅުއްވައިފަ އެވެ.

އެ މައްސަލައަށް ބަހުސްކުރައްވަމުން ފަލާހް ވިދާޅުވީ، 19 ވަނަ ރައްޔިތުން މަޖިލީހުގައި އޭރުގެ އިދިކޮޅުގައި ތިއްބެވި ބައިމަދު މީސްކޮޅު ގެނައި ކުއްލި މައްސަލަތަކާ ދޭތެރޭގައި އެމްޑީޕީ މެންބަރުންނަށް އަމަލުކުރެއްވުން ގޮތާ ދޭތެރޭ އެ ބޭފުޅުން ހިތާމަ ކުރާނެ ކަމަށެވެ.

ފަލާހު ވިދާޅުވީ، ޓެކްސީ ޑްރައިވަރުންގެ ޖަމިއްޔާއިން އެންމެ ބޮޑަށް ފާހަގަކުރި އެއްކަމަކީ މިހާ ހިސާބަށް މި މައްސަލަތައް އައީ ނިމުނު އެމްޑިޕީ ވެރިކަމުގައި ޓެކްސީ ޑްރައިވަރުންނަށް ހުރި ނިކަމެތިކަމާއި ދިމާވި ގޮންޖެހުންތަކާއި އެ ސަރުކާރުން އެ ބޭފުޅުންނާ ދޭތެރޭ އަމަލުކުރި ގޮތުންކަން ކަމަށެވެ.

ރައީސް މުއިއްޒު ވެރިކަމާ ހަވާލުވެވަޑައިގެން ފަހުން މި ފަދަ މަސައްކަތް ކުރާ ހުރިހާ ދާއިރާތައް، ޓެކްސީ ޑްރައިވަރުން ވިޔަސް އަދި އެހެން ދާއިރާތަކުގައި މަސައްކަތްކުރާ ބޭފުޅުން ކަމުގައި ވިޔަސް އެ ހުރިހާ ބޭފުޅުންނަށް މަސައްކަތްކުރެވޭނެ ރަނގަޅު މާހައުލެއް ގާއިމުކޮށްދެއްވަން މަސައްކަތް ކުރައްވާކަން ވެސް އޭނާ ވަނީ ފާހަގަކުރައްވައިފަ އެވެ.

ނަމަވެސް މިއަދު "ވަމުންދާގޮތް" ބައްލަވާށެވެ. ފަހާހު "ބުނި ބަސް" ދިމަލެއްނުވިއެވެ.!

މިއަދު ފަލާހު ހިއްސާއޮތް ރައީސް މުއިއްޒުގެ ސަރުކާރުގެ ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވަނީ ޓެކްސީ ހިދުމަތަކީ އަސާސީ ހިދުމަތެއް ކަމަށާއި އެފަދަ ހިދުމަތްތައް ދެވޭނެ ރަނގަޅު ނިޒާމެއް ގާއިމުވެފައި އޮންނަން ޖެހޭ ކަމަށެވެ. އެގޮތުން ކޮމްޕިއުޓާ ނިޒާމެއްގެ ދަށުން ވަކި ތަނަކަށް ދިއުމަށް އެންގީމަ އެތަނަކަށް ދާންޖެހޭ ގޮތަށް އުސޫލުތައް ބަދަލުކުރުމަށް ނިންމާފައިވާ ކަމަށް ވިދާޅުވި އެވެ.

އަދި ސަރުކާރުން ތައާރަފް ކުރަން ނިންމާފައިވާ ޓެކްސީލައިން ހިންގައި އޮޕަރޭޓް ކުރުމަށް އެމްޓީސީސީއާ މިހާރު ވަނީ ހަވާލުކޮށްފަ އެވެ.

ފާހަގަކޮށްލެވޭ ގޮތުގައި މިހާރު ވެސް އަމިއްލަ ޓެކްސީ ސެންޓަރުތަކުން ޚިދުމަތް ދެމުން އަންނަނީ ވަރަށް ޒަމާނީ އެޕްލިކޭޝަންތައް ބޭނުންކޮށްގެންނެވެ. ސަރުކާރުން ޓެކްސީ ހިދުމަތް ފަށާތީ އެ ފަރާތްތަކުން އަންނަނީ ވަރަށް ބޮޑަށް ނުރުހުން ފާޅުކުރަމުންނެވެ.