އިހުތިޖާޖުކުރަމުން ދަނިކޮށް ހައްޔަރުކުރި ދެ ޓެކްސީ ޑްރައިވަރުން ދޫކޮށްލައިފިއެވެ.

އެ ދެމީހުން ދޫކޮށްލާފައިވަނީ މުއްދަތު ޖެހުމަށް ކޯޓަށް ހާޒިރުކުރުމުން އިތުރަށް މުއްދަތު ޖަހާ ނުދީ ޝަރުތުތަކެއް ކޮށްފައެވެ. އެގޮތުން މުހައްމަދު ޝާމިން އާއި އަހުމަދު ޝަބީން ދޫކޮށްލީ ހުޅުމާލޭ މެޖިސްޓްރޭޓް ކޯޓުންނެވެ.

މި ދެމީހުންނަށް ކުރިން މުއްދަތު ޖަހާދިނީވެސް އެ ކޯޓުން ކަމަށްވާއިރު އޭރު ކޯޓުން މުއްދަލު ޖަހާދިނީ މުޖުތަމައުގެ ސަލާމަތަށް ނުރައްކާ ވެދާނެ ކަމަށް ބުނެއެވެ. މި ދެމީހުންގެ ބަންދުގެ މުއްދަތު އިތުރުނުކޮށް ދޫކޮށްލާފައި މިވަނީ އެ ދެ މީހުން ބަންދުކުރި މައްސަލަ އިސްތިއުނާފަށް ހައި ކޯޓަށް ހުށަހަޅާފައި ވެސް ވަނިކޮށެވެ.

ދެ ޑްރައިވަރުން ދޫކޮށްލި ނަމަވެސް އަދިވެސް، ޑްރައިވާސް އެސޯސިއޭޝަންގެ އިންތިޒާމު ސެކެރެޓަރީ، މިސްބާހު ޝަރީފު ހުރީ ބަންދުގަ އެވެ. އޭނާގެ ބަންދަށް ފަސް ދުވަސް ހުޅުމާލޭ މެޖިސްޓްރޭޓް ކޯޓުން ޖެހީ މިދިޔަ ހޮނިހިރު ދުވަހުއެވެ.

މި ދެ ޑްރައިވަރުން ހައްޔަރުކުރީ ސަރުކާރުން ޓެކްސީ ލައިނެއް ތައާރަފުކޮށް ޓެކްސީގެ ހިދުމަތަށް ވަންނަން ސަރުކާރުން ކުރާ މަސައްކަތާ ދެކޮޅަށް އަޑުއުފުލުމުގެ ގޮތުން ނިރޮޅުމަގު ބަންދުކޮށް ޓެކްސީ ޑްރައިވަރުން ކުރި އިހުތިޖާޖެއްގެ ތެރެއިންނެވެ. އެ އިހުތިޖާޖުގެ ތެރެއިން 20 އަށްވުރެ ގިނަ ޓެކްސީ 30 ދުވަހަށް ޓޯކޮށްފައިވެއެވެ.

މިކަމާ ގުޅިގެން ޓެކްސީ ޑްރައިވަރުންގެ ޖަމްއިއްޔާއިން ވަނީ މުޒާހަރާއާ ގުޅިގެން ހައްޔަރުކުރި ޓެކްސީ ޑްރައިވަރުންގެ އިތުރުން ޓެކްސީތައް ވެސް ދޫކޮށްލުމަށް ގޮވާލައިފައެވެ. އަދި ޑްރައިވަރުން ހައްޔަރުކުރުމާއި ކާރުތައް ޓޯކުރުމަކީ މާލީ ގޮތުން ޑްރައިވަރުންނަށް ލިބޭ ބޮޑު ގެއްލުމެއް ކަމަށާއި އެއީ އަނިޔާވެރިކަން ކަމަށްވެސް އެ ޖަމްއިއްޔާއިން ހާމަކޮށްފައިވެއެވެ.