ރައްޔިތުން މަޖިލީހުގެ ޖަލްސާގައި ސަރުކާރުގެ ޕާޓީ ޕީއެންސީއަށް މެމްބަރުން ވެއްދުމާއި ނުވެއްދުމުގެ ވާހަކަތައް ނުދެއްކޭނެ ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

އިލެކްޝަންސް ކޮމިޝަންގެ ރައީސް އާއި ނައިބު ރައީސް އައްޔަން ކުރުމަަށް މަޖިލީހުގެ މިނިވަން މުައްސަސާތަކުގެ ކޮމިޓީގެ ރިޕޯޓަށް ބަހުސް ކުރައްވައި ވާހަކަ ދައްކަވަމުން ވައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވީ، އޭނާ ވެސް ހިމެނޭ ގޮތަށް ޕީއެންސީއަށް ގިނަ ބަޔަކު ވެއްދުމަކީ ނުހަނު ކަންބޮޑުވާ ކަމެއް ކަމަށެވެ. އެކަމަކު އެކަމާ ގުޅިގެން އިލެކްޝަނުން ވެސް ބަހެއް ނުބުނަނީ މަޖިލީހުގެ މެޖޯރިޓީ ސަރުކާރަށް އޮތުމުން ކަމަށެވެެ.

ވަގު ފޯމުތަކުގެ މައްސަލަ ފުލުހުން ވެސް ނުބަލާކަން ފާހަގަކުރައްވާ ޒިޔާދު ވިދާޅުވީ އެ މައްސަލަ ބަލާ މުއައްސަސާއާ ހަވާލުވެގެން ހުރީ އެކަމުގައި އިސްކޮށް ހަރަކާތްތެރިވި ބޭފުޅާ ކަމަށެވެ.

ޒިޔާދުގެ މި ވާހަކަތައް ހުއްޓުވާ މަޖިލީހުގެ ރައީސް އަބްދުއްރަހީމު ވިދާޅުވީ، މަޖިލީހުގައި ކުރިއަށްދަނީ ޕާޓީ ޖަލްސާއެއް ނޫން ކަމަށެވެ. އެގޮތުން ހުށަހެޅިފައިވާ ކޮމިޓީ ރިޕޯޓަށް ބަހުސް ކުރެއްވުމަށް އެދޭ ކަމަށް ވެސް އަބްދުއްރަހީމު ވަނީ ވިދާޅުވެފައެވެ.