އުއްތަމަ ފަނޑިޔާރު މުއުތަސިމް އަދުނާން ރިޓަޔާ ކުރައްވަން އުޅުއްވާ ކަހަލަ އިޝާރާތެއް ދެއްވައިފި އެވެ.

ވަކީލުކަމުގެ ހުވާ އަލަށް މިއަދު ކުރެއްވި ވަކީލުންނާ މުހާތަބު ކުރައްވައި ނަސޭހަތް ދެއްވަމުން މުއުތަސިމް އަދުނާން ވިދާޅުވީ އެފަދަ ޖަލްސާއެއްގައި އެ ހައިސިއްޔަތުން ދެން އެމަނިކުފާނު ނުފެނިދާނެ ކަމަށެވެ.

އުއްތަމަ ފަނޑިޔާރު ވިދާޅުވީ މި ދާއިރާގައި މަސައްކަތް ކުރާތާ މިހާރު 32 އަހަރުވެފައިވާ ކަމަށާއި އެމަނިކުފާނު އެންމެ ފުރަތަމަ މި ދާއިރާއިން ނުކުންނެވި އިރާ މިހާރު ކަންކަން އޮތް ގޮތް ވަރަށް ބޮޑަށް ތަފާތު ކަމަށެވެ.

މުއުތަސިމް ވިދާޅުވީ ވަކީލުކަން ކުރާއިރު، ވަރަށް ބައިވަރު އިތުރު މައުލޫމާތު ވެސް ލިބޭނެ ކަމަށެވެ. ނަމަވެސް އެ ސިއްރު މައުލޫމާތު ސިއްރު ގޮތުގައި ހިފަހައްޓައި މީހުންގެ އިތުބާރު ހޯދަން މަސައްކަތް ކުރުމަށް އަލަށް ވަކީލުންނަށްވި ބޭފުޅުންނަށް އެމަނިކުފާނު ނަސޭހަތްތެރިވެވަޑައިގެންނެވި އެވެ.

އުއްތަމަ ފަނޑިޔާރުގެ ސިއްހީ ހާލުކޮޅު ގޯސްވެގެން މިދިޔަ ޑިސެމްބަރު މަހު ފަހުކޮޅު ވަނީ ހޮސްޕިޓަލުގައި އެޑްމިޓްކޮށް ފަރުވާ ދީފަ އެވެ. އެފަހަރު ފަރުވާ ދިނީ އެ މަނިކުފާނުގެ މައިބަދައަށް އެރި ތަދަކާ ގުޅިގެނެވެ.