ރައްޔިތުންގެ މަޖިލީހުގެ އާންމު ކޮމިޓީގެ މިއަދުގެ ބައްދަލުވުމުގެ ތެރެއިން / -
ހަބަރު, ވިޔަފާރި
ރާއްޖެ އިން ބޭރުން ބޭސްފަރުވާ ހޯދުމުގައި މަޖިލިސް މެމްބަރުންނަށް ދަތިތަކެއް ހުރެގެން ކަންބޮޑުވެއްޖެ
Qudhrathullah Ameen
ގުދުރަތުﷲ އަމީން
18 ފެބްރުއަރީ 2025
މާލެ ސިޓީ

ރައްޔިތުންގެ މަޖިލިހުގެ މެންބަރުންގެ ހެލްތު އިންޝުއަރެންސްގެ ނިޒާމު މެދުވެރިކޮށް، ރާއްޖެ އިން ބޭރުން ބޭސް ފަރުވާ ހޯދުމުގައި ދަތިތަކެއް ދިމާވާތީ ބައެއް މެންބަރުން މިއަދު ކަންބޮޑުވުން ފާޅުކުރައްވައިފި އެވެ.

މިއަދު ބޭއްވި މަޖިލީހުގެ އާންމު ކޮމިޓީގެ ބައްދަލުވުމުގައި މެމްބަރުންގެ ހެލްތު އިންޝުއަރެންސާއި ގުޅޭގޮތުން ފޮނުވާފައިވާ ސިޓީއަކާއި ގުޅިގެން ތިމަރަފުށީ ދާއިރާގެ ޕީއެންސީ މެންބަރު އަހްމަދު ރިޔާޒު ވިދާޅުވީ އިންޝުއަރެންސްއަށް މެންބަރުންގެ އަތުން ވެސް ބޮޑު އަދަދެއް ނަގާއިރު، އެ ހިދުމަތް ހޯދުމުގައި ތަކުލީފެއް ކުރިމަތިވެގެން ނުވާނެ ކަމަށެވެ.

މަޖިލީހުގެ ޔޫޓިއުބް ޗެނެލްއިން ލައިވްކުރި އެ ބައްދަލުވުމުގައި އެ ސިޓީއާ ގުޅޭ ގޮތުން ބޮޑު ބައެއް ކުރިއަށް ގެންދިޔައީ މައިކް ނިއްވާލައިގެން، ނުރަސްމީކޮށެވެ. އެހެންވެ ގިނަ މެންބަރުން ދެއްކެވި ވާހަކަ ސާފެއް ނޫނެވެ.

މެންބަރުންގެ މައިގަނޑު ކަންބޮޑުވުމަކީ، މަޖިލީހުގެ ހެލްތު އިންޝުއަރެންސްއިން ރާއްޖެއިން ބޭރުން ފަރުވާ ހޯދުމުގައި ދަތިތަކެއް ކުރިމަތިވުމެވެ. މެންބަރުންނަށް އެ ހިދުމަތް ފޯރުކޮށްދެމުން އަންނަނީ އެލައިޑް އިންޝުއަރެންސްއިންނެވެ.

މިކަމުގައި އެންމެ ފުރަތަމަ ކަންބޮޑުވުން ފާޅުކުރައްވައި ވާހަކަ ދެއްކެވީ، ފޭދޫ ދެކުނު ދާއިރާގެ ޕީއެންސީ މެންބަރު އިބްރާހިމް ދީދީ (އައިބީ) އެވެ. އޭނާ ވެސް އެ ވާހަކަތައް ދެއްކެވީ މައިކް ނުޖައްސަވަ އެވެ.

އިބްރާހިމް ދީދީ ދެއްކެވި ވާހަކަތަކަށް ތާއީދު ކުރައްވައި ތިމަރަފުށީ ދާއިރާގެ ޕީއެންސީ މެންބަރު އަހްމަދު ރިޔާޒު ވިދާޅުވީ އޭނާއަށް ވެސް ރާއްޖެއިން ބޭރުން ހެލްތު އިންޝުއަރެންސް ލިބުމުގައި ދަތިތަކެއް ކުރިމަތިވި ކަމަށެވެ. އޭނާ ވިދާޅުވި ގޮތުގައި މި އިންޝުއަރެންސްއަށް މެންބަރުންގެ އަތުން ވެސް ހޭދަކުރަން ޖެހޭއިރު، އެ ހިދުމަތް ހޯދުމުގައި ތަކުލީފެއް ކުރިމަތިވެގެން ނުވާނެ އެވެ.

އަޅުގަނޑު އެ ބޭފުޅުންނަށް ވަޓްސްއެޕް ކޮށްލިން، އަޅުގަނޑަކީ މެމްބަރެކޭ އަޅުގަނޑުމެން މިހެން ހުށަހަޅާ އެއްޗެހި ތިބޭފުޅުންނަށް ރިޖެކްޓެއް ނުކުރެވޭނެޔޭ، ކޮށްގެން ނުވާނެޔޭ. އަޅުގަނޑު ވެސް ވަރަށް ބޮޑު ހަރަދެއް ކޮށްފައި އައީ. އެކަމަކު ލިބުނީ 3،000 ދިވެހި ރުފިޔާ. އެހެންވީމާ މިގޮތަށް މި ކަންކަން ހިނގައިގެން ނުވާނެ

- ތިމަރަފުށީ ދާއިރާގެ ޕީއެންސީ މެންބަރު އަހްމަދު ރިޔާޒު

ރައްޔިތުންގެ މަޖިލީހުގެ މެންބަރުންނާއި އެ މެމްބަރުންގެ އަނބިން ނުވަތަ ފިރިންނާއި އުމުރުން 18 އަހަރު ނުފުރޭ ދަރިން ހިމެނޭ ގޮތަށް ހެލްތު އިންޝުއަރެންސް ލިބެ އެވެ. ރާއްޖޭގެ އިތުރުން ސާކް ގައުމުތަކާއި އާސިއާންގެ ގައުމުތަކުން މެންބަރުންނަށް ބޭސްފަރުވާ ލިބެ އެވެ.

މަޖިލިސް މެންބަރުންނަށް މުސާރައާއި އިނާޔަތްތަކުގެ ގޮތުގައި 82،500 ރުފިޔާ ލިބެއެވެ. އޭގެ އިތުރަށް، ކޮންމެ މެންބަރަކަށް، އެ މެންބަރެއްގެ އަނބިިންނާއި ފިރިންނާއި 18 އަހަރުން ދަށުގެ ކުދިންނަށް ހަރަދު ކުރުމަށް ހެލްތު އިންޝުއަރެންސްގެ ގޮތުގައި އަހަރަކު 24،000 ރުފިޔާ ލިބެއެވެ.

މިފަދަ ބޮޑު މުސާރައެއް ނަންގަވާއިރު ބޭރު ކަރަތަކުން މަޖިލިސް މެންބަރުންނަށް އަދި އެމީހުންގެ އާއިލާއަށް ބޭސްފަރުވާ ސަރުކާރުން ހިލޭކޮށްފަ އޮންނަ އޮތުމަކީ ގިނަ އާންމުންގެ ފާޑުކިޔުން އަމާޒުވާ ކަމެކެވެ. މަޖިލިސް މެންބަރުންގެ އިމްތިޔާޒްގެ ބާރުތައް ހަނިކޮށް މަޖިލިސް މެންބަރުންގެ މުސާރައާއި އިނާޔަތް ވެސް ހާމަނައިޒް ކުރުމަށް ގިނަ ރައްޔިތުން އެދެ އެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved