ޝަރުއީ ދާއިރާ އާއި މެދު ރައްޔިތުންގެ އިތުބާރާއި އިހްތިރާމް ކުޑަވަނީ ފަނޑިޔާރު އަލީ ރަޝީދުފަދަ ބޭފުޅުން ސުޕްރީމް ކޯޓުގެ ބެންޗުގައި ހިމެނިވަޑައިގަންނަވާތީކަމަށް ޕީޕަލްސް ނޭޝަނަލް ފްރަންޓް ޕީއެންއެފްގެ އިސް ސަފުގައި ހަރަކާތްތެރިވަމުންދާ އަހްމަދު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ވައްޑެ މިފަދައިން ވިދާޅުވެފައިވަނީ އެކްސް ކުރެއްވި ޕޯސްޓެއްގައެެވެ.
އެގޮތުން ފަނޑިޔާރު އަލީ ރަޝީދަކީ ރައީސް އަބްދުﷲ ޔާމީން އަބްދުލްގައްޔޫމަށް ހަރާމް ހުކުމެއް ޖެހުމަށްފަހު ދައުލަތުގެ އެންމެ މަތީ ކޯޓުގެ ފަނޑިޔާރަކަށް ވީ ބޭފުޅެއްކަމަށް ވައްޑެ ފާހަގަ ކުރެއްވިއެވެ.
މީގެ އިތުރުން ޝަރުއީ ދާއިރާއާއި މެދު ރައްޔިތުންގެ އިތުބާރާއި، އިހްތިރާމް ކުޑަވަނީ އަލީ ރަޝީދު ފަދަ އަމިއްލަ އެދުން ބޮޑު، އުޑެއް ބުޑެއް، ރައްބެއް، ރަސޫލެއް ވާކަން ނުދަންނަ ކަވާޑުން ދައުލަތުގެ އިއްޒަތްތެރި ކޯޓުތަކުގައި ތިބޭތީކަމަށް ވެސް ވައްޑެ ވިދާޅުވިއެވެ.
ފަނޑިޔާރު އަލީ ރަޝީދުގެ އެއްވެސް ލަދުވެތިކަމެއް ހުރިނަމަ އަމިއްލަފުޅަށް އިސްތިއުފާ ދެއްވާނެކަމަށްވެސް ވައްޑެ ފާހަގަ ކުރެއްވިއެވެ.
އެގޮތުން ފަނޑިޔާރު އަލީ ރަޝީދު ރައީސް ޔާމީނަށް ނުހައްގުން އިއްވެވި ހުކުމަކީ ހަޑި ހުކުމެއްކަމާއި މިފަހުން އިސްތިއުނާފީ ކޯޓުން އިއްވިހުކުމުން އެކަން އެނގި ހާމަވާކަމަށް ވައްޑެ ފާހަގަ ކުރެއްވިއެވެ. އަދި އެފަދަ ބޭފުޅުން ތިއްބަވާ ބެންޗްޗަކަށް އިންސާފު ހޯދަން ދާއިރު ރައްޔިތުންނަށް އޮތީ ކޮން އިތުބާރެއްތޯ ވައްޑެވަނީ އައްސަވާފައެވެ.
ސުޕްރީމް ކޯޓުގެ އިއްޒަތާއި ކަރާމަށްޓަކައިވެސް އަލީ ރަޝީދު އަމިއްލަފުޅަށް އިސްތިއުފާ ދިނުމަށް ވައްޑެވަނީ ގޮވާލައްވާފައެވެ.
