ދިވެހިރާއްޖޭގެ މިނިވަންކަމާ އިސްތިގުލާލަށް ބުރޫ ނާރުވާ ވެރިކަން ކުރެއްވުނީތީ ނުހަނު އުފާފުޅު ކުރައްވާ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި ވާހަަކަފުޅު ދައްކަވަމުންނެވެ.

އެގޮތުން އެމަނިކުފާނު ވިދާޅުވީ ގައުމެއްގެ ފުރިހަމަ މިނިވަންކަން ދެމި އޮންނާނީ އިގްތިސޯދީ ގޮތުން ފުދުންތެރި ބަޔަކަށް އެ ގައުމެއްގެ ރައްޔިތުން ވެގެންކަމަށް ނަމަވެސް އެއަށް ވުރެ ގައުމުގެ ވެރިންނަކީ މނިވަންކަން މަތީ ތިބެ ގައުމުގެ ހައްގުގައި ވެރިކަން ކުރެވޭނެވަރުގެ ގާބިލު ބަޔަކަށް ވުން މުހިއްމު ކަމަށެވެ.

ރައީސް ޔާމީން ވިދާޅުވީ، އެމަނިކުފާނުގެ ރިޔާސީ ދައުރު ބޭރުގެ ނުފޫޒެއްގައި ނުޖެހި ހަރިޖާި އަދި ދާހިލީ ސިޔާސަތު ވެސް ރާއްޖެއިން ބޭނުންވާ ގޮތަށް ތަންފިޒުކޮށް ވެރިކަން ނިންމަވާލެއްވުމަކީ ލިބިވަޑައިގަންނަވާ އެންމެ ބޮޑު އެއް އުފާ ކަމަށެވެ.

ރައީސް ޔާމީން އިތުރަށް ވިދާޅުވީ ނަމަވެސް މިހާރު ރާއްޖޭގެ އެތެރޭގެ ކަންކަމުގެ ތެރެއަށް ބޭރުގެ ނުފޫޒު އިންތިހާއަށް ވެރިން ވައްދާފައިވާ ކަމަށެވެ. އެކަމުގެ ސަބަބުން އެމަނިކުފާނުގެ ހިތްޕުޅަށް ނުހަނު ދަތިވާ ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން މިފަދައިން ވިދާޅުވެފައިވާއިރު، ދިވެހި ރާއްޖެއަށް ބޭރުގެ އަސްކަރިއްޔާ ވައްދާ މިނިވަންކަމާ އިސްތިގުލާލު ކޮމްޕްރޮމައިޒް ވިޔަ ނުދިނުމަށްޓަކައި އެމަނިކުފާނުގެ އިސް ނެންގެވުމާ އެކު ގައުމީ ބޮޑު ކެމްޕެއިނެއް "އިންޑިއާ މިލިޓަރީ އައުޓު"ގެ ނަމުގެ ފައްޓަވާފައިވެސް ވެއެވެ.