ގެދޮރުވެރިޔާ ސްކީމުގެ ދަށުން ދޫކުރާ ފްލެޓްތައް ލިބޭ މީހުންގެ ލިސްޓު މުރާޖައާކުރަމުން ދާއިރު ލިސްޓު ބާތިލްކޮށް އަލުން އިއުލާން ކުރާނެ ކަމަށް ދެކެވޭ ވާހަކަތަކާ ގުޅިގެން، ލިސްޓު ބާތިލު ނުކުރާނެ ކަމުގެ ޔަގީންކަން ހައުސިން މިނިސްޓްރީން ލިބިފައިވާ ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ބުނެފިއެވެ.

މި މައްސަލައިގައި ހައުސިން މިނިސްޓްރީން ރޭ ނެރުނު ބަޔާނެއްގައި ބުނީ ޝަރުތު ހަމަވެ އިތުރު މައްސަލައެއް ނޫޅޭ ފޯމުތަކުގެ ލިސްޓެއް އޭސީސީން މިދިޔަ ބުރާސްފަތި ދުވަހު އެ މިނިސްޓްރީ އަށް ފޮނުވާފައިވާ ކަމަށެވެ.

ނަމަވެސް އެއީ ހަމައެކަނި ތަހުގީގުގެ ބޭނުމަށް އެއްކުރި މައުލޫމާތުގެ އަލީގެ އެކުލަވާލާފައިވާ ލިސްޓެއް ކަމުން ފްލެޓު ލިބޭ މީހުންގެ އައު ލިސްޓެއް އެކުލަވާލަން ނިންމައި އެ މަސައްކަތް ކުރަން ފަށާފައިވާ ކަމަށް މިނިސްޓްރީގެ ބަޔާނުގައިވެއެވެ.

މިއާއި އެކު ކުރީގެ ލިސްޓު އުވާލަނީ ކަމަށާއި، އެ މީހުންނަށް ފްލެޓު ނުލިބޭނެ ކަމަށް ބުނެ ބައެއް މީޑިއާތަކުގައި ހަބަރުތައް ފެތުރި އާންމުންގެ މެދުގައި ވެސް ވަނީ ކަންބޮޑުވުން އުފެދިފައެވެ.

މި ދަނޑިވަޅުގައި އެޗްއާރުސީއެމްއިން ނެރުނު ބަޔާނުގައި ވަނީ ލިސްޓު ބާތިލްކޮށް އަލުން އިއުލާން ނުކުރާނެ ކަމުގެ ޔަގީންކަން ހައުސިން މިނިސްޓްރީން އެ ކޮމިޝަނަށް ދީފައިވާ ކަމަށް ބުނެފައެވެ. އަދި އެ މައްސަލައާ ގުޅޭ އިތުރު ލިޔުންތަކެއް ހޯދުމަށް އެދިފައިވާނެ ކަމަށް ވެސް އެބަޔާނުގައި ފާހަގަކުރައްވާފައިވެއެވެ.

ގެދޮރުވެރިޔާ ސްކީމުގެ ދަށުން ފްލެޓް ދޭން ހުޅުވާލުމާއެކު މިދިޔަ އޯގަސްޓުމަހުގެ 8 ގައި ނެރުނު ވަގުތީ ލިސްޓުގައި ތިބި މީހުންގެ ތެރެއިން ޝަރުތު ހަމަވާ ކަމަށް އޮތީ 15،046 މީހުންނެވެ. ސަރުކާރުން ނިންމާފައި ވަނީ ހުށަހެޅި މީހުންގެ ތެރެއިން ޝަރުތު ހަމަވާ ހުރިހާ އެންމެންނަށް ފުލެޓް ދިނުމަށެވެ. ނަމަވެސް ކޮންޓްރެކްޓު ކުރެވި މަސައްކަތް ފެށިފައި ވަނީ 4000 ފްލެޓުގެއެވެ.