ތެދެކެވެ. އަބްދުއް ރަހީމްގެ މޮޅު ސިޔާސީ ހިޔަޅު ވިސްނުމުން ޕީޕީއެމްގެ ރިޔާސީ ޓިކެޓް ޑރ. މުއިއްޒު އަށް ހޯއްދަވާ ދެއްވި އެވެ. އަދި މަކަރާއި ހީލަތުގެ ދާނެއްގައި އާންމު މެންބަރުންނަށް ދޮންކަޅު ވެސް އަންގާ ނުލައްވާ ޑރ. މުއިއްޒުއާއި އެކު ސިޔާސީ ގޮތުން އެއްދާން ކުރައްވަން އަދުރޭ ފެއްޓެވި އެވެ.

ރައީސް ސޯލިހުގެ ސަރުކާރުގެ ވެރިންނާއި އެކު އަޑިއަޑިންހައްދަވަމުން ގެންދެވި ޑީލް ތަކުގެ ތެރެއިން ރައީސް ޔާމީން ޖަލުގައި ބަންދުކުރެއްވުމަށް ހީލަތްތެރި ނިންމުންތައް ނިންމަވަން ފެއްޓެވި އެވެ. ބޭނުމަކީ ވެރިކަމުގެ ބާރުތައް ލިބޭ ދުވަހަކުން ބޭނުން ހާ ސަކަރާތެއް ޖެއްސެވުމުގެ ބޭނުން އޮތުމެވެ.

ކޮންމެ އަކަސް ރައީސް ސޯލިހް ސަރުކާރުގެ ޕްރޮސެކިއުޓަރުންނާއި ކޯޓުތަކަށް ނުފޫޒު ފޯރުވާ ސަރުދާރުން ލައްވާ ރައީސް ޔާމީން ރިޔާސީ އިންތިހާބް ނިމެން ދެން "ޖަލުގައި ބަންދު" ކުރެއްވި އެވެ. އެމަނިކުފާނަށް ޕީޕީއެމްއިން އެރުއްވި ޓިކެޓަށް ގޮންޖައްސަވާ ވަގުވަގަށް އަބްދުއްރަހީމްގެ "ހިޔަޅު" ރޭވުންތެރިކަމުން ރިޔާސީ ޓިކެޓް ޖަހައިގަނެ ޑރ. މުއިއްޒު އަތުލަފިކޮށްގެން ރިޔާސީ އިންތިހާބު ހޯއްދެވި އެވެ.

މުޅި އިންތިހާބުގައި ވިއްކެވީ ރައީސް ޔާމީންގެ މެނިފެސްޓޯ އެވެ. ހުރިހާ ޖަލްސާތަކެއްގައި ދެއްކެވީ ރައީސް ޔާމީންގެ މަންހަޖެވެ. ވިދާޅުވަމުން ދިޔައީ ރައީސް ޔާމީންގެ ސިޔާސަތުތަކާއި ފިލާވަޅުތަކުން މުޅި ވެރިކަމުގެ ދައުރު ތަރުތީބު ކުރައްވާނެ ވާހަކަ އެވެ.

ނަމަވެސް ވެރިކަން ލިބުމުން ކަންކުރެއްވި ގޮތާއި އަބްދުއްރަހީމް އާއި ޑރ، މުއިއްޒު އުޅުއްވަން ފެއްޓެވި ގޮތުގެ ވާހަކަ ދެއްކުމަށްވުރެ މިއަދު އެވާހަކަތައް ނުދެއްކުން މޮޅު އިތުރެވެ. ސަބަބަކީ ޑރ.. މުއިއްޒު ވެރިކަމަށް ގެނައުމަށް އަބްދުއްރަހީމްގެ ވިސްނުން ތޫނުކަމުން ކުރެއްވި ހުރިހާ ކަމެއްގެ މައްޗައް މިއަދު ޑރ، މުއިއްޒުގެ ވިސްނުން ގަދަވެ ގަތުމެވެ. ރައީސުލްޖުމްހޫރިއްޔާ ކަމުގެ މަގާމަށް ޑރ. މުހައްމަދު މުއިއްޒު ގެނެސް ހުވާ ކުރެއްވި ދަރުބާރާއި ހަމައިން ޑރ. މުއިއްޒުގެ ނޯޓް ފޮތުން "އަދުރޭ" ގެއްލުމެވެ.

ރައީސް މުއިއްޒު ވެރިކަމަށް ގެނައުމަކީ ސިޔާސީ ހަޔާތުގެ އެންމެ ކާމިޔާބު، އެންމެ ބުރަ، މަސައްކަތުގެ ގޮތުގައި އަބްދުއްރަޙީމް ކުރިން ސިފަ ކުރެއްވި ނަމަވެސް މިއަދުގެ ސިޔާސީ ހަގީގަތަކީ ރައްޔިތުންގެ މަޖިލީހުގެ ރައީސްކަމުގެ މަގާމުގައި މިވަގުތު ހުންނެވި އަބްދުއްރަހީމް ހުންނެވީ "ބާކީ" ވެފަ އެވެ. އެހެން މީހުންގެ ބޭނުމަށް ޖެހިފަ އެވެ. ވާނުވާ ގައި އެވެ. ކޮންމެ ފަދަ ވަގުތަކުވެސް ދަރިކަލުން ފައިސަލް ފަދައިން "ބާރު" ގެއްލިދާނެ ފަދަ އިންތިޒާރީ ކަށި ގިނަ ޖަންގަލީގެ ދާނެއްގައި އެވެ. މުއިއްޒުގެ ކުރިފުޅު މަތީގައި "ބޭނުންކެނޑިފައި" އެވެ. ދުވަސް ހަމަވެފައި އެވެ.

މަޖިލީހުގެ ރައީސް ކަމުންނާއި އަދި ބުނެވޭ ބަހަކުން ނުވަތަ ކުރެވޭ ކަމަކުން ފޮނަދޫ ދާއިރާގެ ރައްޔިތުންގެ މަޖިލީހުގެ ގޮޑި ވެސް އަދުރޭ އަތުން ގެއްލިދާނެ ފަދަ ކިތައްމެ ހާލަތެއްގެ "ނޯޓް" އަބްދުއްރަހީމްގެ ފޯނަށް ހުންނަނީ މިފަހުން ލިބިލިބި އެވެ. ބޭނުންހާ މީހަކާއި ބައްދަލެއް ނުކުރެވެ އެވެ. އަމިއްލަ އިހްތިޔާރުން ބަސް ބުނެ އިސްނެގުމުގެ ފުރުސަތުން ވެސް ވަނީ މަހްރޫމް ވެފައެވެ. އަމިއްލަފުޅު ވެރިކަން ކަމަަށް ދެއްކުނު ސަރުކާރުން އުފެއްދި މަގާމުތަކުން ދަރިންނާއި އާއިލީ ބޭފުޅުން ހިމެނޭހެން ރައްޓެހިންގެ މަގާމުތައް ވެސް އެދަނީ ގެއްލެމުން ނެވެ. ސީދާ ރައީސް ޑރ. މުއިއްޒުގެ އޯޑަރަށެވެ. އަދުރޭ "ސައިޒް" ކޮށްލެއްވުމުގެ ގޮތުން ނެވެ.

މިއަދު ޑރ. މުއިއްޒުގެ އޮޑީގައި ކިޔަވެލި ކިޔެވުން ހިމެނޭހެން ކާށިފެޅުމާއި ފެންކިޔެވުންމުން ވެސް އަދުރޭ ވަނީ ދުރުކޮށްފަ އެވެ. ހާމުދުރުންނާއި ފަންޑިތަވެރިންގެ ހިމާޔަތުގައި ކުރައްވާން ޖެހި ވަޑައިގަންނަވާ ސިޔާސީ ކަންކަމުންވެސް އަބްދުއްރަހީމް ވަނީ ބާކީ ކޮށްފައި އެވެ. މިއަދު އަބްދުއްރަހީމް ހުންނެވީ އަމިއްލަ އިހްތިޔާރުގައި ސިޔާސީ ބޭނުމަށް ރުގުޔާކޮށްލެވޭ ވަރަށް ވުރެއްވެސް ދިފާއުގައި ބަހެއްވިދާޅުވާން ކެރިވަޑައި ނުގަންނަވާވަރަށް "ކޮޅު ބެދިފައި" އެވެ.

އަބްދުއްރަޙީމަކީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންއިރު އެންމެ އަރިސް ބޭފުޅާ ނަމަވެސް މިއަދު އަބްދުއްރަހީމްގެ މޫނުމަތުން އޮފު ކެޑިއްޖެ އެވެ. އުފާވެރިކަން ގެއްލިއްޖެ އެވެ. އުފާލާ އަރާމު ގެއްލި ވޭނާ ހިތާމައިން މުޅި ހަށިގަޑުގައި އަޅަމުންދާ "ސިޔާސީ ވޭން" އަޑު އަހާލުމަށް ގެކޮޅަށް ޒިޔާރަތް ކުރާނެ ސިޔާސީ މީހުން މަދު ވެއްޖެ އެވެ. އެކުގައި ކެރަމް ބޯޑުކުޅެން މަޖިލިސް ރައީސް ގެކޮޅު މުރައިދޫގެ އަށް ވަޑައިގަންނަވާ މީހުން މަދުވެ، އަބްދުއްރަހީމް އާއި އޭނާގެ ސިޔާސީ ހަރަކާތް ބަލާ "ސިއްރު ފާރަވެރިން" ގިނަ ވެއްޖެ އެވެ.

ރައީސް މުއިއްޒު ވެރިކަމަށް ވަޑައިގެން މަޖިލީސް އިންތިހާބުގެ ކުރީގައި އަބްދުއްރަޙީމް ފުރަތަމަ އައްޔަންކުރެއްވީ ސީނިއާ މިނިސްޓަރެއްގެ ފެންވަރުގައި އެ މަނިކުފާނުގެ އެޑްވައިޒަރުގެ މަގާމަށެވެ.

އެއަށް ފަހު، މަޖިލީސް އިންތިހާބުގައި ޕީއެންސީން ހޯދި ސުޕަމެޖޯރިޓީއާ އެކު މަޖިލީހުގެ ރައީސް ކަމަށް އަބްދުއްރަހީމް އިންތިޚާބު ކޮށްފައި ވަނީ ވެސް ރައީސްގެ އެދިވަޑައިގަތުމަކަށެވެ. ޕީއެންސީގެ ހަރުގެ ޖަލްސާތަކުގައި ވެސް ސަރުކާރުގެ ދިފާއުގައި އެންމެ ގަދައަށް ވާހަކަދައްކަވާ އެއް ބޭފުޅަކީ މަޖިލީހުގެ ރައީސް އަބްދުއްރަހީމެވެ.

ނަމަވެސް މިއަދުގެ ހާލަތުން ފެންނަ މަންޒަރު ބަދަލުވެ ނިމިއްޖެ އެވެ. ސިޔާސީ އެއްވެސް މަސައްކަތެއްގައި އަބްދުއްރަހީމުގެ ލަފައެއް ރައީސް ނުހޯއްދަވަ އެވެ. މިއަދު މަޖިލީހުގެ ރިޔާސަތުގައި އަބްދުއްރަހީމް އިންނެވި ނަމަވެސް މުޅި މަޖިލީސް ޕްރޮޑިއުސް ކުރައްވަނީ މުޅިން އެހެން ބޭފުޅެކެވެ. މިއަދު ޕީއެންސީގެ ހަރުގެ ތަޅުދަނޑިވެސް އޮންނަނީ އެހެން ބޭފުޅެއްގެ އަތުގައި އެވެ. މިއަދު އަބްދުއްރަހީމް ވަޑައިގަންނަވާ ތަނަކަށް ޑރ، މުއިއްޒު ވަޑައިގަންނަވާކަށް ބޭނުންފުޅު ނުވާ ފަދައެވެ. އެއީ ޕީއެންސީގެ މާހެފުން ނަމަވެސް މެއެވެ.

ވެރިކަމުގެ އާރާއި ބާރު އަދި ޝަރަފު ދެ ބޭފުޅުން ވެސް ބޭނުންވެވަޑައިގަތީ އެއް މިންވަރަކަށެވެ. މިކަމުގެ ބޭނުމުގައި އެކަކު އަނެކަކުގެ އަޑު ކަނޑުވާލަން ހިފީއެވެ އެވެ. ނަތީޖާ އަކީ ރައީސް މުއިއްޒު، މިއަދު އަބްދުއްރަހީމް ދުރުކޮށްލެއްވީ ދުރުން މާދުރަށެވެ. އެ މަންޒަރު މިއަދު މާ ސާފުކޮށް ސިޔާސީ މުފައްކިރުންނަށް އެބަ ފެނެ އެވެ.

މިއަދު އަބްދުއްރަހީމްގެ ކޮންމެ ފިޔަވަޅަކީ އޭނާ އަށް ޑރ. މުއިއްޒުގެ "ފުރިހަމަ އިތުބާރު" ގެއްލި އޭނާގެ ފަހަތުން ޑރ. މުއިއްޒުގެ އެދިއްލެއްވުމަކަށް ސަރުކާރުން ދުއްވާ ބިސްމަޅި އެވެ. ސިއްރު ފުލުހުންނާއި ސިއްރު ސިފައިން ވެސް ބޭނުން ކުރައްވައިގެން ނެވެ. ބޭނުމަކީ ރައީސް މައުމޫނަށް އަދި ފަހުން ރައީސް ޔާމީން އަށް ލިބުނު ފަދަ ސިޔާސީ "ކެއްސެއް" އަބްދުއްރަހީމްގެ ފުށުން މ. ދިމްޔާތު، ޑރ. މުހައްމަދު މުއިއްޒު އަށް ނުލިބުމެވެ.