ރައްޔިތުންގެ މަޖިލީހުގެ ރައީސް އަބްދުއްރަހީމު އަބްދުﷲ އަކީ ބަޑި ބައިންދާފައިއިން ރައްޔިތުންގެ މަޖިލީހުގެ ރައީސެއް ކަމަށް ގަލޮޅު ދެކުނު ދާއިރާގެ މަޖިލިސް މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.

އޭނާ މިފަދައިން ވިދާޅުވީ، މާލިއްޔަތު ކޮމިޓީން ހުށަހެޅި ކުރިއަށް އޮތް ދެ އަހަރު ދުވަހުގެ މުއްދަތަށް އެޅުމަށް ނިންމާފައިވާ އިސްލާހީ ފިޔަވަޅުތަކާ ގުޅޭ ރިޕޯޓަށް މިއަދުގެ މަޖިލިސް ޖަލްސާގައި ބަހުސްކުރައްވަމުންނެވެ.

މީކާއިލް ވިދާޅުވީ، އަބްދުއްރަހީމުގެ ހާލާ މެދު ހަމްދަރުދީވާ ކަމަށެވެ. އަދި މިއަދު ސަރުކާރުން މަސައްކަތްކުރަމުން ދަނީ "ބަޑި ބައިންދާފައިއިން ރައްޔިތުންގެ މަޖިލީހުގެ ރައީސެއް" މެދުވެރިކޮށް ނުފޫޒު ފޯރުވައިގެން ސަރުކާރުން ބޭނުންވާ ކަންކަން ހާސިލްކުރުމަށް ކަމަށެވެ.

މީކައިލްގެ ވާހަކަ މެދު ކަނޑަލައްވާ އަބްދުއްރަހީމު އެ ވާހަކަތަކަށް ރައްދު ދެއްވާފައެވެ. އެގޮތުން އަބްދުއްރަހީމު ވިދާޅުވީ، އެމަނިކުފާނުގެ ހާލެއްވެސް އަދި އެމަނިކުފާނުގެ ދިރިއުޅުމުގެ ހާލާތު ވެސް މީކާއިލްއަށް ނޭނގޭއިރު އެ ފަދަ ވާހަކަ ނުދެއްކޭނެ ކަމަށެވެ. އަދި ވިދާޅުވީ މަޖިލީހުގެ ރައީސްކަމުގެ ގޮނޑީގައި އިންނަވަނީ ވަރަށް މިނިވަންކަމާ އެކު ކަމަށާ އޭނާ އެ ގޮނޑިއަށް އިންތިހާބުކުރި ރައްޔިތުންގެ މަޖިލީހުގެ އިއްޒަތްތެރި މެމްބަރުން ކަމަށާ އެތަނުގައި އެމަނިކުފާނަށް އެއްވެސް ހުރަހެއް ނެތް ކަމަށެވެ.

މީގެ އިތުރުން އަބްދުއްރަހީމު ވަނީ މީކާއިލް ގަލޮޅު ދެކުނު ދާއިރާގެ މައިކު ދޮގުފެތުރުމަށް ބޭނުންކުރާ ކަމަށް ވިދާޅުވެ އެފަދަ ދޮގު ފެތުރުމަށް ދާއިރާގެ މައިކު ބޭނުންނުކުރުމަށް ވިދާޅުވެފައެވެ. އެއާއެކު ފުރުސަތު ލިބުމުން މީކާއިލް ވަނީ ގަލޮޅު ދެކުނު ދާއިރާގެ މައިކުގައި އަޑު ހުރިހާ ހިނދަކު އަޑު އިއްވާނެ ކަމަށް ވިދާޅުވެފައެވެ. ރައްޔިތުންގެ މަޖިލީހުގެ ބާރު ކަނޑުވާލަން ސަރުކާރުން އުޅޭ ކަމަށް ވިދާޅުވެ މީކާއިލް ވަނީ މަޖިލިސް ރައީސްގެ ހާލުކޮޅު ވެސް މިއަދު ރައްޔިތުންނަށް އެނގޭނެ ކަމަށް ވިދާޅުވެފައެވެ. އަދި މީކާއިލް ވަނީ އަބްދުއްރަހީމުގެ ދަރިފުޅު ފައިސަލް މަގާމުން ވަކިކުރި ކަމާ އަބްދުއްރަހީމުގެ އާއިލާ މީހުންނާ އަދި ގާތް މީހުންވެސް މަގާމުތަކުން ވަކިކުރިކަން ވެސް ފާހަގަކުރައްވާފައެވެ.