ދިރާގުގެ އަހަރީ އާންމު ޖަލްސާ / ދިރާގު
ވިޔަފާރި, ހަބަރު
ދިރާގުގެ 36 ވަނަ އަހަރީ އާންމު ޖަލްސާ ބާއްވައިފި
Hussain Nawaf
ހުސައިން ނަވާފް
25 ފެބްރުއަރީ 2025

ދިރާގުގެ 36 ވަނަ އަހަރީ އާންމު ޖަލްސާ ކްރޮސްރޯޑްސް މޯލްޑިވްސްގައި ބާއްވައިފިއެވެ.

ދިރާގުގެ އަހަރީ ޖަލްސާ ކުރިއަށް ދިޔައީ ހައިބްރިޑް މޮޑެލްގައެވެ. އެގޮތުން މި ޖަލްސާގައި 144 ހިއްސާދާރުން ބައިވެރިވި އިރު އެއީ 113 ހިއްސާދާރުން އަދި 36 ހިއްސާދާރުންގެ ޕްރޮކްސީ ދީފައިވާ ފަރާތްތަކެވެ.

ރަޖިސްޓްރީކޮށްފައިވާ ހުރިހާ ހިއްސާދާރުންގެ ވޯޓު ވެސް ނަގައިފައިވަނީ މޯލްޑިވްސް ސެކިއުރިޓީ ޑިޕޮސިޓަރީ ޕްރައިވެޓް ލިމިޓެޑުގެ އޮންލައިން ޖެނެރަލް މީޓިންގް މެނޭޖްމަންޓް ސިސްޓަމް ފަހިވޯޓް މެދުވެރިކޮށެވެ.

މި ޖަލްސާގައި 4 ރިޒޮލިއުޝަނެއްވަނީ ފާސްކޮށްފައެވެ. އެއީ 2024 ވަނަ އަހަރުގެ ކުންފުނީގެ ޑިރެކްޓަރުންގެ ރިޕޯޓާއި އޮޑިޓްކުރެވިފައިވާ މާލީ ހިސާބުތަކުގެ ރިޕޯޓް ފާސްކުރުމުގެ ރިސޮލިއުޝަނާއި 2024 ވަނަ އަހަރުގެ ފައިނަލް އަދި މުޅި އަހަރުގެ ޑިވިޑެންޑް ކަނޑައަޅައި ފާސްކުރުމުގެ ރިސޮލިއުޝަނާއި 2025 ވަނަ މާލީ އަހަރުގެ އެކްސްޓާނަލް އޮޑިޓަރުން އައްޔަނުކުރުމަށް ފާސްކުރުމުގެ ރިސޮލިއުޝަންގެ އިތުރުން 2024 ވަނަ އަހަރުގެ އިންޓެރިމް ޑިވިޑެންޑް ކަނޑައަޅައި ބެހުމުގެ ބާރު ކުންފުނީގެ ޑިރެކްޓަރުންގެ ބޯޑަށް ދިނުމަށް ފާސްކުރުމުގެ ރިސޮލިއުޝަނެވެ.

ދިރާގަށް މިދިޔަ އަހަރު ޖުމްލަ އާމްދަނީގެ ގޮތުގައި 2.8 ބިލިއަން ރުފިޔާ ލިބުނެވެ. މިއީ 2023 ވަނަ އަހަރާއި އަޅައިބަލާއިރު 5.9 ޕަސެންޓް އިތުރު އަދަދެކެވެ.

ޓެކުހަށް ކެނޑުމަށްފަހު ސާފު ފައިދާގެ ގޮތުގައި 946 މިލިއަން ރުފިޔާ ހޯދައި އެއީ 2023 އަށް ވުރެ 5.5 ޕަސެންޓްގެ ކުރިއެރުމެއްކަން ފާހަގަކޮށްލެވެއެވެ.

ދިރާގުގެ ޑިރެކްޓަރުންގެ ބޯޑުން ވަނީ 2024 ވަނަ އަހަރުގެ ޑިވިޑެންޑްގެ ގޮތުގައި ހިއްސާއަކަށް 8.70 ރުފިޔާ ދިނުމަށް ހުށަހަޅައި ފާސްކޮށްފަ އެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved