ޕީއެންސީގެ މަޖިލިސް ވަޓްސް އަޕް ގުރޫޕުން ހިތަދޫ މެދު ދާއިރާގެ މެމްބަރު އަހުމަދު އަޒާން ބޭރުކޮށްލައިފިއެވެ.
މައުލޫމާތު ލިބިފައިވާ ގޮތުގައި އަޒާން ޕީއެންސީގެ މަޖިލިސް މެމްބަރުންގެ ވަޓްސް އަޕް ގުރޫޕުން ބޭރުކޮށްލާފައި ވަނީ ރައީސް މުހައްމަދު މުއިއްޒު ބޭނުންވާ ގޮތަށް ވޯޓެއް ނުދީގެންނެވެ.
އަޒާން ވަޓްސް އަޕް ގުރޫޕުން ނެރެފައި މިވަނީ، މިއަދުގެ މަޖިލިސް ޖަލްސާގައި، ނެގި ވޯޓަށް ޖަލްސާއަށް ހާޒިރުވެ ވޯޓު ނެގި ވަގުތު ޕީއެންސީގެ ދެ މެމްބަރަކު ވޯޓުގައި ބައިވެރި ނުވެފައި ވަނީ ކީއްވެގެންތޯއާއި އެހެން ދިމާވި ސަބަބު ޕާލިމެންޓްރީ ގްރޫޕުގެ ލީޑާޝިޕުން ދަނީ ބަލަމުން ކަމަށް ޕީޖީ ލީޑަރު އިބްރާހިމު ފަލާހު ބުނެފައިވާ ވެސް ދަނޑިވަޅެއްގައެވެ. ފަލާހު ވަނީ އެ މެމްބަރުންނާ މެދު ފިޔަވަޅުވެސް އަޅާނެ ކަމުގެ އިންޒާރު ދެއްވާފައެވެ.
އެ މެސެޖު ފޮނުވި ފަހުން މިއަދު އިރުއޮއްސެމުން ދިޔަ ވަގުތުގައި އަޒާން ގްރޫޕުން ބޭރުކޮށްލާފައިވީ ނަމަވެސް، ޕާޓީން ވަކިކުރުމާ މެދު ގޮތެއް ނިންމި ކަމެއް ސާފެއް ނޫނެވެ.
ސުޕްރީމް ކޯޓުގެ ދެ ފަނޑިޔާރަކު މަގާމުން ވަކިވާ ގޮތަށް އެ ކޯޓުގެ ބެންޗުގައި ތިބޭ ފަނޑިޔާރުންގެ އަދަދު ފަހަކަށް ބަދަލުކުރަން މަޖިލީހަށް ހުށަހަޅާފައިވާ ބިލު ބަލައިގަތުމުގެ ވޯޓުގައި އަޒާން ބައިވެރިވެވަޑައެއްނުގަންނަވަ އެވެ.
