މަޖިލީހުގެ ނައިބު ރައީސް ކަމުން ދިއްގަރު ދާއިރާގެ މެމްބަރު އަހުމަދު ނާޒިމް ވަކިކުރަން ޕީއެންސީއިން ބުރާސްފަތި ދުވަހު ހުށަހަޅައިފިއެވެ.
މަޖިލީހުގެ ނައިބު ރައީސްކަމުން ނާޒިމް ވަކިކުރަން ޕީއެންސީން ނިންމީ ބުދަ ދުވަހު ބޭއްވި ޕީޖީ ގްރޫޕުގެ ބައްދަލުވުމެއްގައެވެ. އެއަށް ފަހު، ބުރާސްފަތި ދުވަހު ވަނީ 73 ސޮއި ހަމަކޮށް މައްސަލަ ޖަޖިލީހަށް ހުށަހަޅާފައެވެ. މަޖިލީހުގެ ނައިބު ރައީސް ނާޒިމް މަޤާމުން ވަކިކުރުމުގެ ގަރާރެއް ލިބިފައިވާ ކަމަށް މަޖިލީހުގެ އިދާރާއިން ބުނެފައިވެއެވެ.
މަޖިލީހުގެ ނައިބު ރައީސްކަމުން ނާޒިމް ވަކިކުރަން ހުށަހަޅާފައިވާއިރު، އޭނާއަށް އެކަމުގެ ނޯޓިސް ފޮނުވާ ޖަވާބުދާރީވުމަށް 14 ދުވަހުގެ މުއްދަތެއް ދޭން ޖެހޭނެއެވެ. ނަމަވެސް ދައުރުގައި ބާކީ ދެން ޖަލްސާއެއް ނޯންނާނެތީވެ ބުރާސްފަތި ދުވަހު ވަނީ މަޖިލީހުގެ މި ދައުރު ދަންމާލާފައެވެ. ބެލެވޭ ގޮތުގައި އެއީ ނާޒިމް ނައިބު ރައީސްކަމުން މި ދައުރުގައި ވަކިކުރުމަށް މަގުފަހި ކުރުމަށެވެ.
ދައުރު މި މަހު 31 ވަނަ ދުވަހާ ހަމައަށް ދަންމާލަން ވެސް ފާސްކޮށްފައިވަނީ މުހިއްމު މަސައްކަތެއް ކުރުމަށް ކަމަށް ބުނެއެވެ. ނަމަވެސް އެއީ ސިދާ ކޮން މަސައްކަތެއް ކަމެއް ހާމަކޮށްފައިނުވެއެވެ.
ކުއްލި ގޮތަކަށް ނާޒިމަށް އޮތް އިތުބާރު ގެއްލުނީ ކީއްވެ ކަމެއްޕީއެންސިއިން މިހާތަނަށް ހާމަކޮށްފައެއް ނުވެއެވެ.
